InfoHub Logo

ۇرىس-كەرىسكە يكەمى بار، داۋ-جانجالعا جانى قۇمار، توبەلەس كەزىندە ەكى بىلەگىن سىبانىپ، وسەك ايتاتىن ەرنىن ءشۇيىرىپ، تىكەن ءتىلىن بەزەپ، ەكى كوزى شاتىناپ شىعا كەلەتىن «دارىندى» دا شالىمدى، بولاشاعىنان مول ءۇمىت كۇتتىرەتىن كەلىندەردى «ەنەلەرگە قارسى كۇرەس» كۋرسىنا وقۋعا شاقىرامىز. كەلىندەردىڭ دىنىنە، تىلىنە، وتاۋ قۇرعان جىلىنا، جولىنا، جاسىنا شەك قويىلمايدى.

كۋرسقا تالاپكەرلەر تەگىن قابىلدانادى. ولار ستيپەنديامەن، جاتاقحانامەن جانە ەنەلەردى ۇرىپ-سوعۋ، ساباۋ، سونداي-اق قارسىلاستارمەن قاقتىعىستا برونەجەلەت سەكىلدى قورعانۋ قۇرالدارىمەن قامتاماسىز ەتىلەدى. سونىمەن قاتار  ەنەمەن بىرگە تۇرعان جىلدارىنا «زا ۆرەدنوست» تولەنەدى.

ساباق كەزىندە ولار «شىمشۋ»، «بەت جۇلۋ»، «تىرناۋ»، «قايىن جۇرت تاريحى»، «ەنە تەبۋ»، «تاەكۆون-دو»، «قاينىاتا-دو»، «وسەك ايتۋ نەگىزدەرى»، «كۇيەۋمەن ەركىن كۇرەس» تاقىلەتتەس دارىستەر مەن سپورت تۇرلەرىن مەڭگەرەدى.

قىزىعى مەن قيىندىعى قاتار تۇراتىن بۇل ماماندىقتى ويداعىداي مەڭگەرىپ، ءوزىنىڭ تۇگىلى، وزگەنىڭ دە ەنەسىن جۇلىپ-جەۋگە قابىلەتتى بولعان سوڭ، ولار شەتەلگە، ياعني امەريكاعا، باتىس ەۋروپاعا، رەسەيگە تاجىريبە الماسۋعا جىبەرىلەدى.

كۋرستى شاتاق عىلىمدارىنىڭ دوكتورى، پروفەسسور، «ەنەلەردى قان كاقساتۋ» عىلىم اكادەمياسىنىڭ قۇرمەتتى اكادەميگى، جەزتىرناق سىيلىعىنىڭ لاۋرەاتى دولىكۇل بەتپاقوۆا جۇرگىزەدى.

ءبىزدىڭ زامانىمىزعا ساي قۇرىلعان وقۋ وردامىزدىڭ دەمەۋشىلەرى «ابىسىندار القاسى»، «جاس كەلىندەر» اق، «ەنە كەنە» فيرماسى، «مىستان» ج ش س، «بىزبيكە بيكەشتەر» كەڭەسى.

وتباسىنا ەگەمەن الىپ، دەربەس ءومىر سۇرگىڭىز كەلسە، بىزگە كەلىڭىز. ءبىز سىزدەرگە قاشان دا قول ۇشىن، بىلەك كۇشىن بەرە الامىز.

«جالماۋىز كەمپىر» اتىنداعى مازاق اكادەمياسى.

---