InfoHub Logo

«باسىڭا ءىس تۇسسە، جاقسى كومەك ەتەدى، جامان كۇلىپ كەتەدى» دەمەكشى، پەندە اتاۋلى قيىندىققا تاپ بولىپ، باسىنا  ءىس تۇسكەندە وزگەلەردەن كومەك كۇتەدى. ءحالى مۇشكىل جاندارعا قولدان كەلگەنشە قايىرىمدىلىق جاساپ، بارىڭمەن ءبولىسۋ- يماندىلىقتىڭ بەلگىسى. مۇنداي قاسيەتتەردى بويعا جيعان  اق پەيىلدى ادامدار اينالامىزدا از ەمەس. سولاردىڭ ءبىرى - بۇگىندە تالاي جاندى قۋانىشقا كەنەلتىپ، العىسىن الىپ جۇرگەن- «قايىرىمدى جاندار» ەرىكتىلەر توبى.

كومەككە مۇقتاج، مۇمكىندىگى شەكتەۋلى جاندارعا بارىنشا جاردەمدەسۋدى ماقسات ەتكەن «قايىرىمدى جاندار» ەرىكتىلەر توبى 2015 جىلى 22-جەلتوقساندا قۇرىلعان. ايدىن توقسانبايەۆانىڭ باستاماسىمەن ۇيىمداستىرىلعان  بۇل توپ العاش الماتى قالاسىنان باستاۋ الىپ، ۋاقىت وتە كەلە استانا، شىمكەنت، اقتاۋ، تاراز، اقتوبە، جانە ت.ب.ەلىمىزدىڭ ءىرى قالالارى مەن اۋداندارىندا قۇرىلا باستادى. الماتىداعى «قايىرىمدى جاندار» ەرىكتىلەر توبىنىڭ 80 % -ى 18-25 ارالىعىنداعى جاستار بولىپ سانالادى. بۇل توپتىڭ قۇرامىندا بۇگىندە 300- گە جۋىق ادام بار.
بۇگىنگە دەيىن مەيىرىمدى جاندار كوپتەگەن قايىرىمدىلىق شارالارىن ۇيىمداستىرىپ، تالاي كومەككە ءزارۋ  ادامدارعا قول ۇشىن سوزعان. سونىڭ ىشىندە،  2015 جىلى ەكى بۇيرەگى ىستەن شىققان الماتىلىق  جانەل جايلاۋوۆانىڭ ەمىنە 12 ملن تەڭگە جيناپ بەرۋلەرى-  توپتىڭ ەڭ ءىرى شاراسى. وزدەرىنىڭ ايتۋىنشا، بۇل اقشانى جيناۋ ولارعا وڭاي سوقپاعان، ءتىپتى بازارداعى المالاردى  2-3 ەسە باعامەن كوشەلەردە  ساتقان ەكەن. مەشىتتەرگە بارىپ، وزدەرىنىڭ پىسىرگەندەرىمەن  جارمەڭكەلەر ۇيىمداستىرعان. بۇل ىسكە تەك الماتىداعى عانا ەمەس، وزگە دە قالالارداعى توپتار، سونىمەن بىرگە، كەيبىر كاسىپكەرلەر دە بارىنشا اتسالىستى. قارشاداي قىزدىڭ  ومىرگە دەگەن ۇمتىلىسى ولارعا سەنىم بەرىپ، ودان ءارى قۇلشىندىرا تۇسكەن. اقىرى ەڭبەكتەرى اقتالىپ، جانەلدىڭ ەمىنە قاجەت سومانى تۇگەلدەي جيناپ بەرەدى.

الماتىلىق «قايىرىمدى جاندار» بيىلعى جىلدىڭ مامىر ايىندا جۇمابەك حافيزا ەسىمدى ناۋقاس ءبۇلدىرشىننىڭ ۆەنگرياداعى رەابيليتاسياسى ءۇشىن قالا ورتالىعى مەن مەشىتتەردە «جاقسىلىق جاساپ جارىسايىق!» اتتى جارمەڭكە ۇيىمداستىردى. بۇنىڭ ناتيجەسىندە 233 مىڭ تەڭگە جينالىپ، حافيزا مەن  تاعى ءبىر تەمىرلان اتتى ءسابيدىڭ ەمىنە ءبولىنىپ بەرىلگەن بولاتىن. ال ناۋرىز ايىندا وتكەن «ونەر قىراندارى» تەاترىنىڭ كونسەرتىندەگى قايىرىمدىلىق جاشىگىنە 760 مىڭ تەڭگە قاراجات جينالدى. وعان قوسا، قمدب  قولداۋىمەن «بايكەن اتا» مەشىتىندە 200-دەن استام ەرىكتىلەر وزدەرى دايىنداعان ءتۇرلى تاعامداردى ساتىپ، ودان دا ەداۋىر پايدا تاپقان.  

وسى ءتارىزدى اۋقىمدى شارالاردان بولەك، كەڭ پەيىلدى جاندار ءۇيسىز- كۇيسىزدەردى تاماقتاندىرۋ، بالالار ۇيىندەگى بۇلدىرشىندەر مەن قارتتار ۇيىندەگى اتا- اجەلەردى قىدىرتىپ، كوڭىلدەرىن كوتەرۋ ءتارىزدى كوپتەگەن يگىلىكتى ىستەر ۇيىمداستىرىپ ءجۇر. ماسەلەن، جەلتوقسان ايىندا ۇيسىز-كۇيسىزدەرگە  جىلى كيىمدەر مەن ىستىق تاعامدار تاراتىپ، ولارعا از دا بولسا، قۋانىش سىيلادى. وسىنداي ىزگى باستامادان «الماتى دونەرىنىڭ» دە قۇر قالماي، 50 دونەردى تەگىن بەرۋى- اسا قۋانتارلىق جايت.

جاقسىلىق جاساۋعا ءاردايىم دايىن تۇراتىن «قايىرىمدى جاندار» ءبىر جىل بويى ءار بەيسەنبى كۇنى قارتتار ۇيىنە بارىپ تۇرسا، توپ مۇشەلەرىنىڭ  تۋعان كۇندەرىن بالالار ۇيىندە اتاپ وتەدى. وسى جىلدىڭ 14- ساۋىرىندە اقساي اۋرۋحاناسىندا جاتقان سابيلەرگە «ناۋرىز» مەيرامىن قىزىقتى تۇردە وتكىزىپ بەردى. سونىمەن قاتار، جىل سايىن قىركۇيەكتە 60-قا جۋىق مۇقتاج جانۇيالاردىڭ بالالارىن مەكتەپ كيىمدەرىمەن، وقۋ قۇرال- جابدىقتارىمەن قامتاماسىز ەتىپ كەلەدى.

سونداي-اق، ماۋسىم ايىنىڭ 10- جۇلدىزىندا اربات الاڭىندا ەكى كەزەڭنەن تۇراتىن قايىرىمدىلىق  شاراسى ءوتىپ، ودان جينالعان قاراجات وتتەگى اپپاراتىنا مۇقتاج ەرلانوۆ تەمىرلانعا بەرىلدى.

مىنە، اينالامىزدا كومەككە ءزارۋ جاندارعا ماتەريالدىق، رۋحاني تۇرعىدان  قولداۋ ءبىلدىرىپ، ىزگىلىككە تولى ساۋاپتى ىستەرمەن اينالىسىپ جۇرگەن وسىنداي  جايساڭ جانداردىڭ بار ەكەنىن بىلە بەرمەيمىز. جوعارىدا ايتىلعاندار الماتىلىق «قايىرىمدى جاندار» جاساعان  يگىلىكتى شارالاردىڭ تەك ءبىر بولىگى عانا. بار-جوعى ءۇش جىلدىڭ ىشىندە  بىرنەشە جاننىڭ ءومىرىن ساقتاپ قالىپ، تالاي وتباسىنى باقىتقا بولەگەن مەيىرىمدى ەرىكتىلەردىڭ الداعى ۋاقىتتاردا بۇدان دا كەڭ كولەمدەگى قايىرىمدىلىق جقمىستارىن اتقاراتىنى ءسوزسىز.

---