InfoHub Logo

كۇن سايىن تىڭ جاڭالىعىمەن تاڭقالدىرىپ وتىرعان بۇگىنگى ازاماتتىق قوعامنىڭ دامۋىنا اسەر ەتەتىن كۇشتەردىڭ بىرەگەيى – ەرىكتىلەر بولىپ وتىر. پرەزيدەنتىمىز قاسىم-جومارت كەمەل ۇلى توقايەۆتىڭ 2020 جىلدى قازاقستانداعى «ەرىكتىلەر جىلى» دەپ جاريالاۋىنىڭ ءوزى ەرىكتىلەر قاۋىمىنىڭ قوعامىمىزدا الار ورنى ەرەكشە ەكەندىگىنىڭ ايقىن بەلگىسى. 

جالپى، «ەرىكتىلەر» دەگەنىمىزدىڭ ءوزى كىمدەر؟ ولاردىڭ اتقارار جۇمىسى قانداي بولماق؟  ەرىكتىلەر – ولار ۇلكەندى-كىشىلى كومەكتىڭ سان تۇرلەرىن بارشا جۇرتشىلىقتىڭ يگىلىگى ءۇشىن اقشالاي سىياقىسىن ەسەپتەۋسىز، قايتارىمسىز، ەرىكتى تۇردە جۇزەگە اسىرىپ، مۇقتاج جاندارعا كومەك قولىن سوزۋشىلار. جانە وزگەلەردىڭ يگىلىگى جولىندا سانالى دا رياسىز ەڭبەك ەتكەن كەز-كەلگەن ادام ەرىكتى بولىپ تابىلادى. ەرىكتى توپتاردىڭ اتقارار قىزمەتتەرى دە سان الۋان. ايتالىق، قالاۋلارىنا قاراي ەكولوگيالىق قوزعالىستار، اعاشتار  مەن گۇلدەردى وتىرعىزۋ، حالىقتىڭ قاۋقارسىز توبى: جالعىزباستى قارتتار، مۇمكىندىگى شەكتەۋلى جاندار مەن ءۇيسىز وتباسىلارعا قارجىلاي كومەكتەر، ءىرى قالالىق، حالىقارالىق  ءىس-شارالار مەن فەستيۆالداردى ۇيىمداستىرۋعا اتسالىسۋ ەرىكتى توپتار قۇزىرىندا. جۇرەكتەرى يمانمەن نۇرلانعان، جاندارى جاقسىلىققا قۇمار جاناشىرلاردىڭ يگى قىزمەتتەرى ەل تاريحىندا نۇر-سۇلتاندا وتكەن VII قىسقى ازيا ويىندارىندا جوعارى دارەجەدە كورسەتىلگەن بولاتىن. بۇگىندە نۇر-سۇلتاندا ۆولونتەرلىك مادەنيەتتى قالىپتاستىرۋ جانە قولداۋ ماقساتىندا 2010 جىلى قۇرىلعان ۇلتتىق ۆولونتەرلىك جەلى بار. بۇل دا ەلىمىزدە پاراساتتى تۇلعالاردىڭ قاتارى كوبەيىپ، تۇرمىسى تومەن قانداستارىمىزدى اياققا تۇرعىزۋ ارقىلى مەملەكەت دامۋىنا اسەر ەتىپ، وسكەلەڭ ۇرپاققا تاماشا ۇلگى كورسەتىپ جاتقاندىعىنىڭ جارقىن ايعاعى. الايدا، قوعامدا ايتۋلى ءرول اتقارىپ جۇرگەن ۆولونتەرلەر قىزمەتىن دامىتۋ مەن قولداۋ تاراپىنىن وزەكتى ماسەلەلەر شىعىپ جاتقاندىعى دا جاسىرىن ەمەس. ەلباسىمىزدىڭ جارلىعىمەن بيىلعى جىلدىڭ «ەرىكتىلەر جىلى» دەپ جاريالانۋى ۆولونتەرلىك باستامالاردىڭ مەملەكەت تاراپىنان قولداۋدىڭ از تابىلۋى سىندى ماسەلەلەردى شەشىپ، كومەككە قۇشتار ەرىكتىلەرىمىزدىڭ ءورىسىن كەڭەيتەتىن «ۆولونتەرلىك قىزمەت تۋرالى زاڭ» شىعارۋ، ولاردىڭ مارتەبەسىن كوتەرۋ، مەملەكەت تاراپىنان ماتەريالدىق تۇرعىدا قولداۋ تانىتۋ سياقتى ۇسىنىستاردىڭ ءىس جۇزىندە ورىندالۋىنا جول اشسا نۇر ۇستىنە نۇر. بۇل باستاما ۆولونتەرلەردى تەگىن جۇمىس كۇشى رەتىندە پايدالانۋ دەگەن تۇسىنىكتىڭ قالىپتاسۋىنا جول بەرمەي، ۆولونتەرلەر ينستيتۋتىن قالىپتاستىرىپ، ولاردىڭ قۇقىعىن قولداي وتىرىپ، ەرىكتىلەرىمىزدىڭ ەل ەكونوميكاسىنا تيگىزىپ جاتقان زور ۇلەسىن كەڭىنەن دارىپتەۋگە سەپتىگىن تيگىزەرى انىق.                               

الدىمىزداعى 2020 جىلدىڭ «ەرىكتىلەر جىلى» بولىپ ەسكى اشۋى ەلىمىزدەگى 200-دەن استام ەرىكتىلەر ۇيىمى مەن 50 مىڭنان استام بەلسەندى ەرىكتىلەرىمىزدىڭ ورتاق جەمىسى، قۋانىشى بولعالى تۇر. باعزى زاماننان كەڭپەيىلدىلىگىمەن تانىلىعان حالقىمىزدا جاقسىلىقتىڭ جارشىلارىن ناسيحاتتاۋ جىلىنىڭ جاريالانۋى مەملەكەتتىڭ مەرەيىن اسىرىپ، تىڭ سەرپىن بەرەرى ءسوزسىز. بەكىتىلگەن بۇل قادام بەلسەندى تۇلعالاردىڭ سانىن ارتتىرىپ، جەڭىسكە، شابىتقا تولى بولعان «جاستار جىلىنىڭ» قيسىندى جالعاسى، رۋحاني جاڭعىرۋدىڭ تاماشا جەتىستىگى بولماق.             

---