جانىبەك تۋرالى
تىلەنشىنىڭ «ءتۇبىڭىزدىڭ ءبىر شيكىلىگى بار-اۋ» دەيتىن ءازىلىنىڭ، جانىبەكتىڭ «مەن جاقسىنىڭ اتقان ءبىر وعى ەمەسپىن با؟» دەيتىن ءسوزىنىڭ ءمانىسى بىلاي ەكەن.
شاقشاق جانىبەك جولاۋشىلاپ كەلە جاتىپ كەرەيدىڭ ءبىر ۇيىنە قونادى. ۇيدە ءبىر كەمپىر مەن كەلىنشەك قانا بولادى. كەمپىر باتىردى سىرتتان كيەلى كىسى دەپ ەستيتىنىن، كەلىنىنىڭ ءبىراز جىلدان بەرى بالا كوتەرمەي جۇرگەنىن ايتىپ باتا سۇرايدى. باتىر ىقىلاس ءبىلدىرىپ، باتا بەرەدى. كەلىنشەك كەيىن قۇرساقتى بولىپ، ۇل تۋادى. كەمپىر «جاقسىنىڭ شاراپاتى ءتيدى» دەپ نەمەرەسىنە باتىردىڭ اتىن قويادى جانە جەتى جاسقا كەلگەندە باتىردى
شاقىرتىپ سىناتادى.
جانىبەك بالانى جالاڭاشتاپ كورىپ، «قاتارىنان كەم بولماس» دەيدى. جانە وكىل اكە بولىپ: «ون جەتىگە تولعاندا كەلىپ، ەنشىسىن الىپ كەتسىن»، — دەيدى. بالا ەرجەتكەن سوڭ ىزدەپ بارسا، باتىر قارتايىپ، قولىنان بيلىك كەتكەن كەزى ەكەن. «ەنشىسىنە ءبىر ايعىر ءۇيىر جىلقى بەرىڭدەر»، — دەسە، بالالارى قيماپتى. باتىر بالادان قالاعانىن سۇراسا:
— ساۋىتىڭىزدى قالاپ كەلىپ ەدىم، ءبىراق وڭاشادا اتىپ كورگەنىمدە سارجاي ءوتىپ كەتتى، — دەيدى بالا.
بوساعادا شاڭ-توپىراق باسىپ جاتقان ساۋىتىن قاعىپ-سىلكىپ، كەرەگەنىڭ باسىنا ءىلىپ:
— ەندى اتىپ كورشى، — دەيدى باتىر. اتسا، ساداقتىڭ جەبەسى وتپەيدى.
— ەردى تەمىر ساقتامايدى، ءتاڭىر ساقتايدى، — دەپ، باتىر وكىل بالاسىنا «كوكتەرەك» دەيتىن ساۋىتىن سىيلاپتى.
سوسىن جىلقىسىن ارالاتىپ ءبىر بۋرىل تايعا بۇعالىق تاستاتىپ:
— بالام، جىلقىنىڭ ءجۇزىن الما، ءبىرىن ال! جاقسى ات جاۋعا تاستامايدى. جولداستىڭ مىڭىن الما، ءبىرىن ال، مىڭ قولدى ءبىر ەر باستايدى، — دەپ شاقشاق جانىبەك باتىر وكىل بالاسىنا باتاسىن بەرىپتى.
You Might Also Like
-
قازىرگى ارقالىق، ەدىرەي تاۋلارىنىڭ ءوڭىرى كەرەي رۋىنىڭ اتا قونىسى بولعان دەسەدى. كەيىننەن بۇل جەرلەرگە اقتابان-شۇبىرىندىنىڭ كەزىندە قاراتاۋ جاقتان كەلگەن ارعىن مەيرام سوپىنىڭ، ونىڭ ىشىندە قاراكەسەك ...
-
توسىن دەگەن قۇمايت جەر بار. وسى جەردى ءبىر كەزدەرى قالماق جۇرتى مەكەندەگەن ەكەن. قالماقتىڭ سادىربالا دەگەن باتىرى كۇندە قارساقباسىنىڭ باسىنا شىعىپ الىپ، قازاقتاردى جەكپە-جەككە شاقىرىپ مازالاي بەرىپتى.
