كەيدە كۇلكىلى سوزدەن دە ءتالىم الۋعا بولادى
ءبىر ادام قىزىن ەڭبەكشى ادامعا بەرەم دەپ، سۇراعان باي بالالارىنا بەرمەپتى. ءبىر كۇنى باشماق تىگىپ ساتاتىن ءبىر جاس جىگىت سۇراعان سوڭ، سوعان بەرىپتى. ول باشماقشى تاپقانىن اراققا سالىپ، كوڭىلىن كوتەرەتىن سورلى ەكەن. قىزدى العان سوڭ قىزىپ كەتىپ، اراق ءىشىپ، قىزۋ كۇنىندە قىزدى قۇشاقتاپ ەرنىنەن ءسۇيىپ، سورا-سورا قىزدىڭ ەرنىن قاناتىپ، سالبىراتىپ جىبەرىپتى. قىزدىڭ اكەسى قىزىن كورە كەلسە، قىزىنىڭ ەرنى سالبىراپ، قاناپ، قىزى جىلاپ وتىر ەكەن. كۇيەۋىنە: «مۇنىڭ قالاي؟» — دەپ ۇرىسسا، كۇيەۋى: «اتاتاي! جازا مەندە ەمەس، قىزىڭىزدىڭ ەرنى تىم قىزىل بولعاندىقتان، مەن بايعۇس داۋلەتىم ازدىعىنان تاپشى ساپيان كوزەلدەردى تىستەپ سوزىپ قالىپقا تارتۋشى ەدىم. قىزىڭىزدىڭ ەرنىن سورىپ جاتقاندا قىزىل ساپيان ەسىمە ءتۇسىپ، سول ەكەن دەپ تىستەپ سورىپ جىبەردىم. ەرنى ونشالىق قىزىل بولماسا، مەن سونشالىق سورار ما ەدىم»، — دەپتى. بۇل كۇلكى ءۇشىن ايتىلعان ءسوز ەمەس – ەڭبەكتىڭ دە ەڭبەگى بار. ورنىنا جۇمسالماعان ەڭبەك، زۇلىمدىققا جۇمسالعان اقىل وتقا تۇسكەن كوبەلەكپەن ءبىر ەسەپ.
You Might Also Like
-
قۇداي تاباراكا ۋاتاعالانىڭ بارلىعىنىڭ ۇلكەن دالەلى - نەشە مىڭ جىلدان بەرى اركىم ءارتۇرلى قىلىپ سويلەسە دە، ءبارى دە ءبىر ۇلكەن قۇداي بار دەپ كەلگەندىگى، ۋا ءھام نەشە مىڭ ءتۇرلى ءدىننىڭ ءبارى دە ءعادالات، م...
-
وتىرىكتەن ءتىلىن تيا الماعان ادام ارامدىقتان ىندىنىن تيا الماس. مەن زيانى تيەر دەپ كۇدىكتەنگەن كىسىمە &...
