ەندى اقىلى اۆتوتۇراق اقىسىن ءموبيلدى باعدارلاما ارقىلى تولەۋگە بولادى
«استانا قالاسى كولىك كەڭىستىگىن باسقارۋ» ج ش س 2018 جىلدىڭ شىلدە ايىنان باستاپ قالا تۇرعىندارى مەن قوناقتارىنا اقىلى اۆتوتۇراق قۇنىن تولەۋدىڭ ىڭعايلى فورماسىن ۇسىنادى.
ەندى اقىلى اۆتوتۇراق قۇنىن Senim ءموبيلدى قوسىمشاسى كومەگىمەن تولەۋگە بولادى.
ول ءۇشىن:
1) Senim ءموبيلدى قوسىمشاسىن جۇكتەۋ؛
2) جۇيەدە تىركەلۋ جانە بالانستى تولتىرۋ؛
3) «باپتاۋلار» قويىندىسىندا Senim Parking كىرۋ؛
4) كولىگىڭىز تۋرالى بارلىق اقپاراتتى ەنگىزۋ؛
5) اقىلى اۆتوتۇراق قۇنىن ءبىر تەتىكپەن تولەۋ.
تۇراق قۇنى تاڭعى ساعات 8.00-دەن كەشكى 20.00-گە دەيىن ساعاتىنا 100 تەڭگە. تولەم كولىكتى تۇراققا قويعان ساتتەن باستاپ العاشقى 30 مينۋت ىشىندە جۇرگىزىلۋى ءتيىس. ال دەمالىس جانە مەرەكە كۇندەرى تۇراقتى پايدالانۋ تەگىن. تۇراقتى پايدالانۋ ءتارتىبى مەن تولەم تاسىلدەرى جانە پاركوماتتار ورنالاسقان ورىندار تۋرالى www.2888.kz. سايتىنان دا تولىعىراق اقپارات الا الاسىز. سونداي-اق، 8-800-080-28-88 تەگىن نومىرىنە نەمەسە قالالىق 109 ءبىرىڭعاي بايلانىس ورتالىعىنا دا حابارلاسۋىڭىزعا بولادى.
حالىقارالىق تاجىريبەلەرگە سۇيەنسەك، ءىرى قالالاردا اقىلى كولىك تۇراقتار ەنگىزىلۋىنىڭ ناتيجەسىندە ءبىرقاتار كەدەرگىلەر جويىلىپ، كەلەڭسىزدىكتەر رەتتەلگەن. ماسەلەن، اقىلى تۇراقتار بوردو (فرانسيا) قالاسىن كولىك كەپتەلەسىنەن تۇبەگەيلى قۇتقاردى. بۇعان قوسا، جەرگىلىكتى حالقى قوعامدىق كولىكتەرمەن جاپپاي جۇرە باستاپ، قوعامدىق ترانسپورت دامىپتى. وسىعان بايلانىستىبۇل قالا ەكولوگيالىق تۇرعىدان تازا، جايلى ايماقتاردىڭ بىرىنە اينالعان ەكەن. ال، ۆارنا (بولگاريا) قالاسىندا دا كەپتەلىس اتىمەن جوق. وعان سەبەپ – اقىلى تۇراقتار مەن جول قوزعالىسىنىڭ دۇرىس ۇيىمداسۋى. سونداي-اق، جاپونيادا اقىلى كولىك تۇراقتارىنىڭ ارقاسىندا ءتارتىپ بۇزۋشىلىقتار ازايدى. ونداعى اقىلى تۇراق كەڭىستىكتەرى وز-وزىنە قىزمەت ەتۋ جۇيەسى بويىنشا جۇمىس ىستەيدى.
ەسكە سالا كەتسەك، 2018 جىلدىڭ 15ء-شى قاڭتارىندا استانا قالاسىنىڭ نۇرجول بۋلۆارىندا اقىلى تۇراق ىسكە قوسىلدى. قالانىڭ كوشە-جول جەلىسىنىڭ جۇگىن جەڭىلدەتۋ جانە جاياۋ جۇرگىنشىلەر مەن كولىك قۇرالدارى قوزعالىسى ءۇشىن قولايلى جاعداي جاساۋ - جوبانىڭ باستى ماقساتى سانالادى. سونداي-اق، ۇوس ارداگەرلەرى، ءبىرىنشى جانە ەكىنشى توپتاعى مۇگەدەكتەر، «التىن قىران» جانە «حالىق قاھارمانى» وردەندەرىنىڭ يەگەرلەرى، «التىن القا» جانە «كۇمىس القا» يەگەرلەرى، سەمەي يادرولىق سىناق پوليگونىندا جۇرگىزىلگەن سىناقتاردان زارداپ شەككەندەر، اۋعانستانداعى جانە باسقا ەلدەردەگى اسكەري ءىس-قيمىلدان جاپا شەككەن مۇگەدەكتەر مەن ارداگەرلەر تۇراق ءۇشىن اقى تولەمەيدى.
You Might Also Like
-
الماتىدا ونكولوگيالىق اۋرۋلارمەن اۋىراتىن ناۋقاستاردى ەمدەۋدە، دارىگەرلەرگە دۇرىس شەشىم قابىلداۋعا كومەكتەسەتىن جاساندى ينتەللەكت جۇيەسىنىڭ پيلوتتىق جوباسى ىسكە قوسىلدى.
