جاتىرداعى جاقسىلىق جاساۋشىم
(قازىرگى زامان پروزاسى)
اپپاراتتىڭ ايناسىنا ۇڭىلگەن دارىگەر ايەل كەنەت: «ءسىز قاي جاقتانسىز؟» — دەدى. ۇلبوسىن قۇرساق تۇسىن ساپ-سالقىن سايمانمەن باسىپ وتىرعان دارىگەرگە: «سەمەيدىڭ ابىرالىسىنان»، — دەپ قىسقا جاۋاپ قايتاردى.
دارىگەر ايەلدىڭ «ءى... ءى...ءى...م» دەگەن ءۇنى سوزگە بەرگىسىز ماعىنالى ءارى ۇرەيلى ەستىلدى.
ۇلبوسىن «نەندەي جاعداي؟» دەپ سۇراۋعا جۇرەگى داۋالامادى. كوڭىلىنە ىزعارلى كۇدىك كولەڭكەسى تۇسە قالدى. سۋىق ويلار دا قىراۋداي ۇشقىنداپ قاپتاپ كەلەدى: «تۇرعانعا كۇيەۋگە شىعىپ، سەگىز جىل بويى ءبىر شاراناعا زار بولىپ، ەندى بىردەڭە بولا ما، دەگەندە نە بولدى تاعى؟!»
ۇلبوسىن: «ەكىقاباتپىن با، جوق پا؟»، — دەگەن ءسوزدىڭ تىلىنەن قالاي شىعىپ كەتكەنىن دە اڭدامادى.
دارىگەر بولسا: «ءيا...» دەگەن، ءسوز بەن ءۇننىڭ ارالىعىنداعى ءبىر ساراڭ جاۋابىنا «ءبىراق...» دەگەن ءسوزدى قوستى. جاڭاعى كۇدىك كولەڭكەسى ەندى قورقىنىشتىڭ قاراڭعىلىعىنا قاراي اۋىپ بارا جاتتى.
ۇلبوسىننىڭ كوز جاسى «سۇڭقار» زەتتەۋ ورتالىعىنان ۇيگە جەتكەنشە تيىلمادى. «ءوزىڭ ساقتاي گور، جاساعان...»، — دەپ كۇبىرلەي بەرەدى.
ءۇش كۇن وتكەندە ءبارى دە ايقىن بولدى. تۇرعان مەن ۇلبوسىندى شاقىرعان دارىگەرلەر كەڭەسى: «ءۇش ايلىق شارانانى تۇسىك ارقىلى الىپ تاستاۋ قاجەت» دەگەن شەشىم شىعارعانىن حابارلادى.
ۇلبوسىن ءدال توبەسىنەن سەل قۇلاپ كەلە جاتقانداي: «نەگە؟!!» — دەپ شىر ەتە ءتۇستى.
باس دارىگەردىڭ: «ىشتەگى ءۇش ايلىق شارانانىڭ وڭ جاق اياعى تىزەدەن تومەن كەم ەكەندىگى ۋزي-دە انىقتالدى»، — دەگەندە تۇرعاننىڭ: «نەلىكتەن ولاي؟!!» — دەپ وكسىك ارالاسا ىشقىنا شىققان سۇراعىنا: «رادياسيا تۇقىمعا اسەر ەتكەن...»، — دەگەن قىسقا جاۋاپ ايتىلدى.
اتتەڭ! ادامنىڭ ءومىرى سۇراق پەن جاۋاپ ارقىلى شەشىلە سالسا، جان قينالىسى دەگەن بولماس ەدى-اۋ! جينالىپ وتىرعانداردىڭ كوڭىل كۇيى استاڭ-كەستەڭ بولدى. اياۋشىلىق پەن زاڭشىلدىق، ادامگەرشىلىك پەن ءسوزۋارلىق، كىسىلىك پەن رەسميلىك تايتالاسقان وي-پىكىرلەر سۋ بەتىندەگى سەڭدەي سوعىلىستى.
باس دارىگەردىڭ: «بۇل كەمشىلىك ۇلتىمىزدىڭ گەنوفوندىنا زيان»، — دەگەنى، باسقالارىنىڭ «كەم ءسابي تۋعانشا، ساۋ ءسابي تاۋىپ الاسىز عوي...»، — دەپ الداۋسىراتقانى ۇلبوسىندى يلىكتىرە المادى.
قايسار كەلىنشەكتىڭ: «شولاقاياق بولسا دا ءوز بالامدى ءوز جاتىرىمدا ولتىرتە المايمىن!» — دەگەن ءسوزى انتتان دا سالماقتى ەستىلدى.
الاي-دۇلەي بوران ساپ تيىلعانداي تىنىشتىق ورنادى. ۇنسىزدىكتى بەس دارىگەردىڭ ىشىندە وتىرعان ەڭ جاستاۋى ىدىرىس ەسىمدى جىگىتتىڭ ءسوزى وياتتى: «ءتانى كەم بولعانمەن، جانى كەمەل بولسا شە؟!»
سەڭ سوققانداي قوس قولىمەن باسىن ۇستاپ، ءبىر ءسوز ايتا الماي وتىرعان تۇرعان: «ءامين...» — دەپ كۇبىرلەدى. وسى ءسوز باسقا ارەكەتتىڭ جولىن كەستى، تۇسىك جاسالمايتىن بولدى...
وسىناۋ قايعى مەن قۋانىش قايشىلاسقان وقيعادان كەيىن دە اققان وزەندەي ارقىراپ وتىز جىل وتە شىققان ەدى. تۇرعان مەن ۇلبوسىن وڭ اياعى تۋاسىلى كەم بوپ دۇنيەگە كەلگەن ۇلدارىنىڭ اتىن تاڭىرىس دەپ قويعان-دى. جاندارى جالعىز ۇلدارىنىڭ ۇستىندە بولدى. ونىڭ كوڭىلىنە قاياۋ تۇسىرمەۋگە بارىن سالدى، بار تىرلىكتەرىن سونىڭ جاقسى تاربيەسىنە ارنادى. تاڭىرىس تا وقۋدا الدىنا بالا سالمادى. ول اناسىنىڭ تىلەگى بويىنشا مەديسينا ماماندىعىن تاڭدادى. الماتى مەدۋنيۆەرسيتەتىن ەرەكشە ۇزدىك بىتىرگەن سوڭ، از جىلدا، سەۋل، توكيودا كاسىبي ءبىلىمىن جەتىلدىرىپ، دۇنيەجۇزىلىك دەنساۋلىق ساقتاۋ سالاسىن ءدۇر سىلكىندىرگەن جاڭالىقتار اشتى...
...قارتاڭ دارىگەر رەانيماسيادا ەسى كىرگەندە ءوزىنىڭ ءتىرى ەكەنىنە قايران قالدى. «كەڭ كولەمدەگى ينفاركت» دەگەن دياگنوز قويىلعان ادامنىڭ ءتىرى قالۋى ەكىتالاي بولاتىن. كارديولوگ قىز ءنۇرابيا سىرقاتتىڭ كوزىن اشقانىن كورىپ، جانىنا قۋانا جەتىپ كەلدى:
«ىدىرىس اعا، ءسىزدى قۇتقارعان مىنا ءدارى!» — دەپ كوز الدىنا ءبىر امپۋلانى توستى. دۇنيەگە قايتا كەلگەندەي بولىپ، اينالاسىنا تاڭىرقاي قاراعان قارت دارىگەر شىنى ساۋىتتىڭ بۇيىرىنە لاتىنشا جازىلعان «TANIRIS-I» دەگەن ءسوزدى وقىدى.
كارديولوگ قىزدىڭ: «بۇل ەرەكشە ءدارى جۇرەك قان تامىرىنداعى ترومبىلاردى بىرنەشە سەكۋندتا-اق ەرىتىپ جىبەرەدى. تەك ۇلگەرىپ ەگىلسە بولدى، ادام قانداي اۋىر ينفاركتەن دە امان قالادى! بۇل ءقازىر سكورىيدىڭ كابيناسىندا تۇراتىن ەڭ قىمبات ءدارى...» — دەگەندى ماقتانىشپەن ايتىپ جاتتى.
قارت دارىگەر ىدىرىس: «بۇل — تاڭىرىس تۇرعان ۇلىنىڭ ويلاپ تاپقان اتاقتى ءدارىسى عوي!» — دەگەندە كوز الدىنا وسىدان وتىز نەشە جىل بۇرىن ءوتىپ كەتكەن شاق قايتا ورالعانداي، قۇرساعىن قوس الاقانىمەن باسىپ، ءمولدىر جانارىنان مونشاقتاپ جاسى توگىلگەن اققۇبا، جاۋتاڭكوز كەلىنشەك كوز الدىنا ەلەس بولىپ كەلە قالدى.
قارت دارىگەردىڭ كوز جاسىمەن قوسا اۋىزىنان شىققان: «جاتىرداعى جاقسىلىق جاساۋشىم مەنىڭ...» — دەگەن تۇسىنىكسىز ءسوزىن دارىگەر قىز پايىمداي العان جوق...
You Might Also Like
-
كوك سارايدىڭ قاق تورىندە بويىن تىك ۇستاپ قاسقايىپ وتىرعان قاپساعاي دەنەلى، كەڭ ماڭدايى جارقىراپ اشىق ءجۇزى ويعا شومعان، ىدىرىس ءاد-داۋلى رۋستاني سۇلتان الدىنا كەلىپ جىعىلعان ەكى جاۋشىعا نازار دا سالع...
-
«بوس ۋاقىت» دەگەن تۇسىنىك ەجەلگى قازاققا جات ۇعىم. مۇنداي ءسوزدىڭ شىعىپ كەلۋىنىڭ ءوزى بەرتىندەگى جاعداي. ياعني ءتول قازاق قوعامىنىڭ جويىلىپ، وتارشىلداردىڭ جاساندى قوعامى ورناعاننان بەرى پاي...
