InfoHub Logo

تاۋەلسىز ەلدىڭ تىرەگى - ءبىلىمدى ۇرپاق. ءقازىر ءبىلىمدىنىڭ العا ءتۇسىپ، بايگەدەن وزىپ كەلەتىن زامانى. قازاقتىڭ كەمەڭگەرى احمەت بايتۇرسىنوۆ: «ەلدى تۇزەتۋدى بالا وقىتۋ ءىسىن تۇزەتۋدەن باستاۋ كەرەك»، - دەگەن. ءاربىر مەملەكەتتىڭ وسىپ-وركەندەۋىنىڭ، باسەكەگە قابىلەتتى بولۋىنىڭ ەڭ باستى وشاعى ۇستاز بەرگەن ءبىلىم ەكەنى ءسوزسىز. سوندىقتان دا دامۋدىڭ ەڭ بيىك كوكجيەگىنەن كورىنگىسى كەلەتىن كەز كەلگەن مەملەكەت الدىمەن، ءبىلىم بەرۋ سالاسىن جولعا قويىپ، ساپاسىن كوتەرۋدى ماقسات ەتەدى. وسى ماقساتتا ف.دوسىموۆا اتىنداعى №12 ورتا مەكتەپتە «وقىتۋ باعدارلاماسى بويىنشا ساباقتى ءتيىمدى جوسپارلاۋ» تاقىرىبىندا قالالىق تاجىريبە الماسۋ سەمينارى ءوتتى. سەميناردىڭ  ماقساتى: وقۋ ماقساتتارىن جۇزەگە  اسىرۋدىڭ ءتيىمدى ادىس-تاسىلدەرىن كورسەتە وتىرىپ، جاڭارتىلعان ءبىلىم بەرۋ مازمۇنىنداعى ساباقتى ءتيىمدى جوسپارلاۋ جولدارى.

سەمينارعا پەداگوگيكالىق شەبەرلىك ورتالىعىنىڭ ديرەكتورى ايدا نۇرجانوۆا جانە №13، №17، №18، №20، №24 قالا مەكتەپتەرىنىڭ مۇعالىمدەرى قاتىستى. باعدارلاماعا سايكەس ۇيىمداستىرۋ ءبولىمى، كورمە، پراكتيكالىق ءبولىم جانە قورىتىندى بولىمدەرى كەزەگىمەن جۇرگىزىلدى. ۇيىمداستىرۋ كەزەڭىندە مەكتەپ ديرەكتورى ەربول ەرمەك ۇلى العى ءسوز سويلەپ، وقۋ ءىسىنىڭ مەڭگەرۋشىلەرى رايا سانات قىزى مەن عالىمجان كاليبەك ۇلى كەلگەن قوناقتار مەن ۇستازدارعا ساتتىلىك تىلەدى.

شارا ودان ءارى الماش شاجەنوۆانىڭ جەتەكشىلىگىمەن «ارماندار ورىندالادى، ماقساتىڭ ايقىن بولسا» تاقىرىبىندا ترەنينگپەن جالعاسىن تاپتى. بىلىكتى ۇستاز سەنەكا ءلۋسييدىڭ «وزگەلەردى ۇيرەتە ءجۇرىپ، ءبىز ءوزىمىز دە ۇيرەنەمىز» دەگەن قاناتتى ءسوزىن باسشىلىققا الا وتىرىپ، «3 تىلەك»، «ەكسپەريمەنت»، «بيىكتىك» جاتتىعۋلارى ارقىلى قىزىقتى ترەنينگ وتكىزىپ، ارىپتەستەرىن ءبىر سەرپىلتىپ الدى.

ودان كەيىن كەلگەن قوناقتار مايرا قاپانوۆانىڭ 1-سىنىپقا وتكىزگەن «ۇلتتىق تاعامدار. ءماتىن»، ايگەرىم تاجىعالييەۆانىڭاعىلشىن پانىنەن «My favorite sport» جانە عالىمجان ۋتەگەنوۆتىڭ تاريح پانىنەن «ۆەليكيە گەوگرافيچەسكيە وتكرىتيا» تاقىرىپتارىنداعى اشىق ساباقتارىنا قاتىسىپ تاجىريبە الماسسا، دينارا بيسەنوۆانىڭ «وقىتۋدى جاقسارتۋدىڭ ىقپالدى قارۋى – كەرى بايلانىس» جانە ليۋبوۆ بۋشانىڭ «كريتەريالدى باعالاۋدىڭ تيىمدىلىگى» تاقىرىبىنداعى باياندامالارىن تىڭداپ، ءوز ءىس تاجىريبەلەرىنە جاڭارتىلعان باعدارلاما اياسىندا مول مالىمەت الدى. سونىمەن قاتار، سەميناردا زۋلفيا بيسەنعالييەۆانىڭ ۇيىمداستىرۋىمەن «ىس-ارەكەتتى زەرتتەۋ» جانە زويا ماناپوۆانىڭ جەتەكشىلىگىمەن «ءتيىمدى جوسپارلاۋ – ساپالى وقىتۋ نەگىزى» تاقىرىپتارىندا كوۋچينگتەر قوناقتار نازارىنا ۇسىنىلىپ، ەركىن تۇردە اڭگىمە ءوربىدى.

سەمينار سوڭىندا ۇستازدارىمىز دوڭگەلەك ۇستەلدە باس قوستى. ولار ساباقتى ءتيىمدى جوسپارلاۋدىڭ ادىس-تاسىلدەرىن ورتاعا سالىپ، جۇرگىزىلگەن جۇمىستارعا كەرى بايلانىستار بەردى. وتكىزىلگەن جۇمىستاردىڭ ءتيىمدى، شىنايى بولعاندىعىن، الداعى ۋاقىتتا ءوز جۇمىستارىنان كورىنىس تاباتىندارىن ايتىپ، ءبىر-بىرىنىڭ كەلەشەك جۇمىستارىنا شىعارماشىلىق تابىس تىلەپ، مەكتەپ ۇجىمىنا العىستارىن ءبىلدىردى.

شارا سوڭى ءداستۇرلى تۇردە «كوفە-برەيكپەن» اياقتالدى.

اقسانا جۇمابايەۆا، ف.دوسىموۆا اتىنداعى №12 ورتا مەكتەپتىڭ قازاق ءتىلى مەن ادەبيەتى ءپانىنىڭ ءمۇعالىمى

---