InfoHub Logo

تاياۋ شىعىستا وت شارپىعان تىنىشتىق قايتا بۇزىلدى. يزرايل مەن يران اراسىنداعى شيەلەنىس قىزعان ساتتە الەم قاۋىمداستىعىنىڭ رەاكسياسى سىرتتاي سابىرلى، ال شىن مانىندە ەسەپكە قۇرىلعان. ايىپتاۋلار بار، ارەكەت جوق. قولداۋ كورىنبەيدى، ءبىراق كەدەرگى دە جاسالمايدى. بۇل – بۇگىنگى گەوساياسي تەاتردىڭ ايناسى.

ساۋد ارابياسى باستاعان مۇسىلمان ەلدەرى يزرايل شابۋىلىن مالىمدەمەلەرمەن سىناعانىمەن، شىندىق مۇلدە باسقا. ءيزرايلدىڭ اۋىر بومبالاۋشى ۇشاقتارى ساۋديا اسپانىندا ەمىن-ەركىن ۇشىپ، يران باعىتىنداعى اۋە قوزعالىسى تۇنشىقتىرىلۋدا. بۇل جاعداي ءبىر عانا ۇعىمدى انىقتايدى: سىرتتاي اشۋمەن بۇركەنىپ، ىشتەي مۇددەنى ساقتاۋ.

يوردانيا دا ءدال وسى جولمەن ءجۇر. يزرايل ۇشاقتارىنا جاسىل ءدالىز اشقانىمەن قويماي، يران باعىتىنداعى درونداردى دەر كەزىندە قاعىپ ءتۇسىرىپ وتىر. ال سيريا – سوعىستان كوز اشپاعان ەل – جاڭا باسشىلىعى ارقىلى يزرايلگە كومەك قولىن سوزىپ وتىر دەگەن مالىمەتتەر تارادى. گەوساياسي بەتبۇرىستىڭ تاعى ءبىر نۇكتەسى.

ءبىراق يران ءۇشىن ەڭ اۋىر سوققى — سەنىمدى سەرىكتەردىڭ ۇنسىزدىگى. رەسەي مەن جۇڭگو – تەگەراننىڭ ستراتەگيالىق ارىپتەستەرى سانالاتىن الپاۋىتتار. الايدا ولار بۇل جولى مالىمدەمەدەن ارى اسپادى. الەمدىك ارەنادا ديپلوماتيالىق تىنىشتىق يراننىڭ وقشاۋلانۋىن ودان ءارى تەرەڭدەتە ءتۇستى.

يران وسىعان دەيىن اقش-پەن تەكە-تىرەسكە تۇسكەن ەلدەردىڭ تاعدىرىن جاقسى بىلەدى. ساددامنان كەيىنگى يراك قيرادى. كاددافيدەن كەيىن ليۆيا بولشەكتەندى. اۋعانستانعا ورناعان "دەموكراتيا" ءبىر تۇندە تىپ-تيپىل بولدى. بۇل جولى تاريح قايتالانا ما، جوق پا — جاۋابى تەك ۋاقىتتىڭ ەنشىسىندە.