InfoHub Logo

ەرتەدە جيرەنشە دەگەن شەشەن وتكەن ەكەن. ول ۇيلەنبەي تۇرعاندا ءبىر اداممەن كەزدەسىپ، ەكەۋى بىرگە جولعا شىعىپتى. جانىنداعى جولداسى قارت كىسى ەكەن. ءبىراز جول جۇرگەن سوڭ:

— اتا، جول قىسقارتايىق، — دەپتى جيرەنشە. شال مۇنى جاقتىرماي جاۋاپ قاتپاپتى. تاعى ءبىراز جۇرگەن سوڭ:

— ات اۋىستىرايىق، — دەيدى. ءبىراق شال جاۋاپ قاتپايدى.

ءتۇس كەزى بولىپ قالعاندا ولار ءبىر اۋىلدىڭ جانىنان كەلسە ءبىر توپ كىسى ءبىر ادامنىڭ ولىگىن الىپ بارا جاتىر ەكەن. شال ولگەن ادامدى تانيدى ەكەن. جيرەنشە شالدان:

— جاڭاعى ولگەن كىسى ءولى مە، ءتىرى مە؟ — دەپ سۇرايدى. شال جيرەنشەگە:

— ەگەر ولمەسە كومەر مە ەدى؟ — دەپ جەكىرەدى. ەندى جيرەنشە شالمەن ەرىپ كەتە بەرەدى. ول جولدا تاعى دا سۇراق قويادى.

— اتا، باۋىڭىز بار ما، ماۋەسىن جەدىڭىز بە؟ — دەيدى. شال جيرەنشەنى تەنتەك دەپ ويلاپتى. جيرەنشە دە شال قايدا بارسا سوندا بارۋعا بەل بايلايدى. كەش بولا ولار ءبىر اۋىلعا كەلىپ تۇسەدى. ءۇي شالدىڭ ءۇيى ەكەن. ولاردىڭ الدىنان جاس قىز جۇگىرىپ شىعىپ، شالدى اتتان تۇسىرەدى. جيرەنشەنى ۇيگە كىرگىزىپ، شالدىڭ جانىنا وتىرعىزادى. ول ول جاق، بۇل جاققا قاراپ، كۇبىرلەپ وتىرادى. «ءيا، ءوزى كوپ جاساعان ادام ەكەن. داۋلەتى دە، ساۋلەتى دە وزىنە دۇرىس ەكەن، ءبىراق تەرەزەسى ءسال قيسىق ەكەن»، — دەپتى. مۇنى ەستىگەن شال جيرەنشەنى ۇيىنەن قۋىپ شىعادى. قىز شالدان: «نەگە قۋىپ جىبەردىڭ؟» — دەپ سۇراپتى. شال قىزعا قاراپ:

— ءوزى ءبىر تەنتەك ەكەن. جولدا كەلە جاتقاندا «اتا، جول قىسقارتايىق» دەيدى. تاعى ءبىراز جۇرگەن سوڭ «ات اۋىستىرايىق» دەيدى. ونان وتكەن سوڭ ءبىر اۋىل شالى ولگەن ەكەن. «ول ءولى مە، ءتىرى مە» دەپ سۇرايدى. ول اۋىلدان وتكەن سوڭ «اتا، باۋىڭىز بار ما؟ ماۋەسىن جەدىڭىز بە» دەيدى. مىنە، ۇيگە كىرگەن سوڭ دا «داۋلەتى دە، ساۋلەتى دە كەلىسكەن ادام ەكەن. تەك تەرەزەسى ءسال قيسىق ەكەن» دەدى. مەن ونى ۇيدەن قۋىپ شىقتىم دەيدى.

قىز مۇنى ەستىپ بولعان سوڭ اكەسىنە ءبارىن ءتۇسىندىرىپ بەرەدى.

— جول قىسقارتايىق دەگەنى — اڭگىمە قىل جول قىسقارسىن دەگەنى. ات اۋىستىرايىق دەگەنى — اتىمىزدى قايتا ەرتتەپ مىنەيىك دەگەنى. ال شالدى ءولى مە، ءتىرى مە دەگەنى — ارتىندا پەرزەنتتەرى بار ما، جوق پا دەگەنى. باۋىڭىز بار ما دەگەنى — كەلىن ءتۇسىرىپ، قىز ۇزاتتىڭىز با دەگەنى. ال تەرەزەڭ قيسىق دەگەنى — ءوزىڭ شال بولساڭ دا ەش نارسە بىلمەيدى ەكەنسىڭ دەگەنى ەدى، — دەپتى قىزى اكەسىنە. مۇنى بىلگەن شال جيرەنشەدەن كەشىرىم سۇراپ، قىزىن ايەلدىككە بەرىپتى دەيدى.

---