InfoHub Logo

ماقتا، قوزا — قۇلقايىر تۇقىمداسىنا جاتاتىن كوپ جىلدىق باعالى تالشىقتى داقىل. ماقتانىڭ 35 ءتۇرى بار، ونىڭ 5 ءتۇرى قولدان وسىرىلەتىن ءبىر جىلدىق شوپتەسىن وسىمدىكتەردىڭ ءبىر تۋىسى. نەگىزىنەن، تروپيكتىك جانە سۋبتروپيكتىك ايماقتاردا وسىرىلەدى. قازاقستاندا 1928 جىلى العاش رەت ماقتا وسىرۋمەن اينالىساتىن قازىرگى وڭتۇستىك قازاقستان وبلىسىندا ماقتاارال اۋدانى قۇرىلدى. ماقتانىڭ بيىكتىگى 1-1،5 م، 1-2 نەگىزگى بۇتاقتان 10-15 جاناما بۇتاقتار تارايدى. گ ۇلى جەكە، ءىرى، سارى نە اق ءتۇستى، ساباعى 90-130 سم-گە جەتەدى، جاپىراعى جۇرەك ءپىشىندى. جەمىسى 3-5 ۇيالى قاۋاشاق، ىشىندە تالشىق، ورتاسىندا 20-40 ماقتا تۇقىمى بولادى. ماقتا جارىقتى، جىلۋدى، ىلعالدى كوپ قاجەت ەتەدى. تۇقىمى 10-12°س-تا ونە باستايدى، 25-30°س-تا جاقسى وسەدى، 0°س-تا ۇسىككە شالدىعادى. سۋارمالى جەرلەردە جوعارى ءونىم بەرەدى. 1 توننا ءشيتتى ماقتادان 330-360 كگ تالشىق (بۇدان 3000 م ماتا توقىلادى)، 100-110 كگ تاعامدىق، تەحنيكالىق ماي، 30-40 كگ قىسقا تالشىق، 550-580 كگ تۇقىم الىنادى. تۇقىمىنىڭ قۇرامىندا 20-25% ماي بولادى. 1 توننا ماقتا تۇقىمىنان 170 كگ ماقتا مايى، 400-420 كگ كۇنجارا، 300 كگ قاۋىز، ماقتا مامىعى، وليفا، گليسەرين، ت.ب. قۇندى ءونىم الىنادى. ماقتا – توقىما ونەركاسىبىندەگى نەگىزگى شيكىزات.

ماقتانىڭ ۇزىن تالشىقتارىنان ءتۇرلى ماتالار — باتەس، ساتەن، ماركيزات توقىلسا، قىسقا تالشىقتارىنان سەلليۋلوزا، پلاستماسسا، فوتوپلەنكا، دارىلىك ماقتا، جانعىش پىلتە، جاساندى جىبەك ءجىپ، ت.ب. الىنادى. ماقتا مايى تاماق، كونسەرۆى، پارفيۋمەريا ونەركاسىپتەرىندە، ال تۇقىم قالدىعىنان ەتيل، مەتيل سپيرتتەرىن، لاك، قاعاز، ورگانيكالىق قىشقىلدار، سەلليۋلوزا، ت.ب. الۋعا بولادى. ساباعى وتىن رەتىندە پايدالانىلسا، كۇنجاراسىنان مال ازىعى الىنادى. قازاقستاندا، نەگىزىنەن، وڭتۇستىك قازاقستان وبلىسىندا وسىرىلەدى. نەگىزگى زيانكەستەرى: ورمەكشى كەنەسى، ماقتا جانە كۇزدىك قوڭىر كوبەلەكتەردىڭ جۇلدىزقۇرتتارى، شەگىرتكە.

وقۋعا كەڭەس بەرەمىز:

ماقتا ءوسىرۋ تەحنولوگياسى

---