ليۆيا ماڭىندا قازاقستان مۇنايىن تاسىمالداعان تانكەردە جارىلىس بولدى
ليۆيا جاعالاۋىندا ءبىر ميلليون باررەلگە جۋىق مۇناي تيەلگەن Vilamoura تانكەرىندە جارىلىس بولدى. كەمە گرەكيالىق TMS Tankers كومپانياسىنا تيەسىلى. الدىن الا اقپاراتقا سۇيەنسەك، تانكەردىڭ ىشىندە قازاقستان مۇنايى بولعانى ايتىلىپ وتىر.
جارىلىس سالدارىنان كەمەنىڭ ماشينا بولىگىندە قۇرىلىمدىق زاقىم تىركەلگەن. كومپانيا وكىلدەرى كەمەنىڭ كورپۋسىندا تەسىك پايدا بولىپ، ماشينا ءبولىمىن سۋ باسقانىن حابارلادى. سوعان قاراماستان، مۇناي توگىلمەگەن، ەكولوگيالىق زالال انىقتالماعان. ەكيپاج مۇشەلەرى دە امانساقتالىپ، مەديسينالىق كومەككە مۇقتاج بولماعان.
جارىلىستىڭ ناقتى سەبەبى ازىرگە بەلگىسىز. TMS Tankers باسپا ءسوز قىزمەتى اپات ورنىندا تەكسەرىس جۇرگىزىلىپ جاتقانىن، ءبىراق تەحنيكالىق اقاۋ نەمەسە سىرتقى فاكتورلار دا قاراستىرىلىپ جاتقانىن حابارلادى. كەمەنى تولىق تەكسەرۋ ءۇشىن ونى جاقىن ارادا گرەكياعا جەتكىزۋ جوسپارلانىپ وتىر. سول جەردە زالال كولەمى مەن قالپىنا كەلتىرۋ مۇمكىندىكتەرى انىقتالادى.
Vilamoura تانكەرى بۇعان دەيىن قازاقستان مۇنايىن رەسەي پورتتارى ارقىلى تاسىمالداۋمەن اينالىسقان. اشىق ناۆيگاسيالىق دەرەكتەرگە سايكەس، كەمە 2025 جىلدىڭ ساۋىرىندە رەسەيدىڭ ۋست-لۋگا پورتىندا بولعان. بۇل پورت ارقىلى قازاقستان مۇنايى ەۋروپا نارىعىنا جونەلتىلەدى. مامىر ايىندا تانكەر كاسپيي قۇبىر كونسورسيۋمىنىڭ نوۆوروسسييسكىدەگى تەرمينالىنا توقتاعان. ەكى جاعدايدا دا تانكەرگە قازاقستان اۋماعىنان شىققان مۇناي تيەلگەنى حابارلانعان.
بۇل وقيعا قازاقستان مۇنايىن تەڭىز ارقىلى تاسىمالداۋ قاۋىپسىزدىگىنە قاتىستى سۇراقتار تۋىنداتىپ وتىر. ساراپشىلار بۇعان دەيىن دە تەڭىز تاسىمالى كەزىندە قاۋىپسىزدىك، ەكولوگيا جانە تەحنيكالىق جاعدايلارعا بايلانىستى ءبىرقاتار قاۋىپ-قاتەر بارىن ايتقان ەدى.
قازىرگى ۋاقىتتا قازاقستان تاراپىنان بۇل وقيعاعا قاتىستى رەسمي تۇسىنىكتەمە بەرىلگەن جوق. ەنەرگەتيكا مينيسترلىگى نەمەسە «قازمۇنايگاز» ۇلتتىق كومپانياسى تاراپىنان ازىرگە ەشقانداي مالىمدەمە جاسالمادى. بۇل وقيعا ەل ىشىندە دە، سىرتقى نارىقتا دا مۇناي ەكسپورتىنا قاتىستى الاڭداۋشىلىق تۋعىزۋى مۇمكىن.
You Might Also Like
-
تۇركيا تاياۋ شىعىستاعى قاقتىعىستا بىتىمگەر بولۋعا دايىن – ەردوعان
-
قىزىلورداداعى تۇزەتۋ مەكەمەسىندە جازاسىن وتەپ جاتقان جۋرناليست جانە بەلسەندى دۋمان مۇحاممەدكارىمنىڭ دەنساۋلىعى كۇرت ناشارلاعان. بۇل تۋرالى ونىڭ ادۆوكاتى عالىم نۇرپەيىسوۆ مالىمدەدى.
