InfoHub Logo

ورتا جۇزدەگى ءاز تايتەكە ءبيدىڭ ءۇرىم–بۇتاعى، اۋلىنىڭ يگى جاقسىلارىمەن وننان اسا كىسى وردەگى قۋاندىققا جولاۋشىلاپ بارىپتى.

ىستىق شىلدە كۇنىندە شاڭقاي تۇستە ءبىر اق ءۇيدىڭ سىرتىنا تۇرا قالىپ، سويلەس قىلسا، ادام شىقپاعان سوڭ وزدەرى كىرىپ كەلىپ وتىرىسىپتى.

بايبىشە ءجون سۇراعان جوق. بۇلاردىڭ شاڭىرقاپ كەلگەنىن كورىپ، ورنىنان ارەڭ تۇرىپ، زورعا قوزعالىپ بارىپ، سابانى پىسىرۋگە مۇرشاسى كەلە الماعاندىقتان اياعىمەن تولقىپ، «بالالار بىرەۋىڭ كەلىپ شارانى اۋزىنا توسا بەرىڭدەر»، — دەپتى. سوندا بۇلار مىرس–مىرس كۇلىپ جىبەرىپتى، - دەيدى.

بۇلار قىمىز ءىشىپ كەنەلىپ، ماڭدايلارى تەرلەسىپ، وزدەرىنە وزدەرى كەلىپ بولعان سوڭ، بايبىشە باياۋلاپ، قوڭىرلاپ سويلەدى دەيدى:

— «جىلاعاندى سۇراما، كۇلگەندى سۇرا»، دەپ ەدى، بالالار! مىنا مەن قىمىز قۇيىپ جاتقاندا كۇلدىڭدەر-اۋ، سوندا نەمەنەگە كۇلدىڭدەر؟ — دەيدى.

وندا ولار ايتادى:

— ءسىزدىڭ سابانى اياعىڭىزبەن تولقىعانىڭىزعا كۇلدىك.

— ونىڭ نەسىنە كۇلدىڭدەر؟

— ءبىزدىڭ جاقتىڭ قاريالارى استى اياعىمەن تەپكەن ىرىمعا جامان دەپ ۇرسىپ تاستاۋشى ەدى. مىنا كىسى ىرىم-جىرىمدى بىلمەيدى ەكەن-اۋ دەپ، ءوزىمىزدىڭ جاقتا كورمەگەن نارسەمىز بولعان سوڭ، بىزگە ەرسى كورىنىپ، سوعان كۇلدىك، — دەيدى.

— بالالار، بۇرىنعىنىڭ ماقالىن ەستىگەن جوق ەكەنسىڭدەر، «بارىندا باتىپ ءىش، جوعىندا ساتىپ ءىش، ءتاڭىر بەرىپ تۇرعاندا، شالقاڭنان قۇلاپ جاتىپ ءىش». «دۇنيە دەگەن شىركىن كەتەر بولسا، وپكەنىڭمەن كەلمەيدى، بەرى بەتتەپ كەلەر بولسا، تەپكەنىڭمەن كەتپەيدى». «كەدەيلەر ىرىم ەتەر، ىرىمى قىرىم كەتەر» دەگەن ەكەن، ىرىمشىل بولساڭدار ەلدەرىڭ كەدەي ەكەن عوي، كەدەي ەلدىڭ كىسىسى كەكىرت كەلەدى دەگەن بەكەر ەمەس قوي» دەگەندە بۇلار دانەمە ايتا الماي ۇيالىپ قالىپتى.

1918

---