InfoHub Logo

ەرتەرەكتە قارا ەرتىستە مۇز قاتىسىمەن، ەل ءوتىپ ارجاعىنا قىستايدى ەكەن. باباقان بي باستاعان ءبىر زاڭگى ەل، ەجەلگى ادەتى بويىنشا كوشىپ، مۇزدان وتپەك بولادى. باباقان بىرنەشە اداممەن مۇزدىڭ ارجاعىنا ءوتىپ، اتتارىنان ءتۇسىپ، مۇزعا تاڭىرقاي قاراپ تۇرادى. كوشكەن ەل مۇز ورتاسىنا كەلە بەرگەندە، مۇز ويىلىپ، ءبىر زاڭگى ەل مۇز استىنا كەتىپتى.

باباقان — 80 جاستا، ون بالالى ادام ەكەن. بىرنەشە بالاسىنىڭ وتاۋى دا بار ەكەن. بۇلار تۇتاس مۇز استىنا كەتىپتى. باسقالار باباقان بيگە توقتاۋ ايتسا دا، ەلى-جۇرتىن، بالا-شاعاسىن ويلاپ قايعى-زارعا باتىپ جۇرەدى ەكەن. بۇل حاباردى ەستىگەن قايراقباي ءبىر سىبىزعى كۇيىن تارتىپ، باباقانعا توقتاۋ ايتىپتى:

— ەمەننىڭ يىلگەنى سىنعانمەن تەڭ، سەن ەمەنسىڭ، يىلمەيسىڭ، قايعىعا مايىسىپ سىناسىڭ، ءبىراق ەمىل تولقيدى، يىلمەيدى. قايعى ادامدى تولقىتادى، ادام شىدامدى بولۋ كەرەك، — دەگەن ەكەن.

سوندىقتان بۇل كۇيدىڭ اتىن «ەمىل تولقىنى» دەپ قويعان ەكەن.

 

---