InfoHub Logo

جۇرەكتىڭ يشەميالىق سىرقاتى (جيس) — جۇرەكتىڭ تاجدىك ارتەريالارىنىڭ زاقىمدانۋى ناتيجەسىندە ميوكاردتىڭ قانمەن قامتاماسىز ەتىلۋىنىڭ ءابسوليۋتتى نەمەسە سالىستىرمالى تۇردە بۇزىلۋىمەن سيپاتتالاتىن پاتولوگيالىق احۋال. جيس اعىمى ءجىتى، ياعني ميوكارد ينفاركتى تۇرىندە، سوزىلمالى تۇردە، ياعني ارا-تۇرا ورىن الاتىن ستەنوكارديا ۇستامالارى تۇرىندە بولۋى مۇمكىن. جيس — الەمنىڭ دامىعان ەلدەرىندەگى ءولىم-جىتىمنىڭ، سونداي-اق ۋاقىتشا جانە تۇراقتى ەڭبەك قابىلەتىنەن ايرىلۋدىڭ نەگىزگى سەبەپتەرىنىڭ ءبىرى. قازىرگى ۋاقىتتا ددۇ-نىڭ 1984 جىلعى جيس جىكتەمەسى تولىقتىرۋلارمەن قولدانىلىپ ءجۇر:

1. اياقاستى كورونارلىق ءولىم (جۇرەكتىڭ بىرىنشىلىك توقتاۋى)

— جانساقتاۋ شارالارى جەمىستى اياقتالعانمەن اياقاستى كورونارلىق ءولىم؛

— اياقاستى كورونارلىق ءولىم (ءولۋ جاعدايى).

2. ستەنوكارديا.

— قوزۋ ستەنوكاردياسى؛

— العاش پايدا بولعان قوزۋ ستەنوكاردياسى؛

— فۋنكسونالدىق كلاسى كورسەتىلگەن تۇراقتى قوزۋ ستەنوكاردياسى؛

— تۇراقسىز ستەنوكارديا؛

— ۆازوسپاستيكالىق ستەنوكارديا؛

3. ميوكارد ينفاركتى.

4. ينفاركتەن كەيىنگى كارديوسكلەروز.

5. جۇرەك سوعىسىنىڭ بۇزىلۋى.

6. جۇرەك جەتكىلىكسىزدىگى.

جيس ءقاۋىپ فاكتورلارى:

— كارىلىك؛

— ەر جىنىستىلىق؛

— ديسليپيدەميا، گيپەرتەنزيا، گليۋكوزاعا توزىمدىلىك، سۋسامىر مەن سەمىزدىكتىڭ تۋىنداۋىنا ىقپال ەتەتىن تۇقىم قۋالايتىن فاكتورلار؛

جۇرەكتىڭ يشەميالىق سىرقاتى كەزىندە ءجيى كەزدەسەتىن شاعىمدار:

— دەنە قيمىلى كەزىندە نەمەسە سترەسس كەزىندە كەۋدە ارتىنىڭ اۋىرۋى؛

— ەنتىگۋ؛

— جۇرەك جۇمىسىنىڭ، ىرعاعىنىڭ بۇزىلۋى، السىزدىك؛

— جۇرەك جەتكىلىكسىزدىگى بەلگىلەرى؛

جۇرەكتىڭ يشەميالىق سىرقاتى بار دەگەن كۇدىك تۋعان جاعدايدا، ەلەكتروكارديوگرافيا (ەكگ) جاساۋ مىندەتتى. زاماناۋي اپپاراتتار گرافيكالىق اقپاراتتى قولما-قول الۋعا، دوپلەر اسەرى ەسەبىنەن قان اعىمىن باعالاۋعا مۇمكىندىك بەرەدى. ەحوكارديوگرافيا دا جۇرەك جۇمىسى تۋرالى كوپتەگەن پايدالى اقپارات بەرەدى. سونىمەن قاتار دەنەگە كۇش تۇسىرە وتىرىپ، فۋنكسيونالدىق سىنامالار جۇرگىزىلەدى، ميوكاردتىڭ كونتراستىلى انگيوگرافياسى، وڭەشىشىلىك ەلەكتروكارديوگرافيا، حولتەر مونيتورلاۋى سەكىلدى قوسىمشا زەرتتەۋ ادىستەرى قولدانىلۋى مۇمكىن.

ەمى

اۋرۋىن ەمدەۋ ونىڭ كلينيكالىق تۇرىنە بايلانىستى. الايدا جيس-نىڭ بارلىق تۇرلەرىنە ءتان جالپى باعىتتاردى ءبولىپ كورسەتۋگە بولادى:

— قيمىل-قوزعالىستى شەكتەۋ؛

— ەمدام؛

— دارى-دارمەك ءىشۋ.

جۇرەك يشەميالىق سىرقاتتارىن ەمدەۋگە ارنالعان كوپتەگەن دارىلەر بار. اقش-تا وسى اۋرۋدى ەمدەۋدە «ا-ۆ-س» فورمۋلاسى قولدانىلادى: انياگرەگانتتار، (3-ادرەنوبوگەگىشتەر، گيپوحولەستەرينەميالىق پرەپاراتتار).

جيس كەزىندە قولدانىلاتىن دارى-دارمەكتەر: نيتراتتار؛ انتيكواگۋليانتتار، ديۋرەتيكتەر؛ انگيتەنزينگە وزگەرتۋشى فەرمەنت انتاگونيستەرى؛ اريتمياعا قارسى دارىلەر.

كورسەتىم بويىنشا، جيس كەزىندە ەندوۆاسكۋليارلىق كوروناروانگيوپلاستيكا، گيرۋدوتەراپيا (سۇلىكپەن ەمدەۋ)، سوعۋ-تولقىندى تەراپيا ءادىسى، دىڭدىك جاسۋشالار، كۆانتتىق ەم قولدانىلۋى مۇمكىن.

شارتتى ءتۇردى العاندا، جۇرەكتىڭ يشەميالىق سىرقاتىنىڭ بولجامى جاعىمسىز. اۋرۋ سوزىلمالى جانە ۇدەمەلى بولىپ كەلەدى، ەم ونىڭ دامۋىن توقتاتادى نەمەسە دامۋىن باسەڭدەتەدى، الايدا ناۋقاستى بۇل دەرتتەن ءبىرجولاتا ايىقتىرا المايدى.

گ. ج. جاتقانبايەۆا، تەراپيەۆت دارىگەر

---