InfoHub Logo

الداعى سەنبى كۇنى م.وتەمىسوۆ اتىنداعى وقۋشىلار سارايىندا «KazRoboSport-2016» ايماقتىق چەمپيوناتى باستالادى. جارىسقا قاتىسۋعا 30 جۋىق كوماندا ءوتىنىم بەردى. بالالار ءوز اۆتونومدى روبوتتارىن تانىستىرىپ، سايىسقا تۇسەدى، دەپ حابارلادى قالالىق اكىمدىكتىڭ باسپا ءسوز قىزمەتىنەن.

چەمپيونات ءتورت سانات بويىنشا وتكىزىلەدى. كونكۋرسقا قاتىسۋشىلار ءوز قولىمەن جيناعان اۆتونومدى روبوتتار «كەگەلرينگ» جانە «سىزىق بويىنشا جارىستا»، سونداي-اق روبو-سۋمودا كۇش سىناسادى.

- روبوتوتەحنيكا ماتەماتيكا، فيزيكا، ينفورماتيكا پاندەرىن بىرىكتىرەدى. ولاردى جەكە وقىعان قيىن، ال بىرگە العاندا قىزىقتى. بالالار مەن جاسوسپىرىمدەر ءوز شىعارماشىلىقتارىن پاش ەتسە، كونسترۋكتورلار قولدان روبوت قۇراستىرىپ، ءوز ەڭبەكتەرىنىڭ جەمىسىن كورە الادى. جالپى ايتقاندا، روبوتوتەحنيكا - الەمدەگى ەڭ سۇرانىسقا يە ماماندىقتاردىڭ ءبىرى. بالالاردىڭ ينجەنەرلىك ويلاۋ قابىلەتتىلىگى قالىپتاسادى، پەرسپەكتيۆادا ولار مۇنىمەن كاسىپتىك دەڭگەيدە اينالىسا الادى، - دەيدى ءبىلىم بەرۋ جانە سپورتتىق روبوتوتەحنيكا فەدەراسياسىنىڭ استاناداعى فيليالى «روبوتەك» كلۋبىنىڭ ديرەكتورى ميحايل مالورود.

قازىرگى كەزدە 2 ادامنان تۇراتىن 30 جۋىق كوماندا جارىسقا قاتىساتىندارىن راستادى. نەگىزىنەن، نازاربايەۆ زياتكەرلىك مەكتەبىنىڭ، «روبوتەك» روبوتوتەحنيكا كلۋبىنىڭ، «شەستەرەنكي» ەكسپەريمەنتالدى مەحانيكا جانە روبوتوتەحنيكا كلۋبىنىڭ بالالار مەن جاسوسپىرىمدەر كوماندالارى، سونداي-اق، اقمولا وبلىسىنان، قاراعاندى جانە كوكشەتاۋدان كەلگەن كوماندالار باقتارىن سىناماق. ەرەجەگە سايكەس، سايىسقا 10-نان 25 جاسقا دەيىنگى جاستار قاتىسادى.

كونكۋرس اياسىندا «ءبىلىم بەرەتىن روبوتوتەحنيكا» تاقىرىبىندا شەبەرلىك ءدارىسى وتكىزىلەدى، بالالارعا 3D-باسپانىڭ ەرەكشەلىكتەرى مەن پرينسيپتەرى تۋرالى ايتىلادى. جەڭىمپازدار قىركۇيەك ايىندا وتەتىن «KazRoboSport» جارىسىنىڭ رەسپۋبليكالىق كەزەڭىنە جولداماعا يە بولادى.

---