جاقسىنىڭ جاقسىلىعىن ايت، نۇرى تاسىسىن، جاماننىڭ جاماندىعىن ايت، قۇتى قاشسىن
حالقىمىزدىڭ قامىن ويلاپ، قازاقستان ءۇشىن ايانباي تەر توككەن، ەلىمىزدىڭ باسىن تالاي قيىندىقتان اراشالاپ امان الىپ قالعان دىنمۇحامەد قونايەۆ اتامىز ءومىرىنىڭ سوڭعى جىلدارى ادىلەتسىزدىكتەردى از كورگەن جوق. وي ەلەگىنەن وتكىزىپ قارار بولساق، كۇشىكتى اسىراپ يت قىلاسىڭ. ودان سوڭ ول يەسىنە قاراي شاۋىپ، بالتىرىڭدى قاناتادى دەگەن ۇلى ابايدىڭ ءسوزى راس ەكەن-اۋ. قونايەۆ ءۇشىن ادىلەتسىزدىكتىڭ ەڭ سوراقىسى - حالىق ريزالىعى ءۇشىن جان دەمەي قىزمەت كورسەتىپ، سودان سوڭ ءوزى تاربيەلەگەن كەيبىر شاكىرتتەرىنىڭ ودان تەرىس اينالىپ، تابان استى كورسەتكەن وپاسىزدىعى شىعار، ءسىرا. ونى ايتپاساق تا بەلگىلى. ءتىپتى باسپا ءسوز بەتتەرىندە ءجون-جوسىقسىز ايىپ تاعىپ، كۇيە جاعىپ، ءار باسقان قادامدارىن ساناپ، ىزىنە تۇسكەندەر دە از ەمەس. ول از دەسەڭ، سونىڭ سالدارىنان قونايەۆتى ماسكەۋ تاراپى دا ەلەۋسىز قالدىرماستان، تەرگەۋگە الا باستادى.
ءبىراق تا كسرو باس پروكۋراتۋراسىنىڭ ىستەر جونىندەگى ءبولىم تەرگەۋشىسى كالينيچەنكو ءار باسقان ادىمىنان قاتەلىك ىزدەپ، ارتىن اشپاق بولعانىمەن، ونى قارالايتىن ەشقانداي دالەل تاپپادى. ءتىپتى، ديمەكەڭ ول تۋرالى ءوزىنىڭ ءتول تۋىندىسى "و موەم ۆرەمەني" كىتابىندا دا ايتىپ ءوتىپتى.
ودان سوڭ باسىنا ەندى تىنىشتىق ورنادى ما دەپ، زەينەتكەرلىك دەمالىسقا شىعار ۋاعىندا، باسىنداعى جالعىز "ۆولگا" اۆتوكولىگىن دە بيلىك باسىنداعى شۇكىرشىلىگى جوقتار سۇراۋسىز، وزدەرىنە تارتىپ العان. بۇدان اسقان سوراقىلىق جوق شىعار، بالكىم. كولىك كەرەك بولعان سوڭ ديمەكەڭ تۋعانىنداي بولىپ كەتكەن قازاقتىڭ ءبىرتۋار ازاماتى زامانبەك نۇرقادىلوۆكە قوڭىراۋ شالعان. جاعدايىن ءتۇسىندىرىپ، كولىگىن تارتىپ العانىن ايتىپ، مۇمكىن بولسا وزىنە كولىگىن قايتارىپ الۋعا، نە بولماسا اقىسىنا باسقا "ۆولگا" ساتىپ الۋعا كومەكتەسۋىن وتىنگەن. ىنىسىندە "جيگۋلي" بار ەكەنىن، ءبىراق ونىڭ ءىشى وزىنە تار، كولىكتى جۇرگىزگەندە قولايسىزدىق تۋعىزاتىنىن ايتىپ جەتكىزەدى. ارينە، ۇزىن بويلى، ءىرى دەنەلى ءارى سىمباتتى، اتى دۇركىرەپ تۇرعان قونايەۆ "جيگۋلي" مىنگەنىنە نامىستانعان ەمەس. جاي عانا ءىنىسىنىڭ كولىگىنە ماسىل بولعىسى كەلمەگەندىكتەن، ءبىر جاعىنان ول كولىك ىڭعايسىز بولعاندىقتان دا، داۋ-داماي شىعارماي سول ۋاقىتقا دەيىن ءۇنسىز بارىنا رازى بولعان، قانداي كورەگەندى كىسى دەپ تە كەيدە تاڭىرقايسىڭ. ديمەكەڭ كولىكتى ءوز تاراپىنان ساتىپ الا المادى. سەبەبى، بيلىكتەگىلەر ءجۇرىس-تۇرىسىنىڭ بارلىعىنا تىيىم سالعان. زامانبەك جوعارعى تاراپتاعى اشكوزدەردىڭ ديمەكەڭە كورسەتكەن قورلىعىنا قاتتى ىزاسى كەلگەننەن، جۇمىس ورنىن ءبىر سىلكىندىرگەن. قونايەۆتىڭ ءسوزىن جەرگە تاستاماي، دەر كەزىندە قول استىنداعىلارعا ديمەكەڭنىڭ ۇيىندە 1 ساعاتتا جاڭا "ۆولگا" اۆتوكولىگى تۇرۋىن تالاپ ەتەدى. وسىنداي جاعدايلاردىڭ كۇندەلىكتى كورىنىسى مەن كولەڭكەسى تيتىعىنا ابدەن ءتيىپ، جانىنا باتتى ما كىم ءبىلسىن؟ نەمەسە ءومىرىنىڭ مەجەسى، سوڭعى ايالداماسى وسى جەردەن توقتادى ما، بەلگىسىز ديماش اتامىز 1993 جىلدىڭ تامىز ايىندا 81 جاسىندا دۇنيەدەن ءوتتى. بۇل كىسىنىڭ جانازاسىنا كەلگەن ادامداردىڭ قاراسى ۇزاق ۋاقىت بويى تارقاماعان كورىنەدى. سەبەبى، حالىق كىمنىڭ ادال، كىمنىڭ ارام، كىمدى قادىرلەي ءبىلۋ كەرەكتىگىن بىلەدى. قازىرگى تاڭدا قونايەۆتىڭ ىستەگەن ءبىر ءىسىن بۇكىل قازاقستان جۇمىلىپ ىستەي المايدى.
بۇل زاماننان با، الدە ادامنان با، ول جاعى بىزگە بەيمالىم.
سابىر شۇعىلا قىزىلوردا وبلىسى جاڭاقورعان اۋدانى
You Might Also Like
-
قايتقاندا ءبولىمىن وقىعان ءار جان ءۇشىن ۇلجاننىڭ ءسوزى تالىم-تاربيەنىڭ بەلگىسى. ۇلى اقىن بولۋ ءۇشىن قانداي بولۋ كەرەك؟ول تاربيەلى، سالماقتى، ەڭ اۋەلى اقىلدى بولۋعا ءتيىس. بالا ابايدىڭ ومىرىندە زەرە اپاسى...
