InfoHub Logo

عارىش الەمىندەگى قازاق جۇلدىزى ءسوندى: تالعات مۇسابايەۆ ومىردەن ءوتتى

كوپشىلىكتىڭ جۇرەگىندە ماڭگى ساقتالاتىن، قازاقستاننىڭ ماقتانىشىنا اينالعان عارىشكەر، حالىق قاھارمانى، قوعام قايراتكەرى تالعات امانگەلدى ۇلى مۇسابايەۆ 74 جاسىندا ومىردەن ءوتتى. بۇل اۋىر حاباردى مەملەكەت باسشىسى قاسىم-جومارت توقايەۆ تا تەرەڭ كۇيزەلىسپەن قابىلداپ، مارقۇمنىڭ وتباسىنا، تۋعان-تۋىستارىنا كوڭىل ايتتى.

پرەزيدەنت ءوز جەدەلحاتىندا تالعات مۇسابايەۆتى عارىشتى ءۇش رەت باعىندىرعان ەرەكشە ەرلىگىمەن ەلدىڭ مەرەيىن ۇستەم ەتكەن، ناعىز باتىر تۇلعا رەتىندە سيپاتتاپ:

«وتاندىق اەروعارىش سالاسىنىڭ دامۋىنا ولشەۋسىز ۇلەس قوسقان، كاسىبي بىلىگىمەن، ادامي بولمىسىمەن حالىقتىڭ زور قۇرمەتىنە يە بولعان تالعات امانگەلدى ۇلىنىڭ جارقىن بەينەسى ەل جادىندا ماڭگى ساقتالادى»، – دەپ اتاپ ءوتتى.

تالعات مۇسابايەۆ – قازاقتان شىققان ساناۋلى عارىشكەرلەردىڭ ءبىرى عانا ەمەس، حالىقارالىق دەڭگەيدە مويىندالعان ازامات. ول 1994، 1998 جانە 2001 جىلدارى عارىشقا ساپار شەگىپ، بارلىعى 341 كۇندى وربيتادا وتكىزگەن. ونىڭ ىشىندە اشىق عارىشقا 7 رەت شىعىپ، ادامزات تاريحىندا وزىندىك ءىز قالدىردى.

عارىشكەرلىك قىزمەتىنەن كەيىن تالعات مۇسابايەۆ قازاقستاننىڭ اەروعارىش سالاسىندا باسشىلىق قىزمەتتەر اتقارىپ، سەنات دەپۋتاتى، ۇلتتىق جوبالاردىڭ باستاماشىسى رەتىندە ەل دامۋىنا ءوز ۇلەسىن قوستى.

ونىڭ ءومىر جولى – جاس ۇرپاققا جىگەر مەن سەنىم سىيلايتىن، تاباندىلىق پەن وتانسۇيگىشتىكتىڭ سيمۆولى. تالعات مۇسابايەۆتىڭ قازاسى – كۇللى ەل ءۇشىن ورنى تولماس قايعى.
يمانى جولداس، رۋحى پەيىشتە بولعاي.