InfoHub Logo

جاندىكتەر تۋرالى جۇمباقتار
بار ەكەن ءبىر ماقۇلىق ۇننان مايدا،
ءوز باسىن ايدايدى ەكەن قيىن جايعا،
ۇستاساق ۇگىتىلىپ جوعالادى،
دامىلداپ وتىرمايدى ەشبىر جايعا.
/كوبەلەك/.

گۇل ۇشىپ گۇلگە قونادى،
گۇل باقشام گۇلگە تولادى.
/كوبەلەك/.

ءشيدىم، ءشيدىم، ءشيدىم قۇس،
شي باسىنا قونعان قۇس.
قارقارالى قارا قۇس،
حان باسىنا قونعان قۇس.
/شىبىن/.

ءيىسشىل - يت ەمەس،
ۇشادى - قۇس ەمەس.
/شىبىن/.

بار جۇمىسى ەرمەگى.
تالماي قانات قاعادى.
ەڭبەكتى قوش كورمەيدى،
جات ىدىستى باعادى.
/شىبىن/.

قىس كەزىندە ۇيىقتاپ جاتار،
جاز مەزگىلى دۋمان اشار.
/شىبىن/.

قاراباي اتتان جىعىلدى،
حالىق سوعان جيىلدى.
/تۇكىرىككە جيىلعان شىبىن/.

اسپاندا اق سارى قۇس شۋ سالادى،
جابىسىپ تاقىر جەردەن سۋ الادى.
ادامنان سۋ العان تىم وزگەشە
دۋىلداتىپ دەنەڭە ۋ سالادى.
/بەزگەك ماساسى/.

ءوزىم ءۇشىن سەنى ۇرام،
سەن ءۇشىن ءوزىمدى ۇرام،
سەن ءۇشىن ءوزىمدى ۇرسام -
اعادى مەنىڭ قانىم،
جارىلادى سەنىڭ قارنىڭ.
/ماسا/.

ءبىر قۇس بار ۇشىپ ءجۇرىپ ءان سالادى،
اركىمگە قوناق بولىپ ءبىر بارادى.
بارلىعى ماقۇلىقتىڭ ىعىر بولىپ،
داۋىسىن ەستىگەندەر زار قاعادى.
/ماسا/.

اسپاندا قىران سارى كىسى الادى،
بولعاندا كەشكە جاقىن ءان سالادى.
قۇدايدىڭ قۇدىرەتىنە قاراپ تۇرساڭ،
تۇتىكپەن تاقىر جەردەن سۋ الادى.
/ماسا/.

ءبىر عاجاپ ءتورت اياقتى، قۇس قاناتتى،
كورەدى كۇندىك جەردەن ادامزاتتى.
قولىندا قىلدان نازىك كۇرزىسى بار،
ياپىراي، تيگەن جەرى تاستان قاتتى.
/ماسا/.

ات باستى،
ارقار ءمۇيىزدى،
ءبورى كەۋدەلى،
بوكەن ساندى،
قوس قاناتتى،
قۇمىرسقا ءىزدى،
بوتا تىرسەكتى.
/شەگىرتكە/.

تايقى ماڭدايلى،
سيىر مۇرىندى،
بالىق سىرتتى،
جىلان باۋىرلى،
ەسەك ساۋىرلى.
/شەگىرتكە/.

يت باستى،
قوشقار ءمۇيىزدى،
بورسىق كەۋدەلى،
بوكەن ساندى.
/شەگىرتكە/.

ايدار اۋىزدى،
قويان قۇلاقتى.
بوكەن ساندى،
قىلىش قۇيرىقتى.
/شەگىرتكە/.

جاز بويى اندەتكەن،
كۇز بولعان سوڭ ءسان كەتكەن.
/شەگىرتكە/.

ءبىر ماقۇلىق بار قازىق اياق،
قارعىپ - قارعىپ تۇسەدى تازىداي - اق.
/شەگىرتكە/.

بار ەدى ءبىر جۇمباعىم جۇرگەن سايدا،
قولىندا قىلىشى جوق، ەكى نايزا.
قارىندى ەكى نايزا بولعانمەنەن
قىلىش پەن اي بالتاداي بولماق قايدا.
/بۇزاۋباس/.

ءبىز جازدىق اۋلىم قونعان تەكشەسىنە،
ەتىكتىڭ جەز قاقتىردىم وكشەسىنە.
ايۋاندا ءتورت اياقتى ءبىر نارسە بار،
بورەنەسىن بايلاعان بوكسەسىنە.
/ينەلىك/.

انا تاۋدىڭ باسىندا ۇيىعان قاتىق،
ول قاتىقتى كورمەيدى ءدامىن تارتىپ،
ءدامىن تاتقان قالادى سەسپەي قاتىپ.
/قارا قۇرت/.

ءبىر ماقۇلىق ايدالادا قورعان سالعان،
ازاپتى اجالدىمەن سوعان بارعان.
مەن ەمەس بۇل جۇمىستى ايتىپ جۇرگەن،
بۇرىنعى ازامات ەر سودان قالعان.
/قارا قۇرت/.

عاجايىپ ءبىر نارسە بار قاتقان تەرى،
ءوزىنىڭ قالىڭ توعاي جاتقان جەرى.
ءبىر كۇنى اشتان ولمەي، توقتان ولەر،
جىگىتتىڭ مۇنى تابار كەمەڭگەرى.
/تۇيە كەنە/.

قارايىپ ۇشتى قارعاداي،
بارماعان جەرى قالمادى - اي.
جەرگە ءتۇستى، ءىن قازدى،
اياعىمەن تىرمالاي.
/قوڭىز/.

ۇشقاندا ولەڭ ايتادى،
قونعاندا جەر قازادى.
مۇنى دا ويلاپ كورىڭىز،
شەشۋىن كىم تابادى؟
/قوڭىز/.

اۋەدە ۇشىپ جۇرگەن اەروپلان ەمەس، قۇس ەمەس،
ارقاسىنا بايلاعانى ىرىمشىك ەمەس، قۇرت ەمەس.
باۋىرعا بارىپ ءىن قازادى،
قاسقىر ەمەس، تۇلكى ەمەس.
/قوڭىز/،

قارايىپ ۇشقانمەنەن قارعا ەمەس،
ءىن قازعانمەنەن تۇلكى ەمەس.
ارقاسىنداعى بوقشاسى،
جيناعانمەن مۇلكى ەمەس.
/قارا قوڭىز/.

ءبىر نارسە الدى بيىك، ارتى الاسا،
دوپ يلەر كەشكە دەيىن ءبىر تاماشا.
مىلتىعىن اتايىن دەپ وڭتايلانار،
وزىنە ايتقان سىيى ۇناماسا.
/ساسىق قوڭىز/.

كوردىڭ بە ءبىر نارسە تۇر ءدوپ - دوڭگەلەك،
از تۇرسا سول جەرىندە بولادى كوك.
جەرىندە ءبىر كۇن تۇرعان ءۇش كۇن تۇرسا،
وزىندەي كەتەدى ەكەن ءۇش ەسە بوپ.
/كەنە/.

كىشكەنە عانا تۇيمە تاس،
اتان تۇيە تارتا الماس.
/كەنە/.

اسپاننان ۇشىپ ءتۇستى جاتقان تەرى،
قالىڭ توعاي نۋ جىنىس جاتقان جەرى.
/كەنە/.

ۇزىن - ۇزىن ۇزارداي،
ۇزىننان اققان سۋلارداي.
اعاش اتقا مىنگىزىپ،
ۇزارتىپ قويعان مۇنارداي.
/ورمەكشى/.

ءبىر نارسە ءوزى مولدا، ءوزى جورعا،
قۇرادى جىبەك اۋدى وڭ مەن سولعا.
تارتقاندا ماشيناسىن وڭ مەن سولعا،
تابادى قاراجاتىن سوندا زورعا.
/ورمەكشى/.

دۇنيەدە ءبىر كەمپىر بار ءتىپتى كارى،
ءجىپ توگىپ، ورمەك قۇرىپ، توقىر ءشالى.
الادى ايلامەنەن الا بۇركىت،
تابىڭدار نەمەنە ەكەن مۇنىڭ ءمانى.
/ورمەكشى/.

شيديگەن ۇزىن سيراعى،
تاستاي كەرەڭ قۇلاعى.
ءسويتىپ ءجۇرىپ كوپ جەرگە
اسپالى تورلار قۇرادى.
/ورمەكشى/.

ەڭبەكشى ءۇي ىشىندە مەكەندەگەن،
سىم ارقان دۇنيەگە جەتەر دەگەن.
قارقارا قارا قۇسشا ءتۇرىن جايىپ،
دۇنيەدەن ۋايىمسىز وتەم دەگەن.
/ورمەكشى/.

ارقاسى دومالاق،
اياعى ۇزىن.
/ورمەكشى/.

ەكى باسى جۇدىرىقتاي،
ورتاسى قىلدىرىقتاي.
/قۇمىرسقا/.

قاتار - قاتار قارا نار،
اسپانمەنەن بارا بار،
الدى بيىك، ارتى جار.
/قۇمىرسقا/.

ءبىر شاھار ءدوپ - دوڭگەلەك ۇلكەن ۇيدەي،
ىشىندە كارى - جاسى ءبارى بىردەي.
كارىسىن دە جاسىن دا ءارقاشان ايىرماسىن،
تاڭ قالعان قانداي دەرەك مۇنى بىلمەي.
/قۇمىرسقا/.

اتتانعان ءبىر شاھارعا قىرىق مىڭ قوسىن،
قولىندا ءوزى جاياۋ، نەسى بولسىن.
قولىندا ەش نارسەسى بولماسا دا،
وزىنە تاۋىپ الار نەسىبەسىن.
/قۇمىرسقا/.

بەلەڭ - بەلەڭ، بەلەڭ ات،
بەلى نازىك كۇرەڭ ات.
تاۋعا مىنسە تايماس ات،
تالاۋ تيسە ولمەس ات.
/قۇمىرسقا/.

بەينەتقور كوپشىلىكتە كوردىم حالىق،
كۇنىندە ءبىر وتىرماس دامىل الىپ،
وزىنەن اۋىر جۇكتى كوتەرەدى،
ۇيىندە جاتىپ جەيدى راحاتتانىپ.
/قۇمىرسقا/.

ءبىر بالۋان ءوزى كۇشتى، قايراتى مول،
وزىنەن ۇلكەن زاتتى كوتەرەر ول.
مەيلى قىر، مەيلى جوتا، مەيلى توبە،
قايقاڭداپ اسا بەرەر بارىنەن دە ول.
/قۇمىرسقا/.

ايدالادا ءبىر بازار.
/قۇمىرسقانىڭ يلەۋى/.

ءبىر ەلەۋىش جانىم بار،
كوتەرە الساڭ ءبارىن ال.
/قۇمىرسقانىڭ يلەۋى/.

تىرۋ - تىرۋ تىرنالار،
تاۋعا قاراي جورعالار.
/ارا/.

الپىس ءتىستى ايداھار،
ەشقايدا قادام باسپايدى.
قوزعاماساڭ جاتادى،
ەشتەڭەدەن ساسپايدى.
اعاشتان تاماق جەيدى ەكەن،
جۇتپاي شايناپ تاستايدى.
/ارا/.

ءبىر نارسە ءوزى نازىك تىم - اق سەرگەك،
قورقادى بالا - شاعا، ايەل، ەركەك،
ءوزىنىڭ قانى ادال، ەتى ارام،
مىلتىقسىز، يا قىلىشسىز ۇستايدى ەپتەپ.
/ارا/.

بىرەۋگە نايزا تۇيرەيدى،
ءوزى دە سودان كۇيرەيدى.
/ارا/.

بيىك - بيىك تاۋ بولار،
قارشىعالار ۇيالار،
ەتى ارام بولسا دا، سورپاسى ادال،
ول نە بولار، بالالار؟
/ارانىڭ بالى/.

شاتىراش - شاتىراش تاۋ بولار،
كوگەرشىندەر ۇيالار،
سورپاسى ادال بولسا دا، ەتى ارام،
ول نە بولار؟
/ارانىڭ بالى/.

ءبىر ۇيادا ءجۇز بولەك ءۇي.
/ارانىڭ ۇياسى/.

كوك توبەدە كوپ بولدى،
توپىراق جالاپ تويمايدى،
نەسىبەسى نەدەن جوق بولدى.
جەتەۋ ەدى بەدەرى،
ون ءتورت ەدى اياعى،
بالالىقتان ايتىپ جۇرگەن
جۇمباق ەدى باياعى.
/ەسەك قۇرت/.

دومالاق تاۋدىڭ باسىندا
توقتى قوشقار وينايدى.
/بيت/.

كىشكەنە عانا بويى بار،
ادام جەيتىن ويى بار.
/بيت، بۇرگە/.

ءبىر ماقۇلىق موينى جۋان، تىرسەگى ۇزىن،
تىكپەسە ءوزى ەتىك، ساقتار ءبىزىن.
تاعى دا ىسكە ىڭعايلى قايشىسى بار،
ءىس تىگىپ كورگەن دە ەمەس ەش قىزىعىن.
/شايان/.

ءبىر ماقۇلىق كەلە جاتىر ماڭ - ماڭ باسىپ،
قۇتىلماس كوزگە تۇسسە جولدان قاشىپ.
بۇل جەردە ونى تابار ەش ادام جوق،
تاپپاسا ۇلكەن مولدا كىتاپ اشىپ.
/بيت/.

جاپىراق جەپ سىلەكەي شىعارادى،
سىلەكەي جاسىن شىعارادى.
/جىبەك قۇرتى/.

بەكىنگەن ءبىر تاۋ تەكە تۇشالاۋ ۇيگە،
قۇدايىم ونى سالدى مۇنداي كۇيگە.
كۇن شىقسا جاتادى سالقىن ۇيدە،
كۇن جاۋعاندا كەتەدى جاپان تۇزگە.
/ۇلۋ/.