InfoHub Logo

جاقسى رەپەتيتوردىڭ ەڭ الدىمەن تاجىريبەسى، كاسىبي ءبىلىمى جانە ديپلومىنىڭ بار ەكەنىن ءبىلىپ الۋ كەرەك دەپ ويلايسىز با؟ وندا قاتتى قاتەلەسەسىز. بۇل ماسەلەنىڭ ەشقانداي ءمانى جوق. ناعىز ۇستازدىڭ ىشىندە كومەكتەسۋگە جانە ۇيرەتۋگە دەگەن زور ىنتا-ىقىلاسى بولۋ كەرەك.

ەگەر رەپەتيتوردا ونداي سەزىم بولماسا، ونى ول ەشقانداي ۋنيۆەرسيتەتتە دە وقىپ، ۇيرەنە المايدى.

اۋەلى: «ساباق قالاي جۇرەدى؟» دەپ سۇراۋىڭىز كەرەك.

ەگەر اعىلشىن تىلىنەن ۇيرەتۋشىڭىز سىزگە قانداي دا ءبىر وقۋلىقتى ۇسىنىپ، وسى كىتاپ جاقسى، سەنىڭ دەڭگەيىڭە سايكەس كەلەدى، وندا ماتىندەر، جاتتىعۋلار، تىڭدالىمدار بار، وسى كىتاپتان وقىعانىڭ دۇرىس دەپ ايتا باستاسا، دەمەك ءسىز اعىلشىن ءتىلىن وقۋدىڭ ورنىنا سول وقۋلىقتى ۇتىر-نۇكتەسىنە دەيىن جاتتاپ شىعاسىز. ال بۇل مۇلدەم باسقا نارسە.

ءسىز ءجۇز وقۋلىقتى وقىپ تاستاۋىڭىز مۇمكىن، ءبىراق ەشقاشان اعىلشىنشا سويلەي المايسىز! ونىڭ ۇستىنە، مۇنداي ءبىر سارىندى اعىلشىن ءتىلى ساباعى ۋاقىت وتە كەلە ءسىزدى جالىقتىرىپ جىبەرۋى مۇمكىن.

اعىلشىن ءتىلىن ناعىز ۇيرەتۋشىنىڭ ساباعى قۇراستىرماق سياقتى بولادى. قۇراستىرماقتىڭ ءار بولشەگى ءسىز نەنى قالايسىز جانە اعىلشىن ءتىلى نە ءۇشىن قاجەت دەگەن ماقساتىڭىزعا، قاجەتتىلىگىڭىزگە جانە قىزىعۋشىلىعىڭىزا سايكەس جينالادى. ءسىزدىڭ ارمانىڭىزداعى ۇيرەتۋشى ءوزىڭىزدى قىزىقتىراتىن سۇراقتار مەن تولعاندىراتىن تاقىرىپتار تۋىنداعان كەزدە اعىلشىن ءتىلى ساباعىن كۇتپەگەن جەردەن جۇرگىزە بەرەتىندەي العىر بولۋى كەرەك.

ارينە، بىرنەشە وقۋىلىقتى الىپ، سونىمەن وقىتۋ – وتە جەڭىل جۇمىس. ءبىلىم بەرۋ جۇمىستارىنىڭ ءبارىن وقۋلىق جۇرگىزەدى، ال ۇيرەتۋشى جانىڭىزدا وتىرىپ، قاتەلەسكەن جەرىڭىزدى تۇزەتىپ وتىرادى. وكىنىشكە وراي، بۇل جۇمىس ەمەس، ناعىز كوزالداۋشىلىق. ال مۇنداي ۇستاز – ناعىز كوزالداۋشى. وقۋشى بولسا ساباقتىڭ بۇلاي جۇرمەۋ كەرەك ەكەنىن بىلمەستەن، وسى قالىپتا ۇيرەنۋىن جالعاستىرا بەرەدى.

سونىمەن، جاقسى تالىمگەردىڭ تۇيىندەمەسى:

1) اعىلشىن ءتىلىنىڭ ۇيرەتۋشىسى ءار ساباققا جاقسى دايىندىقپەن كەلۋى كەرەك.

2) اعىلشىن ءتىلىنىڭ ۇيرەتۋشىسى وقۋشىنىڭ وتىنىشىنە، وقۋ ءۇردىسىنىڭ وزگەرۋ ماسەلەسىنە مۇقيات بولۋى كەرەك. 

3) ۇيرەتۋشى وقۋشىنىڭ كەز-كەلگەن سۇراعىنا ءوزى جاۋاپ بەرۋى كەرەك (سىزگە وقۋلىقتى اشىپ، كەستەنى كورسەتىپ تۇسىندىرمەۋى كەرەك).

4) اعىلشىن ءتىلىن ۇيرەتۋشى ءبارىن قاراپايىم تىلمەن، ءوزى تۇسىنگەندەي ءتۇسىندىرىپ بەرۋى قاجەت. ەگەر ول وقۋلىقتاعى ەرەجەنى ءوز سوزىمەن قايتالاپ بەرسە – وندا ول ءسىزدىڭ ۇيرەتۋشىڭىز ەمەس!

P. S. ايتپاقشى، اعىلشىن ءتىلىن ۇيرەتۋشىمەن بىرگە وقۋداعى تاعى ءبىر ماڭىزدى نارسە جايلى ايتا كەتەيىك. ەڭ باستىسى، تاڭداعان ۇستازىڭىز ءسىزدى ادام رەتىندە تارتىپ، سەنىم تۋدىراتىنداي بولۋ كەرەك. ءسىز وعان تولىقتاي سەنىم ارتىپ، اعىلشىن ءتىلىن راحاتتانىپ ۇيرەنۋىڭىز قاجەت.

---