القاشتىڭ اقىلى
قۋ قۇلقىندى قۇرعاتپايتىن — ءوزىمىز. سوندىقتان: تاڭەرتەڭ ءىرىڭ باسقان كوزىڭدى تىرنالاپ اشپاستان بۇرىن، ىشىندە ەسەكتىڭ ميىنداي ميى جوق ءزىلباتپان باسىڭدى قۇسىقتىڭ ءيسى سىڭگەن جاستىقتان كوتەرمەي تۇرىپ، پاحمەلدى قايدان تاباتىنىڭدى جوسپارلاپ ال.
ولگەن قويدىكىندەي الايعان كوزىڭدى سەكسەۋىلدەي تاربيعان ساۋساقتارىڭمەن ۋقالاپ، ءتىلىم-تىلىمى شىعىپ، كەزەرگەن ەرنىڭدى تىلىڭمەن جىبىتكەن سوڭ، «جۇرگەنگە ءجۇز گرامم ىلىگەدى» دەگەن قاعيدانى قاۋاشاعىڭدا ۇستاپ، بازار-ۆوكزالدى اداقتا.
راپەت-كەلبەتى، بەت-جۇزى، موردا-وبليسوۆكالارى تانىس ادامداردىڭ بارلىعىنان اماندىقتان بۇرىن، ءجۇز تەڭگە بولماسا دا، ءجۇز گرامعا جەتەتىندەي قايىر (نالوگ دەسەڭ دە بولادى) سۇرا.
اراق-شاراپ ءىشىپ وتىرعان كەز كەلگەن توپقا بارىپ: «باۋىرىم، قازاقپىز عوي» دەپ ۇلتجاندىلىعىڭدى ءبىلدىرىپ، كوكىرەگىڭدى ۇر.
ماسكۇنەمنىڭ — ۇلى، اراقتىڭ — ق ۇلى، ءسپيرتتىڭ — ۇمبەتى ەكەنىڭدى، استە ۇمىتپا.
شاقىرعان جەردەن دە، شاقىرماعان جەردەن دە (سوڭعىسى سەنىمدىلەۋ) قالما. سونان سوڭ، تاياۋ ارادا توي-تومالاق جاسايتىن وتباسىلاردىڭ ءتىزىمىن ءتۇزىپ، تاۋىقتىڭ ميىنداي (ەگەر ول بولسا) ميىڭا كودتاپ، دەر كەزىندە رەيد جاساپ، ءسۇزىپ شىق.
اراق جوق جەردەن التى قادام ارى ءجۇر.
ايىڭ وڭىنان تۋىپ، جارىپ قالعان كۇندەرى بوتەلكەلەس باۋىرلارىڭدى ەسىركەپ، مۇسىركەپ قوي. ءتۇبى قايتارىمى بولادى.
قىزىل شاپكىلىنى كورگەندە ون جەردەن ماس بولساڭ دا قاشپا. القاشتىق ابىرويىڭ تۇسەدى. ولار قالتاسىندا كوك تيىنى جوق سەنى كەرەك تە ەتپەيدى. قايتا ولار سەنەن قاشسىن!
اراققا «تويىپ» العان كۇندەرى ءوشىپ قالماي تۇرىپ، قوعامدى تۇلەتۋ، رەفورمالاردى جۇرگىزۋ، ۇكىمەتتى باسقارۋ جايلى «تىڭ يدەيا»، «قۇندى پىكىر»، «لەكسيالارىڭدى» كولدەنەڭ وتكەن كوك اتتىنىڭ بارىنە ايتىپ، جارناما جاسا. ولار سەنىڭ «دانىشپان» ەكەنىڭدى مويىنداسىن.
جالعاسىن باسىڭ جازىلعان كۇنى تاۋىپ الىپ وقىرسىڭ.
You Might Also Like
