گاككۋ: كىتاپتان ءۇزىندى
“گاككۋ: فراگمەنت رومانا” / “GAKKU: the part of the book”
(عالامنىڭ تولىق ءبىرىڭعاي تەورياسى تۋرالى، و پولنوي ەدينوي تەوريي ۆسەلەننوي)
اڭگىمە
پامياتي فاكۋلتەتا، كوتوروگو بولشە نەت...
1
اۋەلى، ءسوز — نۇكتە بولدى. ۋاقىت شەكسىز سىعىمدالعان قارا نوقاتتى قاپىلىستا جارىپ شىقتى. The Big Bang، جوقتىڭ بەيتانىس جۇزىنە، شۇعىل ۇلكەيىپ كەلە جاتقان قۇيرىقتى الابوتەن داق سالدى. الەم تاڭعاجايىپ ۋاقيعالار الدىندا تۇردى. ون سەگىز مىڭ عالام كۇرت ۇلكەيىپ، اقىل-ويعا سىيمايتىن، بەلگىسىز، شەكسىز الاساپىران كولەمگە جەتتى.
كەيىن، ءسوزدىڭ ءتۇيىنى بايلانىپ، شەجىرە اياقتالىپ، ۋاقيعا بىتكەندە، عارىش قايىرا ويماقتالعان نۇكتەگە اينالاتىنى، ءتۇزىلىپ كەلە جاتقان ەسەپتىڭ قۇرامىنان كورىندى. بۇكىل الەم، شايىردىڭ كىتابىنداعىداي، ءدان قاۋىزىنا سىيىپ كەتەدى. تەگىندە، جالىنى ءسونىپ، قىزۋى قايتىپ، سودان، جىلۋى تاۋسىلعان قۇبىلىستىڭ ارتىنان توزاڭى بۇرقىراپ كۇل، الدە قولامتا، مۇمكىن، قوزعا كومىلگەن شوق قالادى.
سىڭارىنان ايىرىلعان اققۋ — سۇڭقىلداپ قوشتاسۋ انىنە سالعان كۇيى، زادى، ەكپىندەي ۇشىپ شىرقاۋ كوككە كوتەرىلىپ الادى دا، ءوزىن زاۋ بيىكتەن تومەن قاراي تاستاپ جىبەرەدى. كوك اسپاندى قاق ايىرارداي تومەن قۇلديلاي سورعالاپ كەلىپ، قارا جەرگە اق توسىمەن بار پارمەنىمەن كەلىپ سوعىلادى، ءسويتىپ، قۇسادان با، الدە بايانسىز تىرشىلىكتىڭ قايعى-شەرى، ۋايىمىنان با — ايتەۋىر، سويى اسىل جاندىك قاپىلىستا، ارماندا ءتۇپسىز تۇڭعيىق زەڭگىر كوكتەن قۇلاپ ولەدى. The Universe تىنىسى اققۋدىڭ گاككۋ جىرىنا — اقىرعى جان ىشقىنىسىنا ۇقسايدى.
بىردە ول، ءبىر نۇكتەدەن شىققان الەم قايتا اينالىپ سول نۇكتەگە كەلەدى، دەدى توسەكتە، شاڭىراققا قاراپ جاتقان ويلى، قاپادار قالپى. سونىمەن قاتار، الاساپىران عالام ۇلعايىپ بارا جاتىپ، توسىن قالت توقتاپ، كەنەت — جارىلىپ كەتىپ، سوسىن، ءسونىپ، لەزدە ءوشىپ قالۋى دا مۇمكىن. ءبىراق، جۇلدىزدار شوعىرىن جاراتقان اداسقاق، جالقى قارا نوقات الدىندا نە بولدى، ونى ەشكىم بىلمەيدى، ادامزات اقىل-ويى ۋاقىت باستاۋىن تابا الا ما، تاپسا، تانۋعا قارىم-قابىلەتى جەتە مە، جوق پا، تياناقسىز ساۋال الەمدى شارلاپ، مۇمكىن، عارىشتى ارالاپ، كەزىپ جۇرەتىنى ەرتەدەن، ەسكى زامان، ەجەلگى داۋىردەن انىق ەدى. ءسارۋار بەس ميلليارد جىلدان سوڭ، كۇن دە جىلۋىن سارقىپ، تۇرعان بيىگىنەن قۇلايدى، دەدى.
— ەرتەدە، — دەدىم مەن، — راقات ەدى، قاشان ولەتىنىڭدى بىلمەيسىڭ، قانداي راقات.
— ءيا، تاماشا. اريستوتەل، جەر — الەمنىڭ كىندىگى، دەپ ءتۇسىندى، كىتابىندا
ونى قوزعالمايتىنداي ەتىپ، بەينەلەپ ايتقاندا، اعاش ماتكەگە تاڭىپ، بار جاراتىلىستىڭ ورتاسىنا بايلاپ تاستادى.
— ءسويتىپ، پتولەمەيدى اداستىردى.
— شاكىرتى جەر شارىن ءوزىن قوسقاندا سەگىز سفەرا قورشاپ تۇر دەگەن
قورىتىندىعا توقتادى، ەجەلگى گرەك زامانىنداعى بەلگىلى مەركۋريي، ۆەنەرا، مارس، يۋپيتەر، ساتۋرن جانە كۇن مەن اي توڭىرەكتەپ اينالىپ جۇرەدى دەپ ويلادى.
— جوق، سەگىزىنشى جولاق قوزعالمايتىن جۇلدىزدار كوكجيەگى بولاتىن.
— شىركەۋدىڭ پتولەمەي ۇستانىمىن قولداعانىن بىلەسىڭ بە؟
— بىلەمىن. ال بۇگىن يسلام ستيۆەن حوكينگتى قابىلداي الا ما؟
ءسارۋار توسىلىپ قالدى.
— ماسەلە سەن ءوزىڭ ءتاڭىر جاراتتىعا، قۇدايعا سەنەسىڭ بە، جوق، الدە
جاراتىلىستى سومداعان قۇدىرەتكە يلانبايسىڭ با، سوندا. نۇكتەگە دەيىن كىمنىڭ قۇزىرى ءجۇردى، نە ءبىزدى تىلسىمنان باسقاردى، سوعان قاراي سەنىڭ دە كوڭىل-كۇيىڭ وزگەرەدى. مەنىڭشە، بۇل — ءار ادامنىڭ جەكە تانىمىنداعى قاسىرەت، بەيمازا تولعاق، مىنا دۇنيە مىڭ قۇبىلادى، سەن دە بەرەكەسىز شىر اينالىپ، بۇكىل عارىشپەن قوسىلا، دوڭگەلەنە ءجۇزىپ، قانداي مۇراتقا جول تارتىپ، نەندەي ساپارعا اتتانعانىڭدى ەشقاشان ۇعا المايسىڭ.
— ءبىراق تا، شىركەۋ نيكولاي كوپەرنيكتىڭ جاسىرىن ۋاعىزداعان جۇيەسىنە
قارسى شىقتى عوي.
— ءيا، تەنتەك ويشىل تەڭ ورتاعا جارقىراتىپ كۇندى اكەلىپ قويدى.
ەسىڭدە شىعار، ءسارۋار كۇندى شەكسىز جاقسى كورەتىن....
— يوگانن كەپلەر مەن گاليلەو گاليلەي، — دەدى ول، — اريستوتەل مەن پتولەمەيدىڭ سوزىنە نۇكتە قويدى.
— سوسىن نيۋتون ويدى تۇيىندەپ، اشقان جاڭالىقتارىمەن زاڭدىلىقتاردى بەكىتتى.
— نيۋتون وتىرىك ايتتى، — دەدى كەنەت ءتۇسى وزگەرىپ، — تارتىلىس كۇشتەرىن
ابايسىزدا باسىنا قۇلاعان الما اعاشىنىڭ جەمىسى اشقان جوق، ولاردى الدىمەن، بارىنەن بۇرىن، زەڭبىرەكتەردەن العاش بايقاعان گاليلەو گاليلەي بولاتىن.
— دەسەك تە، نيۋتوننىڭ تارتىلىس كۇشى تۋرالى زاڭى ءبىر ورىندا
تاپجىلماي تۇرعان الەم تۇسىنىگىن جوققا شىعارادى. الايدا، ۇلعايىپ كەلە جاتقان عالام تۋرالى وي ەشكىمنىڭ باسىنا دا كەلگەن جوق.
— ءيا. ءبىراق، اريستوتەل دۇنيەنى قۇداي جاراتتى دەگەن يدەياعا قارسى
بولدى، ادامزات پەن قورشاعان ورتا ماڭگىلىك ءومىر سۇرگەن جانە سۇرە بەرمەك دەپ ەسەپتەدى.
— سوسىن، تاسقىندار مەن اپاتتار وركەنيەتتى دامۋدىڭ العاشقى
باسپالداقتارىنا قايتا اپارىپ تاستايدى، كەرى شەگىندىرەدى دەگەن تۇجىرىمعا كەلدى.
— ال، ءپالساپاشى يممانۋيل كانت 1781 جىلعى “انىق اقىل-وي سىنى”
اتتى ەڭبەگىندە بۇكىل الەم بەلگىلى ءبىر كەزدە پايدا بولدى ما جانە كەڭىستىكتە شەگى بار ما دەگەن ساۋالداردى شەشىلمەيتىن قايشىلىقتار — انتينوميالارعا جاتقىزدى. ياعني، بەلگىلى ءبىر ۋاقىتتا ءوز بەتىمەن جارالدى، نە قولدان جاسالدى، جوق، عالام — ماڭگىلىك، دەگەن ساۋالدارعا اقىل-وي جاۋاپ بەرە المايتىنىن قاداپ ايتتى.
ول بىردە الاپات جارىلىسقا دەيىن، ياعني سەنى كورگەن الاساپىران ساتكە
دەيىن ۋاقىتتىڭ ەشقانداي ماعىناسى جوق بولاتىن، دەدى. دەگەنمەن، 1929 جىلى ەدۆين حاببل كوك جۇزىنە قاي جاقتان — قاي تۇسىنا قاراساڭ دا، بارلىق جەر موينى قاشىق گاللاكتيكالار بىزدەن سۋىت الىستاپ، ۇزاپ بارا جاتقانىن اشتى، سوندىقتان مەن ىنجۋىمە قانشالىقتى عاشىق بولسام دا، ونىڭ قۇشاعىمنان سىتىلىپ شىعىپ، قۇتىلا سالا، دەدەكتەي قاشىپ، دۇربىمەن قاراعانداعى شالعاي جۇلدىزدارداي قارا نوقاتتانىپ، كىشىرەيىپ، سۋىپ بارا جاتقانىن اڭعارامىن، دەپ قالدى، دۇنيەدە بۇكىل زات، بار قۇبىلىس، تۇگەل جان بىر-بىرىنەن تۇبىندە، ءبارىبىر، تەگىس اجىرايدى.
قانداي كەسىم تۋرالى ايتىپ وتىر، تاعدىردىڭ سىيى ما، جازاسى ما، ونى تەك قۇداي عانا بىلەدى ەمەس پە: كەز كەلگەن پىكىر تۇراقتى زاڭعا اينالماس بۇرىن، دالەلسىز بولعاندىقتان، اۋەلى بولجام كۇيىندە، جورامال قالپىندا ءومىر سۇرەدى.
2.
ءىنجۋ، سەن، تەك سەن عانا ءسارۋاردىڭ قايدا ەكەنىن بىلەسىڭ. ول ۋاقىت كەشىپ، تۇنگى بار-رەستورانداردان باقىتىن ىزدەپ ءجۇرىپ، اياقاستىنان كوزدەن عايىپ بولدى. ىزدەنىس ونى ۇلكەن عيماراتتى توناۋعا الىپ كەلدى. ۇكىدەي جەلكىلدەپ، گۇلدەي قۇلپىرىپ، التىنداي جارقىراپ الدىمىزدان سەن كورىنگەندە، مۇمكىن، اسىل جاندى بەيمەزگىل ۋاقىت شايتان ءتۇرتتى. ەسىمدە، ول الماتى شاھارىن قاتتى ءسۇيدى. سوندىقتان، ونىڭ باسقا قالاعا ءبىرجولا كوشىپ كەتكەنىنە اسا سەنە قويمايمىن، ءسارۋار الماتىدا ءجۇر، الايدا، نەگە ەكەنى بەلگىسىز، ەكەۋىمىزبەن حابارلاسپايدى. مەنىڭشە، بەكزات ۇل، جىگىتتىڭ سۇلتانى ارامىزدان باقىتىن تاپپاي كەتتى. ءبىراق، ءىنجۋ، سەن، تەك سەن عانا ءسارۋاردىڭ قايدا ەكەنىن بىلەسىڭ.
تاستاق كوشەلەردە سەرۋەن قۇرىپ، جالعىزدىققا ۇرىنعان، قامىرىق قۇشاعىندا اداسىپ جۇرگەن ءبىز شالقالاپ جوعارى، كوك جۇزىنە تەلمىرىپ قارايمىز. اسپاندا، تىم بيىكتە اۋەلەپ التى اققۋ ءتىزىلىپ ۇشىپ بارادى. ۇشقان اققۋلار سوڭىنان ءىز قالادى. راس، ىزدەگەن ادام، قاشاندا، جوعالتىپ العان ءومىر ءىزىن بەيمازا جۇرەگىنەن تابادى.
كەنەت، اۆتوموبيل توقتاپ، سالون ەسىگى اشىلدى، سوسىن ماشينا ورنىنان باياۋ قوزعالدى. وزەگىمدى كۇيىنىش — وكىنىش كۇيىگى، عاشىقتىق دەرتى جاردى. تۇسىنبەيمىن، ءىنجۋ، دوستىعىمىز جاراسقان كەزدە، كوڭىلدى بۇزىپ، كوكىرەكتى ورتەپ سەن قايدان كەلدىڭ، العاش كورگەندە، ەكەۋىمىزدىڭ دە ويىمىزعا ۇرەي تۇنەدى. قاي جاقتان قىلاڭ بەردىڭ، ءسۇمبىل شاش، جازىق ماڭداي، پىستە مۇرىن، ويماق اۋىز، الما مويىن، لۇھلۋ يەك، قاز ومىراۋ — جان قالقا. ءسارۋار بۇلىڭعىرلانىپ كەنەت تۋعان قايعىدان اقىرىنداپ ءبىزدىڭ ءمولدىر ساعىنىشىمىزعا اينالدى. دۇنيەدە تىنىشتىقتىڭ ابسوليۋتتىك ەتالونى جوق. سوندىقتان، ەكى ءتۇرلى ۋاقىتتا جۇرگەن قوس ۋاقيعا كەڭىستىكتىڭ ءبىر جەرىندە ءوتتى مە، جوق پا، ونى ەشقاشان بىلە المايسىڭ.
سودان كەيىن، اراعا بىر-ەكى جىل تاستاپ، ءسارۋار ۇشتى-كۇيلى جوعالدى. ءبىراق، ءىنجۋ، سەن، تەك سەن عانا ءسارۋاردىڭ قايدا ەكەنىن بىلەسىڭ. ول بىردە الاپات جارىلىسقا دەيىن، ياعني سەنى كورگەن الاساپىران ساتكە دەيىن ۋاقىتتىڭ ەشقانداي ماعىناسى جوق بولاتىن، دەدى. نەگە ءسارۋار سونشالىقتى جازمىشىنا وشتەستى — ءالى كۇنگە شەيىن تۇسىنە الار ەمەسپىن.
باعىت-باعدارىنان اداسقان ءسارۋار قول سوزىم جەردە، مۇمكىن، ەلسىز دالادا، قاداۋ-قاداۋ ورناتىلعان، جەلى بايلانعان توق باعانالارىنداي كۇڭىرەنىپ، جالعىزدىق كوكىرەگىن قارس ايىرىپ، سودان سوڭ، زادى، تاڭنىڭ اتىسى، كەشتىڭ باتىسى ساياق جۇرگەن ءقادىرلى دوس، راسىندا، كەيبىر ءسات قامىرىقتان شارشايتىن سياقتى كورىنەدى. كۇبىرلەپ ەسىمىن اتاسام، ءدال ىرگەمنەن ادەمى قوڭىر داۋىسى كۇڭگىر-كۇڭگىر جاڭعىرىعىپ سويلەپ شىعا كەلەتىن ءتارىزدى كورىنەدى. ول قاراڭعى تۇندەردە ەكەۋىمىزدىڭ ءتىل قاتقان ءۇنىمىزدى كۇتىپ، ەلەگىزىپ ۇيىقتاي الماي، مازاسىزدانىپ، تورىعىپ، توقىراپ جۇرگەن سەكىلدى كورىنەدى.
قازىرگى شاقتا عالامدى ناق بەينەلەپ، ساندىق ورنەكتە انىق كەيىپتەگەن، دەربەس، ەگىز ەسەپ-قيساپ — قوس تانىم بار ەكەنى بەلگىلى: سالىستىرمالى جالپىلاما تەوريا مەن تاڭعاجايىپ كۆانتتىق مەحانيكا. ەكەۋى دە، تەگىندە، بيىك ورە، تەرەڭ اقىل-وي، اسقاق زياتكەرلىك كورىنىسى.
اۋەلگى تەوريا — ساندىق ورنەكتە، گراۆيتاسيالىق قارىم-قاتىناس پەن الەمنىڭ ءىرى ماسشتابتى قۇرىلىمىن مەيلىنشە ءدال بەينەلەپ، شەكسىز كەڭىستىكتەر عۇمىر كەشەتىن قاجەتتى شارتتى ناق تاۋىپ، قاراپايىم دا كۇردەلى تەڭدەۋىن اسەم قۇراستىرعان، ءپىل ساۋىرلى قارا جەردىڭ وزىندەي الىپ تۇجىرىمداما. ءبىراق، بۇل تانىم-تۇسىنىكتىڭ شاماسى — عارىشتىڭ ادام قارىم-قابىلەتى باقىلاپ-قاداعالاي الاتىن بولىگىن عانا — تۇسىندىرۋگە جەتەدى. الايدا، ەسەبىن ىقشامداپ، سانىن دوڭگەلەتىپ، ورتاق مانگە كەلتىرىپ، ۇعىمىن جەڭىلدەتىپ كورسەك: بىرنەشە كيلومەتردەن باستاپ، جيىرما ءنولدىڭ باسىن قۇراعان بىرلىك ارالىعىنداعى كەڭىستىكتى قامتيدى.
كۆانتتىق مەحانيكا ءپانى — سانتيمەتردىڭ ميلليوندىق بولىگىن ۇساقتاپ تاعى بولگەندە، ءبۇتىن سارقىتى، تەڭ جارتىنىڭ ءبىرىن زەرتتەيتىن، تەگى، كولەمى شاعىن، دەسەك تە، تەرەڭ ولشەمدى، جالپى، تانىمى جۇيرىك عىلىمي-كاتەگوريالىق جۇيە. وكىنىشكە قاراي، عالامات شەكسىزدىكتىڭ ءوزارا ءتىل تابىسا الماعان سىڭارىن، جۇپسىز، پارسىز ەكى تارابىن تانىپ، سىرىن اشۋعا، جۇمباعىن شەشىپ، ساندىق ورنەگىن فورمۋلادا تۇزۋگە، قادىر-قاسيەتتەرىن ايشىقتاپ كەيىپتەۋگە تالپىنعان نيەتتىڭ ەشقانداي بولاشاعى جوق، سەبەبى، ەكەۋىن قوسىپ، بىرىكتىرىپ قاراستىرعاندا، ءبىر ۋاقىت ولشەمىندە، تەڭدەۋلەر، نەگە ەكەنى بەلگىسىز، قالىپتاسقان جالپى فيزيكالىق زاڭدىلىقتاردان جاڭىلىسادى.
ىزدەنىستەردىڭ ماقساتى — ورنەك قۇرعاندا، ەكى تاراپتىڭ قاراما-قارسىلىعىن، كەرىسىنشە، توقايلاستىرىپ، قايشىلىعىن جويىپ، تابيعاتىنان ورتاق نەگىز، جاراستىق، سايكەستىك تاۋىپ، ءسويتىپ، گراۆيتاسيانىڭ كۆانتىق تەورياسىن قالىپتاستىرۋ ەدى. ەگەر ءبىز بۇكىل الەم كەزدەيسوق ەمەس، بەلگىلى ءبىر زاڭدىلىقتان جارالىپ، قالىپتاسىپ، دامىپ كەلەدى دەسەك، وندا ءوز الدىنا دەربەس قوس تەوريانى بۇكىل الەمدەگى بار قۇبىلىستى تۇتاس قامتىپ، بىردەي سيپاتتاي الاتىن تولىق ءبىرىڭعاي تەورياعا بىرىكتىرۋىمىزگە مۇمكىندىك تۋادى. ءبىراق، جاسامپاز، ىزگى ويلارىمىز، وكىنىشكە قاراي، ءبىر كۇردەلى ءھام ۇلى كەدەرگىگە تىرەلىپ تۇر: ەگەر ءبىرىڭعاي تەوريا، شىنىمەن، بار بولسا، سونىمەن قاتار، ءبىزدىڭ باقىلاۋلارىمىزعا، مۇمكىن، ىس-ارەكەتتەرىمىزگە وڭ نەمەسە تەرىس اسەر ەتەتىن قۇبىلىس بولسا، وندا، كەشىرىڭىز، قالايشا ءبىز، تەگىندە، ءبىرىڭعاي تەوريانىڭ اياسىندا، ءبۇتىن جارتىسى، تولىقتىڭ بولىگى بولا تۇرىپ، ءتول زەرتتەۋلەرىمىزدىڭ ناتيجەسىن ونىڭ ناق وزىنەن تابا الامىز. قالايشا بۇل تەوريا، ءبىزدىڭ وبەكتىمىز، تەگىندە، سۋبەكتىگە اينالىپ، ءوزىمىز جايىنداعى تانىمدىق ىزدەنىستەرىمىزدىڭ ءتۇيىنىن شەشىپ، قورىتىندىسىن شىعارادى.
ءيا، ءقايتىپ، الدىن الا ءبىزدىڭ تابىسقا جەتەتىنىمىزگە وڭ جاعداي تۋعىزا الادى. تاپ سونداي ىس-ارەكەت نەلىكتەن ءبىزدى جالعان پاسساج، كەشەندى قاتەلىك، جيىنتىق تەرىس سانعا اكەپ سوقتىرمايدى. ءتىپتى، ەشقانداي مۇراتقا جەتە الماۋىمىز دا مۇمكىن ەمەس پە. دەسەك تە، ۇزاق جۇرگەن تابيعي ىرىكتەلۋ، سۇرىپتالۋ بارىسىندا، ءپىل ساۋىرلى قارا جەر بەتىنە كەڭ تاراعان ماقۇلىقتار ىشىندە اقىل-وي يەسى، كەمەل زيات، بيىك ورە، دامىعان ساناسى بار سۇڭعىلا جاراتىلىس تەك ادام عانا دەگەن جاسىق الدانىش، ءالسىز ءۇمىت، قۇدايعا تاۋبە، كوكسەگەن ارمانىمىزعا جەتەلەيتىن بىردە نىق سەنىم، بىردە ەكىۇداي كوڭىل ءتارىزدى كورىنەدى. الايدا، بۇكىل الەمنىڭ تولىق ءبىرىڭعاي تەورياسىن تابۋ جولىنداعى ىزدەنىس ءبىزدىڭ قۇرىپ كەتپەۋىمىزگە ەشقانداي كەپىل بولا المايدى. ياعني، ىزدەپ جۇرگەن تەوريامىزدىڭ قورعانسىز تىرشىلىك، تاڭعاجايىپ جارىق دۇنيەگە ەشقانداي قاتىسى جوق. ءاۋ باستاعى مۇرات پەندە ريزىعىن تاۋىپ، بۇيرىعىن كۇتكەن عۇمىرىنداعى كۇردەلى تۇسىنىك ماسەلەسى، بۇكىل الەمدى تولىق سيپاتتاپ شىعۋ عانا بولاتىن.
سوندىقتان، تاۋلى قىرات، تاستى جوتا سىلەمىنەن كوز جازىپ، جالعىز اياق سۇرلەۋىنەن توسىن اداسقان ەسكى دوس ەلىن تاۋىپ، ۇيىنە قايتا اينالىپ سوقسا دا، وشاق قاسىنان انا، وت باسىنان سۇيگەن جار كورمەيدى، شاڭىراعىنا قايعى قاپتايدى، سەبەبى، تارقامايتىن قۋانىش، تاۋسىلمايتىن قىزىق جوق، دۇنيەجارىقتىڭ كەمدىگى ايتىلعان كيىز كىتاپتار ۋاقىت سانا تۇسىنىگى ەكەنىن راستايدى. شىنىمەن، ارمان-تىلەگىمىز ورىندالىپ، ويىمىز جۇزەگە اسا قالعان جاعدايدا، ۋاقىتتىڭ بىزگە كەرەگى شامالى.
ونىڭ تەڭدىگىنە ءۇمىت ارتقان ەسەبى تەرىس بوپ شىقتى. بۇكىل الەمنىڭ تولىق ءبىرىڭعاي تەورياسىن ادامزات اقىل-ويى تابا الا ما، ءىنجۋ، بىلمەيمىن. مەنىڭشە، ادام باقىتى وسى ىزدەنىستەردىڭ ناتيجەسىنە بايلانىستى سياقتى كورىنەدى، ءبىز، قالاي دەسەك تە، ادامزاتتىڭ تاعدىر-تالايى كىمنىڭ، نەنىڭ قولىندا ەكەنىن بىلەتىن بولامىز: باقىتتى ىزدەۋىمىز كەرەك پە، جوق پا، مۇمكىن، قاجەت تە ەمەس شىعار، ءبىزدىڭ ەڭبەگىمىز ەش، تۇزىمىز سور، كۇش-قايراتىمىز ءراسۋا بولىپ كەتپەي مە، ونى ءبىر قۇدايعا تاپسىردىق.
ءقازىر اياۋلى جان، ابىز تۇلعانىڭ جاڭا وسيەتىن ءبارى ۇمىتتى. ەل ەسىندە، ءتىپتى، ءسارۋاردىڭ ءوزى بار ما دەسەڭىزشى، كەيدە، نەگە ەكەنى بەلگىسىز، كوز الدىما ونىڭ عۇمىر كەشكەن جىلدارى ءتىزىلىپ كەلە قالادى، ءبىراق، ول دۇنيە سالدى، قازا تاپتى دەگەن سۋىق حاباردى ەستىگەن ەمەسپىز، امان-ەسەن، ءتىرى ءجۇر دەگەن ءسوز دە قۇلاققا شالىنعان جوق. ءبىز ءسارۋاردى ەشقاشان ىزدەپ تاپپايتىن دا شىعارمىز... قارا قۇردىمعا ءتۇسىپ كەتكەندەي ءىز-تۇسسىز، ءىزىم-قايىم جوعالدى. كورىنبەيتىن قارا ماتەريانىڭ اۋىر سالماعى جاس اسپان دەنەلەرىن وزىنە كۇشپەن تارتىپ، جولىنان قالدىرىپ، مۇراتىنان اداستىرعاندا، ءسارۋاردى تابۋ مۇمكىن ەمەستىگىن انىق، ناقتىلى تۇسىنەمىز.
زادىندا، عالامنىڭ تولىق ءبىرىڭعاي تەورياسىن بەينەلەيتىن ەسەپتى اڭساپ شارق ۇرعان ادام بالاسى ونى ەشقاشان تابا المايدى، سەبەبى دۇنيەدە مۇنداي امبەباپ فورمۋلا جوق.
الماتى، 2007-2017 جىلدار
You Might Also Like
