InfoHub Logo

كەمبريدج ۋنيۆەرسيتەتى – ەۋروپاداعى ءىرى عىلىمي ورتالىق، ەجەلگى ۋنيۆەرسيتەتتەردىڭ ءبىرى. 1209 ج. ۇلىبريتانيادا لوندون قالاسىنان سولتۇستىككە قاراي 80 كم جەردە ورنالاسقان كەمبريدج قالاسىندا قۇرىلعان. XIII عاسىردىڭ وزىندە كەمبريدج ۋنيۆەرسيتەتىندە 4 فاكۋلتەت بولدى: گۋمانيتارلىق، زاڭ عىلىمى، ءدىنتانۋ (تەولوگيا)، مەديسينا. XVII ع-دا كەمبريدج ۋنيۆەرسيتەتى ءىرى عىلىمي ورتالىققا اينالدى. 1669 – 1702 ج. ي.نيۋتون كەمبريدج ۋنيۆەرسيتەتىنىڭ پروفەسسورى بولدى. 1837 ج. كەمبريدج ۋنيۆەرسيتەتىندە چ.دارۆين ماگيستر اتاعىن العان. كەمبريدج ۋنيۆەرسيتەتىنىڭ وزىندىك ەرەكشەلىگى – كۇنى بۇگىنگە دەيىن ءوزىنىڭ ورتاعاسىرلىق قۇرىلىمىن ساقتاعان. جاڭا ءتيپتى ۋنيۆەرسيتەتتەردەن كەمبريدج ۋنيۆەرسيتەتىنىڭ ايىرماشىلىعى – ول جەكە كوللەدجدەردەن تۇرادى. بۇگىندە ۋنيۆەرسيتەتتە 29 كوللەدج بار. ونىڭ ءارقايسىسىنىڭ ءوز كىتاپحانالارى جۇمىس ىستەيدى. ءار كوللەدجدە ءار ءتۇرلى فاكۋلتەتتەردەن 300 – 400 ستۋدەنت وقيدى. ۋنيۆەرسيتەتتى جوعارى بىلىكتى قىزمەتكەرلەردەن تاعايىندالاتىن كانسلەر باسقارادى. كەمبريدج ۋنيۆەرسيتەتىتىندە 600-دەن استام عىل. قىزمەتكەر مەن وقىتۋشىلار جۇمىس ىستەيدى. ۋنيۆەرسيتەت 25 ماماندىق بويىنشا عىلىمي اتاق بەرەدى. 2000 – 2001 جىلدارى كەمبريدج ۋنيۆەرسيتەتىنىڭ بارلىق كوللەدجدەرىندە 16 مىڭ ستۋدەنت جانە 400 بىرىكتىرىلگەن توپتا اسپيرانتتار وقىدى. كەمبريدج ۋنيۆەرسيتەتى عالىمدارىنىڭ عىل. جاڭالىقتارى 60 نوبەل سىيلىعىنا يە بولعان.

كەمبريدج ۋنيۆەرسيتەتى تەك انگليانىڭ عانا ەمەس، سونىمەن قاتار، الەمنىڭ ەڭ كونە جوعارعى وقۋ ورىندارىنىڭ ءبىرى. مۇندا وقىعاندارعا مانساپ جولىندا دا، جوعارى ايلىقتى قىزمەت جاعىنان دا شەكتەۋسىز مۇمكىندىكتەر بەرىلگەن. اتالعان وقۋ ورنىنان 15 اعىلشىن پرەمەر-مينيسترى، الەم ەلدەرىنىڭ 23 كوشباسشىسى، ءۇندىستاننىڭ 3 پرەمەر-مينيسترى، دانيا پاتشايىمى II مارگرەتا وقىپ شىققان. الەمدىك QS World University Rankings رەيتىنگىسى اتالعان ۋنيۆەرسيتەتتى 2010 جىلدىڭ ەڭ ۇزدىك جوعارى وقۋ ورنى دەپ تانىدى. ءتىپتى، ءوزىنىڭ باستى قارسىلاسى سانالاتىن گارۆارد ۋنيۆەرسيتەتى دە قالىپ قويدى. جەكەلەگەن سالالار بويىنشا وكسفورد، گارۆارد وقۋ ورىندارىنا ۇستەمدىك بەرگەنمەن، جالپى سالالار بويىنشا ەڭ ۇزدىك بولىپ سانالادى. الەمنىڭ 15000 مىڭنان استام عالىمدارى كەمبريدج ۋنيۆەرسيتەتىن عىلىمي زەرتتەۋ جوعارى دارەجەدە جۇرگىزەتىن كوشباسشى وقۋ ورنى دەپ تانىدى. ەكى جىل قاتارىنان جاراتىلىستانۋ عىلىمدارى سالاسىندا كوش باستاسا، Arts & Humanities ءبولىمى بويىنشا تەك وكسفورد ۋنيۆەرسيتەتىن العا جىبەردى، ال مەديسينا سالاسى بويىنشا گارۆاردتان قالادى. Social Sciences بولىمىندە – ءۇشىنشى بولسا، Technology & Engineering-دا الەمدە 4 ورىندا.

---