InfoHub Logo

الماتىدا ونكولوگيالىق اۋرۋلارمەن اۋىراتىن ناۋقاستاردى ەمدەۋدە، دارىگەرلەرگە دۇرىس شەشىم قابىلداۋعا كومەكتەسەتىن جاساندى ينتەللەكت جۇيەسىنىڭ پيلوتتىق جوباسى ىسكە قوسىلدى.

باعدارلاما بۇكىل الەم بويىنشا ونكولوگيا سالاسىنداعى عىلىمي زەرتتەۋلەر، ماقالالار مەن جاريالانىمدار تۋرالى دەرەكتەرگە نەگىزدەلىپ جاسالعان. دارىگەردىڭ ناۋقاس تۋرالى ەنگىزگەن مالىمەتتەرى نەگىزىندە پلافتورما تالداۋ جاسايدى. ناتيجەسىندە ول مامانعا ونكولوگيالىق ناۋقاستاردى ەمدەۋگە ارنالعان نۇسقالارىن ۇسىناتىن بولادى. ال ناۋقاستىڭ دياگنوزىنىڭ سوڭعى شەشىمىن دارىگەرلەر قابىلدايدى.

«جۇيە وسى زەرتتەۋلەردى ءار پاسيەنتكە جەكە تۇردە ەنگىزەدى جانە جالپى ەمدەۋدە، اتاپ ايتقاندا، سوڭعى عىلىمي زەرتتەۋلەرگە نەگىزدەلگەن دەربەستەندىرىلگەن ەمدەۋ ءتاسىلىن ەمەس، وسى ەمدەلۋشىگە قانداي ەمدەۋ پروسەسىن قولدانۋ كەرەكتىگىن انىقتايدى»، – دەدى، ق ر دەنساۋلىق ساقتاۋ ۆيسە-مينيسترى ولجاس ابىشيەۆ.

بۇل باعدارلاما ءقازىردىڭ وزىندە الەمنىڭ 25 ەلىندە تيىمدىلىگىن دالەلدەدى. جوبانى العاشقى كەزەڭدە الماتىدا تەستىلەۋ جوسپارلانعان. ەگەر جۇيەنىڭناتيجەلىلىگى دالەلدەنسە، ول بۇكىل رەسپۋبليكا بويىنشا ەنگىزىلەتىن بولادى.

ايتا كەتەلىك، بۇگىنگە دەيىن مەديسينادا مالىمەتتەردى – كىتاپتاردى، عىلىمي جاريالانىمداردى، بارلىق دەرلىك كلينيكالىق حاتتامالاردى ساراپتاپ، ءبىر مينۋتتىڭ ىشىندە ەمدەۋگە ۇسىنىس بەرىپ وتىراتىن «ۆاتسون» دەپ اتالعان جاساندى ينتەلەكت قولدانىلىپ كەلگەن بولاتىن. ياعني، دارىگەرگە ەمدەۋدە بارىنشا ءتيىمدى جولدارمەن قاتار بار تەحنولوگيالاردى جانە عىلىمي جاريالانىمدارعا سىلتەمە بەرەدى.

2017 جىلى دەنساۋلىق ساقتاۋ مينيسترلىگى مەن ءىۆم كومپانياسى دەنساۋلىق ساقتاۋ سالاسىنا جاساندى ينتەللەكت ەنگىزۋ بويىنشا ىنتىماقتاستىق تۋرالى مەموراندۋمعا قول قويعان. مينيسترلىك العاشقى پاسيەنتتى اقپان ايىندا ەمدەۋگە ۇسىنىس الدى.

جاساندى ينتەللەكت عىلىمنىڭ جاڭا ءبىر سالاسى رەتىندە حح عاسىردىڭ ورتاسىنان دامي باستادى. ونىڭ قارىشتاپ ىلگەرىلەگەنى سونشالىق، ءقازىر بارلىق سالادا كەڭىنەن قولدانىلادى. باستاپقى كەزەڭدە بۇل باعدارلامالىق جۇيە ادامنىڭ ەڭبەگىن الماستىراتىن كومەكشى قۇرال رەتىندە عانا پايدالانىلعان بولاتىن. قازىرگى مۇمكىنشىلىگى ادامنىڭ قابىلەتىنەن دە اسىپ ءتۇسىپ، ونىڭ اقىل-ويى جەتە بەرمەيتىن جاعدايلاردا كومەككە كەلەتىن بولدى.

نازار اۋداراتىن ءبىر جايت، جاساندى ينتەللەكت باعدارلاماسىنىڭ قاۋىپسىزدىگى ءۇش دەڭگەيمەن قورعالاتىندىقتان، كيبەرشابۋىلدار جاسالادى دەپ قاۋىپتەنبەۋگە بولادى.

---