م. ابەنوۆ ازاماتتارى جۇمىستى شەرتىپ ءجۇرىپ تاڭدايتىن ايماقتاردى اتادى
ون جىلدان كەيىن باتىس قازاقستان، اقتوبە، قوستاناي، قاراعاندى، اقمولا، سولتۇستىك قازاقستان، پاۆلودار جانە شىعىس قازاقستان وبلىستارىندا حالىقتىڭ سانى ازايادى. سولاردىڭ ىشىندە ەڭبەككە جارامدى ازاماتتار 10-17 پايىزعا دەيىن تومەندەيدى. وسىعان بايلانىستى «سەرپىن -2015» باعدارلاماسىن جان-جاقتى دامىتىپ، ادام سانى كوپ وبلىستاردا تۇراتىن جاستاردى اتالعان ايماقتارعا كوپتەپ كوشىرۋ كەرەك. ونسىز ول وڭىرلەردىڭ ەكونوميكالىق دامۋى تەجەلەدى، دەپ حابارلايدى قازاقپارات.
«جۇمىسقا جارامدى ازاماتتار ازايعان سايىن جۇمىستىڭ كورسەتكىشى تومەندەيدى. دەمەك، بەلگىلى ءبىر جۇمىس توبىن الماستىراتىندار جوق. ءقازىردىڭ وزىندە مەكتەپتەر، اۋرۋحانالار سياقتى بيۋدجەتتىك مەكەمەلەردە ادام تابىلماي جاتىر. وڭتۇستىكتە ونداي جۇمىس تابىلسا، حالىق سانى ازايىپ كەلە جاتقان ايماقتاردا مامان تاپشى. ءتىپتى، جاستار ارزان قىزمەتكە بارعىسى كەلمەيدى. سونىڭ سالدارىنان بيزنەس تە دامىمايدى. ال بيزنەس قاي جەردە داميدى؟ ادام سانى كوپ جەردە داميدى. سەبەبى ونداي ورتادا باسەكەلەستىك بار. ماسەلەن، ءبىز ريددەر قالاسىندا بولدىق. ول قالادا 65 مىڭ ادام تۇرادى. بار بولعانى 126 ادام جۇمىسسىز ءجۇر. سولاردىڭ ارتىنان جۇگىرەمىز دەيدى، جۇمىس ىستەشى، 60 مىڭعا ەڭ بولماسا، كوشە سىپىر دەپ. جاڭا اۆتوبۋس بوس تۇر. 150 مىڭ ايلىق، ەشكىم جۇمىس ىستەگىسى كەلمەيدى. پوليسياعا باراتىن ادام جوق. وسىلايشا، حالىق اراسىندا باسەكەلەستىك بولماعاسىن، نارىق تومەندەيدى»، - دەدى «سەرپىن-2050» الەۋمەتتىك جوباسى بويىنشا رەسپۋبليكالىق ۇيلەستىرۋ كەڭەسىنىڭ ءتوراعاسى مۇرات ابەنوۆ.
ونىڭ ايتۋىنشا، بولاشاقتا اتالعان ايماقتاردا قانشا وندىرىستىك وشاق اشامىز دەسەك تە، سونىڭ بارلىعىن ىسكە قوسا المايمىز. سەبەبى جۇمىس ىستەيمىن دەۋشىلەردىڭ قاتارى سيرەپ جاتىر. اتالعان ماسەلەنى شەشۋ ءۇشىن مامانداردى سىرتتان اكەلۋ كەرەك، يا بولماسا، «سەرپىن-2050» باعدارلاماسى اياسىندا ىشكى كوشى-قوندى كۇشەيتۋ كەرەك.
«سوندىقتان قازىرگى كەزدە ءبىز ادام سانى كوپ ايماقتاردا تۇراتىن جاستاردى ەرتەرەك كوشىرىپ، سول جەرلەردە بەيىمدەلۋىن قامتاماسىز ەتپەسەك، ەرتەڭ ەكونوميكالىق عانا ەمەس، ءتىپتى ساياسي-الەۋمەتتىك پروبلەمالارعا دا تاپ بولامىز. ءقازىردىڭ وزىندە كەيبىر جەرلەردە مەكتەپ وقۋشىلارى ءۇش اۋىسىممەن وقيدى، بالاباقشادا ورىن جوق، كوللەدجدەردە ورىن جەتىسپەيدى. ماسەلەن، قىزىلوردا وبلىسىندا 100 بالا وقۋدى بىتىرسە، 17-اق بالاعا كوللەدجدە ورىن بار. ارينە، جۇمىسسىزدىق وسىدان تۋىندايدى. ال شىعىس قازاقستان وبلىسىندا بۇدان بەس جىل بۇرىن كوللەدجدەردە 17 مىڭ ادام وقىسا، ءقازىر 10-اق مىڭ ادام ءبىلىم الادى. وقيتىن بالالار جوق. بۇگىندە كوبىسى «سەرپىن» باعدارلاماسى وڭتۇستىك وڭىرلەرگە ارنالدى دەپ ويلايدى. استە ولاي ەمەس. اتالعان باعدارلاما بارلىق ايماقتارعا ارنالعان. وسىنى قوعامعا دۇرىس ءتۇسىندىرۋىمىز كەرەك»، - دەپ اتاپ كورسەتتى م.ابەنوۆ.
You Might Also Like
-
الەۋمەتتىك جەلىلەردە پايدا بولعان «لايك» ادام عۇمىرىن بوسقا ولتىرەتىن قۇبىلىسقا اينالدى دەپ حابارلايدى ايقىن باسىلىمى.
