InfoHub Logo

بۇگىنگى ءبىلىم بەرۋ جۇيەسىندە ءجيى ايتىلاتىن اششى شىندىق – «كەزىندە مۇعالىمنەن وقۋشى قورقاتىن، ءقازىر ءمۇعالىم وقۋشىدان قورقادى» دەگەن تىركەس. بۇل – جاي عانا ءسوز ەمەس، قوعامداعى تاربيە مەن ءتارتىپتىڭ، ءبىلىم مەن بەدەلدىڭ ارا سالماعىنىڭ وزگەرۋىن كورسەتەتىن ماڭىزدى سيگنال.

بۇرىن ءمۇعالىم – ءبىلىم مەن ءتارتىپتىڭ يەسى، وقۋشى ءۇشىن ۇلگى بولاتىن تۇلعا ەدى. سىنىپقا ءمۇعالىم كىرگەندە تىنىشتىق ورنايتىن، ايتقان ءسوزى زاڭمەن تەڭ سانالاتىن. وقۋشى ۇستازىن سىيلاپ، ايتقانىن بۇلجىتپاي ورىنداۋعا تىرىساتىن. ال اتا-انا مەكتەپپەن تىعىز بايلانىستا بولىپ، بالاسىنىڭ ءتارتىبى ءۇشىن ۇستازدىڭ سوزىنە قۇلاق اساتىن.

بۇگىندە بۇل جاعداي وزگەردى. ءقازىر ءمۇعالىم كەيدە وقۋشىنىڭ كوڭىلىنە قاراۋعا، ارتىق سويلەپ قويماس ءۇشىن ءسوزىن سۇزگىدەن وتكىزۋگە ءماجبۇر. سەبەبى ءبىر اۋىز ەسكەرتۋ ءۇشىن اتا-انادان، ءتىپتى قۇزىرلى ورگانداردان شاعىم ءتۇسىپ كەتۋى ابدەن مۇمكىن. بۇل – ءمۇعالىم بەدەلىنىڭ السىرەۋىنە اكەلگەن.

وقۋشىنىڭ قۇقىقتارى تۋرالى ءجيى ايتىلىپ، مىندەتتەرى نازاردان تىس قالىپ جاتىر. بۇل ءبىرجاقتى كوزقاراس بالا بويىنداعى تارتىپسىزدىك پەن جاۋاپكەرشىلىكتىڭ تومەندەۋىنە سەبەپ بولدى. ال ءمۇعالىم ءوزىن قورعاۋعا دارمەنسىز كۇيدە.

ماسەلەنىڭ تۇپ-توركىنى – مەكتەپتەگى تاربيە مەن وتباسىداعى تاربيەنىڭ ۇيلەسپەۋىندە. اتا-انا بالاسىن «مەنىڭ بالام كىناسىز» دەپ اقتاي بەرسە، ءمۇعالىم بەدەلىن ودان ءارى قۇلدىراتادى.

ءبىلىم ساپاسىن ارتتىرامىز دەسەك، ەڭ الدىمەن ءمۇعالىم مارتەبەسىن ناقتى ىسپەن كوتەرۋ كەرەك. ۇستاز – قوعامنىڭ تىرەگى. ۇستاز قورقاتىن ەمەس، قورعالاتىن، قۇرمەتتەلەتىن تۇلعا بولۋى ءتيىس. سوندا عانا وقۋشى دا، اتا-انا دا مەكتەپكە دەگەن جاۋاپكەرشىلىكتى سەزىنەدى.