ماكەدونيادا قازاقستان ادەبيەتى مەن مادەنيەتى ورتالىعى اشىلدى
ماكەدونيا استاناسى سكوپەدەگى «قاسيەتتى كليمەنت وحريدسكيي» ۇلتتىق ۋنيۆەرسيتەتتىك كىتاپحاناسىندا قازاقستان ادەبيەتى مەن مادەنيەتى ورتالىعى اشىلدى، دەپ «قازاقپارات» قازاقستاننىڭ ماجارستانداعى ەلشىلىگىنە سىلتەمە جاساپ حابارلايدى.
ورتالىقتىڭ اشىلۋ ءراسىمى 19 جەلتوقسان كۇنى ءوتتى.
«وسى كىتاپحانانىڭ قورىنا قازاقستان ۇلتتىق اكادەميالىق كىتاپحاناسى قازاق، ورىس جانە اعىلشىن تىلدەرىندە جازىلعان 100-دەن استام كوركەم، عىلىمي-پۋبليسيستيكالىق، ت.ب. كىتاپ بەردى»، - دەلىنگەن حابارلامادا.
ورتالىق قازاقستاننىڭ ادەبي مۇراسىن ناسيحاتتاۋعا، حالىقارالىق مادەني بايلانىستاردى دامىتۋعا سەپتىگىن تيگىزەدى. شارادا قازاقستان ۇلتتىق اكادەميالىق كىتاپحاناسى مەن «قاسيەتتى كليمەنت وحريدسكيي» ۇلتتىق ۋنيۆەرسيتەتتىك كىتاپحاناسىنىڭ اراسىندا ءوزارا تۇسىنىستىك جانە ىنتىماقتاستىق مەموراندۋمىنا قول قويىلدى.
شارانى قازاقستان ۇلتتىق اكادەميالىق كىتاپحاناسى قازاقستاننىڭ ماجارستانداعى ەلشىلىگىنىڭ قولداۋىمەن مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدالامالىق ماقالاسىندا ۇسىنىلعان «جاھانداعى زاماناۋي قازاقستاندىق مادەنيەت» جوباسىنا سايكەس ۇيىمداستىردى.
قازىرگى كەزدە وسىنداي ورتالىقتار جۇڭگو، رەسەي، تۇركيا، ماجارستان، فينليانديا، وڭتۇستىك كورەيا، مالايزيا، شۆەسيا، فرانسيا، جاپونيا، بولگاريا، چەحيا جانە تمد ەلدەرىنىڭ ۇلتتىق كىتاپحانالارىندا اشىلعان
You Might Also Like
-
قىزىلوردا قالاسى №101 ءا.ءمۇسىلىم ۇلى اتىنداعى مەكتەپ-ليسەيدىڭ 3 «ۆ» سىنىپ وقۋشىسى وتەش ارۋجان جەتەكشىسى: وسپانوۆا راحيما نەسىپباي قىزى
