كوتىبار باتىردىڭ اسى
كوتىبار باتىر ولەرىندە بالالارىنا وسيەت ايتىپ: «مەنىڭ اسىما ءۇش ءجۇزدى تۇگەل شاقىر، كىمنىڭ اتى بايگەدەن كەلسە، اتتىڭ باس بايگەسىن بولەك، مەنىڭ بايگە كۇرەڭىمنىڭ جابۋى مەن ءوزىمنىڭ قاراشولاق ناركەسكەنىمدى سول ات يەسىنە ەرەككە بەر»، — دەگەن ەكەن. كەنەسارى باستاعان ارعىن ەلى اسقا بارىپ، اعىبايدىڭ اقبەستى اتىن بايگەگە قوسىپ، ءۇش ءجۇز اتتىڭ الدىندا جەكە كەلگەن ەكەن. اتاسىنىڭ وسيەتى بويىنشا بايگە كۇرەڭ اتتىڭ جابۋى مەن ناركەسكەن قارا شولاق قىلىشتى اعىباي باتىرعا بەرگەن ەكەن. مۇنى كەنەسارى ەستىپ: «كوسەگە بارشى ەرەگىنىڭ ءبىرىن بەرسىن»، — دەيدى.
اعىباي: «اتتىڭ باس بايگەسى ايعىر ءۇيىرى قىسىراق، ماساتى كىلەم جاپقان تايتۇياق جامبى، موينىندا تۇمارى بار قارا بۇيرا نار، تاعى-تاعىلار. كەنەسارى حان قولىندا ەمەس پە، بۇل ەرەكتى بەرمەيمىن» دەسە، كەنە حان جانە بىرەۋدى جىبەرىپ: «كوسە، دۇنيەقور ەمەس ەدى عوي، قالاي بەرمەدى؟» — دەگىزەدى.
سوندا اعىباي باتىر اشۋلانىپ: «باس بايگە قولىندا، ءبىر جەلدىك پەن ءبىر كەزدىك اعىبايدىڭ قويىنى مەن قونىشىنا سىيمايدى دەپ وتىر ما، بەرمەيمىن!» — دەگەن ەكەن. ويتكەنى: كوتەكەڭ: «وسى ەرەكتى العان ادامدى مەنىڭ ءارۋاعىم قوسا جەبەيدى، ءوزى دە كەم كىسىگە كەز بولماس!» — دەپتى. ءسويتىپ، اعىباي باتىرعا ەكى ەردىڭ ءارۋاعى قونىپ «اقجولتاي» اتانادى، ءۇش جۇزگە اتى تۇگەل جايىلعان ەر بولادى.
وقۋعا كەڭەس بەرەمىز:
ناۋرىزبايدىڭ جولبارىستى ءولتىرۋى
قۇرمانقۇلدىڭ ناۋرىزبايدىڭ ەرلىگىنە ريزا بولۋى
