جانىبەكتىڭ تىلەنشىگە باتاسى
قازىرگى ارقالىق، ەدىرەي تاۋلارىنىڭ ءوڭىرى كەرەي رۋىنىڭ اتا قونىسى بولعان دەسەدى. كەيىننەن بۇل جەرلەرگە اقتابان-شۇبىرىندىنىڭ كەزىندە قاراتاۋ جاقتان كەلگەن ارعىن مەيرام سوپىنىڭ، ونىڭ ىشىندە قاراكەسەك قازىبەك ءبيدىڭ بالالارى تۇراقتايدى. قاراكەسەك بالالارى از اتا كەرەيلەرگە قىر كورسەتىپ، كوپتىك جاساي باستاعان سوڭ، ەل يەسى جانىبەك باتىر: «ۇستىمىزگە ىرگەلى ەل، جۋان اتانىڭ بالالارى كەلىپ قالدى. مەن ءتىرى تۇرعاندا ەشتەمە جاساي قويماعانىمەن، كۇنى ەرتەڭ اجال جەتىپ، ولاي-بۇلاي بولىپ كەتسەم، بۇل جەردى كەرەيگە قونىس ەتە قويماس»، — دەپ ويلادى دا، جەر شولىپ، ءبىراق ارەكەت، ىزدەنىس جاساعاننان كەيىن قونىس اۋدارادى.
جاڭا قونىسقا ەلىن جايعاستىرىپ بولعان سوڭ، كەرەيدىڭ باستى ادامدارىن قاسىنا ەرتىپ، بۇرىن-سوڭدى اداسقان، اۋىسقان مالدارىن قايتارىپ الۋ ءۇشىن جانىبەك باتىر قاراكەسەك ەلىنە كەلەدى.
قاراكەسەكتەر قايمىقسا دا، سىيلاسا دا، ايتەۋىر باتىردىڭ الدىنان كولدەنەڭ شىقپايدى، قارسى كەلمەيدى. جانىبەك بولسا ءۇي تىككىزىپ، سويىس سويعىزىپ، ءوز الدىنا بەيمارال جاتا بەرەدى. سالەم بەرە كەلگەن ادامدارمەن شەشىلە سويلەسە دە قويمايدى. ءوزىنىڭ دەگەنى بولماسا، ايگىلى «ءبىتىم جوق» دەگەن شەشىمىن ءبىر-اق ايتادى دا، دەگەنىن ىستەتەدى. ءسويتىپ، وسىلايشا قاراكەسەكتەر توقىراڭقىراپ تۇرعان كەزدە قاز داۋىستى قازىبەك ءبيدىڭ نەمەرەسى تىلەنشى كەلەدى. جانىبەك تىلەنشىنىڭ سالەمىن الماق تۇگىلى، كوز قىرىن دا سالمايدى. باسىندا جاستىق، استىندا
كوپشىك، قيسايىپ، قىرىن قاراعان قالپىندا جاتا بەرەدى.
سوندا تىلەنشى تاماعان ءبىر كەرنەپ الىپ:
— اپىر-اي! «تاكاپپاردىڭ ءتاۋباسى قابىل بولمايدى، كەۋدەسى كورگە سىيمايدى» دەۋشى ەدى، مەيرامنىڭ اتالى ءتورت بالاسىنىڭ بىرىنەن شىقساڭ، بۇيتپەس ەدىڭ. ءبىرىمىزدىڭ كۇڭنەن، ەكىنشىمىزدىڭ قۇلدان تۋعانىمىز-اۋ، تىم بولماسا دۇرىستاپ سالەمدەسە الماعاندىعىمىز، — دەپتى.
اقىرىنداپ كەلىپ ءبىر بۇيىردەن وڭدىرماي اتقان مىنالارى كىم؟ — دەگەن جانىبەك باسىن جاستىقتان جۇلىپ الىپ، ءارى قاراي بىلاي دەگەن ەكەن:
— قاراكەسەكتىڭ ەرى تۋعان ەكەن،
ەلى بەلىن بەكەم بۋعان ەكەن.
ەل شەتىنە جاۋ كەلسە،
مىنەكي، شابار تايى تۋعان ەكەن.
ەرلى تاي قۇنان بولادى،
ەرسىز تاي تۋلاق بولادى.
كەل، قاسىما وتىر!
جانىبەك وسىلاي دەپتى دە، تىلەنشىنى قاسىنا وتىرعىزىپى. سودان بىلاي قاراي تىلەنشى ءبيدى ەلى دە سىيلايتىن بولىپتى. سول كۇننەن باستاپ ول ەل اراسىندا قۇرمەتكە بولەنە بەرىپتى.
You Might Also Like
-
قايسا ءبىر جاس وتاۋعا كەلىپتى. ءبىر شايدان كەيىن وتاۋ يەسى سىرتقا شىعىپ: «ەندى قايتتىك، سويا قوياتىن مالدىڭ ءجونى جوق، انا اقساق قويدى سويىپ بەرەيىن» دەپ شۇيىركەلەسىپتى دە، قويدىڭ ارتقى اياعى...
-
تىلەنشىنىڭ «ءتۇبىڭىزدىڭ ءبىر شيكىلىگى بار-اۋ» دەيتىن ءازىلىنىڭ، جانىبەكتىڭ «مەن جاقسىنىڭ اتقان ءبىر وعى ەمەسپىن با؟» دەيتىن ءسوزىنىڭ ءمانىسى بىلاي ەكەن.
