InfoHub Logo

ق. قالاسىنىڭ "مەيمانحاناسى" دەيمىز بە، الدە "قوناق ءۇيى" دەپ اتايمىز با؟ وندا تۇرعان اڭگىمە جوق، ايتەۋىر ەكەۋىنىڭ ءبىرى. اڭگىمە، وسى قوناق ءۇيدىڭ قوناقتارىنا جاساعان مەيماندوستىعى، كۇتۋى، تازالىعى، ءتارتىبى جايىندا بولسا دەيمىز.
"باۋىرساق جاۋعان كۇنى" دەپ قوجاناسىر ايتقانداي، كەشە عانا ءبىرىنشى رەت جاڭبىر جاۋعان كۇنى، وسى قوناق ءۇيدىڭ ۇستىندە تامشى وينادى.
قوناق ءۇيدىڭ ەسىگىنەن كىرە بەرگەندە N2 بولمەسى بار. بۇل بولمەدە جاتاتىنداردىڭ سانى تورتەۋ. كۇن كەش ەدى.

قوناقتىڭ ءبىرى كوسىلىپ،
ەندى ءبىرى شەشىنىپ،
جاتقانى سول... جاڭبىرمەن
ءۇي توبەسى تەسىلىپ،

تامشى كەتتى سورعالاپ،
قوناقتار سۋدان قورعالاپ،
ىلىنگەنىن سۇيرەتىپ،
ەڭبەكتەپ ءجۇر جورعالاپ.
سۋدى ءبىرى كەشىپ ءجۇر.
ءبىرى "ەسكەكتى" ەسىپ ءجۇر.
ءبىرى ۇيرەكشە "سۇڭگىپ " ءجۇر،
ءسويتىپ ءجۇرىپ قوناقتار،
تاۋىپ جىرتىق شەلەكتى،
اققان سۋدى تاسىپ ءجۇر،
ايعىزدانعان بەت-اۋزىن،
ۇيالعاننان باسىپ ءجۇر.
دەجۋرنىي ءجۇر شىرقىراپ.
ءوزى - وزىنەن بۇرقىراپ:
"وسى تامشى اعىپ ەدى...
بيىل ەمەس، بىلتىر - اق.
وندا دا ءبىر قىم-قيعاش
ءتۇنى بويى دىردەكتەپ،
توسەكتەرىن سۇيرەپ كەپ،
سىرتقا قاراي قاشىپ ەدى.
جۇكتى وسىنداي تاسىپ ەك.
بيىل تاعى تامشىلاپ،
كۇز باسىنان قامشىلاپ،
ايتىپ-اق تۇر مىنەكي،
وشىرگەن جوق ەسكى كۇي".

ويتكەنى، ديرەكتوردىڭ ءوز ءۇيى قۇرعاق. ونان اعىپ جاتقان سۋ، تامىپ جاتقان تامشى جوق. ايلىعىن الادى، قالتاعا سالادى... ال، قوناق ءۇيدىڭ توبەسى ۇمىتىلىپ قالادى. ىشىندەگى قوناقتارى "قوس - قولاڭ" ارقالاپ، ءتۇن ىشىندە تامشىدان قامشى جەپ، جىرتىق شەلەكپەن جىرتىق ءۇيدىڭ سۋىن تاسىپ اۋرە سارساڭ بولادى. بۇلار كىمگە ايتادى؟

بىرەۋى ۇيرەك، ءبىرى قاز،
بولمە تولعان سۋلى ساز...
قوناقتاردىڭ "مالتىپ " ءجۇر،
كيىمدەرى "قالقىپ " ءجۇر
سونى كوزبەن كورىڭىز،
مىقتاپ كوڭىل ءبولىڭىز،
مىقتاپ كوڭىل بولمەسەڭ،
قوناق ءۇيدىڭ قوناعى،
قايدا بارىپ قونادى؟
قوناق تىنىش ۇيىقتايتىن،
تامشى قۋىپ شىقپايتىن،
جايلى ءۇي "قاشان بولادى؟

---