«كەلەسى ايالداماعا جالعىز كەتىپ بارامىن…» تانىمال ازىلكەش مەرەكە قالبايەۆانىڭ جازباسى جۇرتتى الاڭداتتى

سوڭعى جاڭارتۋ

(وزگەرتىلگەن ۋاقىتى 2 ساعات بۇرىن)

05 تام. 2025 18:03
16

«كەلەسى ايالداماعا جالعىز كەتىپ بارامىن…» تانىمال ازىلكەش مەرەكە قالبايەۆانىڭ جازباسى جۇرتتى الاڭداتتى

تانىمال ازىلكەش ءارى اكتريسا مەرەكە قالبايەۆا الەۋمەتتىك جەلىدەگى جۇرەكجاردى جازباسىمەن جۇرتتى الاڭداتتى. ول Instagram پاراقشاسىندا كوز جاسىنا ەرىك بەرگەن ساتىنەن سۋرەتتەر جاريالاپ، جەكە ومىرىنە قاتىستى تۇسپالدى جازبا قالدىردى.

"كەيدە ومىردە مۇلدەم قالاماعان نارسەلەر ورىن الادى. ءبىراق امال جوق، قابىلدايسىڭ، ءارى قاراي ءومىر سۇرەسىڭ. كەلەسى ايالداماعا جالعىز كەتىپ بارامىن... دوستار، ازىرگە نە بولعانىن بۇكپەي ايتا المايمىن. ءبىراق ءبىر نارسەنى مويىندايمىن — كىنا وزىمنەن،" — دەپ جازدى ول.

ازىلكەش بۇل ساتتە وز-وزىنە كەلۋ ءۇشىن كوپشىلىككە ۋاقىت سۇراعانداي اسەر قالدىردى. جازباسىندا: "جىلاپ جاتاتىن ۋاقىت جوق، ءبىراق ايەل رەتىندە كوز جاسىممەن جەڭىلدەپ قالاتىنىم بار. مەن ءتىپتى شىڭعىرىپ جىلايمىن. ءتۇرىم وزگەرىپ كەتتى،" — دەگەن جولدار بار.

جەلى قولدانۋشىلارى مەرەكەنىڭ بۇل حابارى ونىڭ وتباسىلىق جاعدايىنا قاتىستى دەگەن بولجام جاساپ جاتىر. ايتا كەتەيىك، اكتريسا وزىنەن بىرنەشە جاس كىشى ارسەن اكييەۆكە تۇرمىسقا شىققان بولاتىن. ءقازىر ول Instagram پاراقشاسىنان كۇيەۋىمەن تۇسكەن بارلىق فوتو مەن ۆيدەولاردى ءوشىرىپ تاستاعان. بۇل جايت تا وقىرمانداردىڭ كۇدىگىن كۇشەيتە ءتۇستى.

ازىرگە مەرەكە قالبايەۆا بۇل جاعدايعا ناقتى تۇسىنىكتەمە بەرگەن جوق. جەلى قولدانۋشىلارى وعان قولداۋ ءبىلدىرىپ، سابىر تىلەۋدە.