InfoHub Logo

پرەزيدەنت قاسىم-جومارت توقايەۆ شەنەۋنىكتەرگە «كورپەگە قاراپ كوسىلۋدى» ەسكەرتكەن سوڭ، ءبىرقاتار مەملەكەتتىك شىعىندارعا قايتا قارالعانى بەلگىلى. سولاردىڭ قاتارىندا تۋريزم سالاسى دا بار. بيىل Kazakh Tourism ۇلتتىق كومپانياسىنا بولىنەتىن قاراجات 20 پايىزعا قىسقارتىلعان. بۇل تۋرالى Ulysmedia.kz ءتىلشىسى تۋريزم جانە سپورت ۆيسە-مينيسترى ەرجان ەركىنبايەۆتان سۇراپ ءبىلدى.

ۇلتتىق كومپانيا ءتوراعاسىنىڭ ورىنباسارى دانيەل سەرجان ۇلىنىڭ ايتۋىنشا، بيىلعى جىلى Kazakh Tourism-گە بولىنگەن قارجى وتكەن جىلمەن سالىستىرعاندا شامامەن 20 پايىزعا قىسقارعان. الايدا ناقتى ناتيجەلەر مەن كومپانيانىڭ تيىمدىلىگى تۋرالى سۇراققا اشىق مالىمەت بەرىلمەدى.

ۆيسە-مينيستر ەرجان ەركىنبايەۆ Kazakh Tourism-گە بولىنەتىن بيۋدجەتتىڭ سوڭعى جىلدارى ەداۋىر قىسقارعانىن اتاپ ءوتتى. ەگەر 2019 جىلى كومپانيانىڭ شىعىنى 3،2 ملرد تەڭگە بولسا، بيىل بۇل سوما 1،2 ملرد تەڭگەنى قۇراپ وتىر. بۇل — ءۇش ەسەگە جۋىق قىسقارۋ.

سالا ماماندارى بۇل قاراجاتتىڭ قانشالىقتى ءتيىمدى جۇمسالىپ جاتقانىن، ۇلتتىق كومپانيانىڭ ءتۋريزمدى دامىتۋداعى ناقتى ءرولىن جانە ينۆەستيسيالىق قايتارىمدىلىعىن ساراپقا سالىپ جاتىر.

قوعامدا بولىنگەن 1،2 ملرد تەڭگە ەلگە ناقتى تابىس اكەلىپ وتىر ما، الدە بۇل دا قاعاز جۇزىندەگى باستامالاردىڭ ءبىرى بولىپ قالا ما؟-دەگەن سۇراق تۋىنداپ وتىر.