InfoHub Logo

جۇكتىلىك كەزىندە ايەلدىڭ بارلىق دەنە اعزالارىندا ۇلكەن وزگەرىستەر بولادى. اعزا جاتىرداعى ۇرىقتىڭ وسىپ-جەتىلۋىنە بايلانىستى جاڭا جاعدايعا بەيىمدەلەدى. بارلىق اعزالار قالىپتى جاعدايدا بولادى، ءبىراق جۇكتىلىككە دەيىنگى جاعدايمەن سالىستىرعاندا ارتىق اۋىرتپالىقپەن جۇمىس جاسايدى. دۇرىس تاماقتانىپ، دەمالىس ءتارتىبىن دۇرىس ساقتاپ، زياندى ادەتتەردەن (تەمەكى شەگۋ، ءسپيرتتى ىشىمدىكتەر ءىشۋ) اۋلاق بولعان جاعدايدا جۇكتى ايەل اعزالارى قالىپتى جاعدايدا جۇمىس جاساي الادى.

جۇكتى ايەلدىڭ دەنە شىنىقتىرۋمەن اينالىسۋىنىڭ جۇكتىلىك، بوسانۋ، بوسانۋدان كەيىنگى كەزەڭدەردىڭ دۇرىس وتۋىمەن قاتار دۇنيەگە دەنى ساۋ نارەستە اكەلۋدە ماڭىزى زور. تاجىريبەلىك بايقاۋلاردىڭ ناتيجەسىنە جۇگىنسەك، دەنە شىنىقتىرۋمەن جانە سپورتپەن شۇعىلدانعان ايەلدەردىڭ بوسانۋى جەڭىل ءارى ەشبىر ءقاۋىپسىز وتەتىن كورىنەدى. دەنە شىنىقتىرۋدىڭ ارقاسىندا جۇكتى ايەلدەردىڭ تىنىس الۋ، جۇرەك-قان تامىر جانە جۇيكە جۇيەلەرىنىڭ جۇمىسى جاقسارىپ، جىنىس جانە ىشكى اعزالارىنىڭ بۇلشىق ەتتەرى شىنىعىپ، بوسانۋ كەزىندە ەرىكسىز سوزىلۋىنا، بەلگىلى ءبىر ۋاقىتتان سوڭ قايتا قالپىنا كەلۋىنە مۇمكىندىك تۋادى. ءارتۇرلى دەنە شىنىقتىرۋ جاتتىعۋلارى قىناپتىڭ جانە ومىرتقانىڭ تومەنگى بولىگىندەگى بۇلشىق ەتتەردى شىنىقتىرادى، جۇكتىلىك كەزىندە ءىش قاتۋعا، ەتەككىر كەزىندەگى اۋىرسىنۋعا، جاتىر بەزدەرىنىڭ قابىنۋىنا جول بەرمەيدى. شىنىققان ايەلدەردە بوسانۋ كەزىندە قىناپتىڭ جىرتىلۋى، تاعى باسقا اسقىنۋلار سيرەك. سوندىقتان جۇكتىلىككە دەيىن دە، جۇكتىلىك كەزىندە دە، بوسانعاننان كەيىن دە دەنە شىنىقتىرۋمەن اينالىسقان ءجون. جۇكتى ايەلدىڭ دەنە شىنىقتىرۋدىڭ قانداي تۇرىمەن، قانشا مولشەردە اينالىسۋ كەرەكتىگىن دارىگەر انىقتاپ بەرەدى.

تومەندە كورسەتىلگەن جاعدايلاردا جۇكتى ايەلدەرگە دەنە شىنىقتىرۋمەن اينالىسۋعا بولمايدى:

1. قان اينالىمى وزگەرىسى بار جۇرەك-قان تامىرى اۋرۋلارىنىڭ بولۋى؛

2. بالا جولداسىنىڭ تەرىس ورنالاسۋى؛

3. جۇكتىلىك ۋىتتانۋىنىڭ (توكسيكوز) اۋىر ءتۇرى كەزىندە؛

4. تۇسىك ءقاۋپى بولعاندا؛

5. سۋ-ەگىز؛

6. ەگىز جۇكتىلىك؛

7. جاتىرداعى بالانىڭ تەرىس ورنالاسۋى؛

8. الدىڭعى جۇكتىلىك كەزىندە ايەل وتالاۋ ارقىلى بوساندىرىلعان بولسا.

32 اپتالىق جۇكتىلىككە دەيىن دەنە شىنىقتىرۋدىڭ 2 ءتۇرلى جولىمەن اينالىسۋعا بولادى:

1. مامان دارىگەرلەردىڭ باقىلاۋىمەن جۇكتى ايەلدەرگە كەڭەس بەرۋ ورىندارىندا توپتالىپ اينالىسۋ؛

2. ءاربىر جۇكتى ايەل ءوز ەركىمەن ۇيدە اينالىسا الادى.

دەنە شىنىقتىرۋ ۇزاقتىعى 15-20-30 مينۋت. جاتتىعۋدىڭ جەڭىل تۇرىنەن اۋىر تۇرىنە اۋىسىپ وتىرادى.

دەنە شىنىقتىرۋ كەزەڭدەرى:

1. 16 اپتالىق جۇكتىلىككە دەيىن؛

2. 16-21 اپتالىق جۇكتىلىك؛

3. 27-32 اپتالىق جۇكتىلىك؛

4. 32-36 اپتالىق جۇكتىلىك كەزىندە.

ن. ب. لي، جوعارى ساناتتى دارىگەر

---