مەنىڭ سۇيىكتى ءبىلىم وردام
بۇگىنگى كۇن كەشەگى كۇننىڭ شاكىرتى ەكەنى بەلگىلى. مەن بۇگىنگى تاڭدا ەلوردامىزداعى ەڭسەلى وقۋ ورداسى ەۋرازيا ۇلتتىق ۋنيۆەرسيتەتىنىڭ 4-كۋرس ستۋدەنتىمىن. كۇنى كەشە عانا ۇلتتىق ءبىرىڭعاي تەستىلەۋدەن وبلىس بويىنشا ەڭ جوعارعى ناتيجەگە قول جەتكىزىپ، مەكتەپ تاريحىنداعى تۇڭعىش «التىن بەلگى» يەگەرى اتانعان جاس تۇلەك ەدىم. ارمانىم استانادا وقۋ بولاتىن. ورىندالدى.
وردالى وقۋ ورنى دا بار وسىندا،
ارمانداعان قۇربى-قۇرداس، دوسىم دا.
باعىم جانىپ، ءبىلىم الىپ كەلەمىن
ابىرويمەن اياقتاسام، تىلەگىم!
دەپ ولەڭ دە شىعارىپ ۇلگەرىپپىن. ابىرويمەن اياقتاۋعا دا ساناۋلى كۇندەر قالدى. قيمايمىز. ويتكەنى، ەستەن كەتپەس ەرەكشە ەستەلىكتەر سىيلادى، تانىمال تۇلعالارمەن تانىستىق، سۇحباتتاستىق، سىرلاستىق.
ۇلگىلى، ۇزدىك ستۋدەنت بولۋدى ماقسات تۇتقان مەنىڭ مەكتەپ كەزىندەگى جەتكەن جەتىستىكتەرىم ءوز جەمىسىن بەرە باستادى. وقۋ جىلى باستالعان ۋاقىتتا ستۋدەنتتەر سپارتاكياداسىندا گىر تاسىن كوتەرۋ سايىسىندا جۇلدەلى ەكىنشى ورىنعا يە بولدىم. كوپ ۋاقىت وتپەي فاكۋلتەتتەگى «ءبىزدىڭ ماقتانىشتارىمىز» تاقتاسىندا، الەمگە ايگىلى بوكسشى گ.گولوۆكينمەن سۋرەتىم قاتار تۇردى. كەۋدەمدى قۋانىش كەرنەپ، ستۋدەنتتىك ءومىردىڭ ساۋلەلى ساتتەرى باستالىپ تا كەتتى.
ۋنيۆەرسيتەتىمىزدىڭ «ەۋرازيا» گازەتىنە بىرنەشە ماقالالارىم جارىق كورە باستادى. عىلىمي كونفەرەنسيالاردان دا جەڭىمپاز اتانىپ ۇلگەردىم، دەگەنمەن كوڭىلىم قالاعان تاعى ءبىر سالا ونەر ەدى. كاستينگتە وقۋشى كەزىمدە ويناعان نەمىستىڭ ءرولىن تاعى ءبىر مارتە سومدادىم، ولەڭ وقىدىم. ونەرىمدى باعالادى. سولاي، «شاڭىراق» ستۋدەنتتىك تەاترىنىڭ مۇشەسى اتاندىم. جاستار جىلىندا «ۇزدىك جاستار تەاترى» نوميناسياسىن جەڭىپ الدىق. «بالا عاشىق»، «جارالى گۇلدەر»، «اداسپاڭدار» سپەكتاكلدەرىندە وينادىم. «ەر جىگىت-2018» بايقاۋىنا قاتىستىم. بىرنەشە اقىنداردىڭ ولەڭدەرىن جاتقا وقىپ، باتاسىن دا الدىم. ەلگە تانىمال تۇلعالارمەن، دەپۋتات، مينيسترلەرمەن قاتار، انشى-كۇيشىلەرمەن، ونەر جۇلدىزدارىمەن، سپورتشىلارمەن، عالىمدارمەن كەزدەسىپ، ومىرلىك اقىل-كەڭەستەرىن تىڭداۋ باقىتى بۇيىردى.
ەلىمىزدىڭ تاريحىندا ەرەكشە ورىن الار «ەحرو-2017» حالىقارالىق كورمەسى كەزىندە ۋنيۆەرسيتەت قولداۋىمەن ەرىكتى بولىپ ايتۋلى شاراعا ءوز ۇلەسىمدى قوسقانىمدى ماقتانىشپەن ەسكە الامىن.
ستۋدەنت اتانعالى ءبىر ارمانىم – اسكەري كافەدراعا ءتۇسۋ بولسا، ەكىنشىسى – شەتەلگە شىعۋ بولاتىن. ارينە، الدىمەن اللانىڭ قالاۋىمەن ارماندارىم ورىندالىپ كەلەدى. ەكى جىلدىق اسكەري كافەدرادا، ۆزۆود كومانديرى بولعانىمدى ەسكەرىپ، اقىلى بولىمنەن تەگىن بولىمگە اۋىستىردى، زاپاستاعى لەيتەنانت شەنىمىز دە بولادى. كەيىن، تۇرىك ءتىلى كۋرسىنا جازىلدىم. تۇركيا ەلىنە قورىتىندى كۋرسقا باردىم. وقۋ دەنيزلي قالاسىندا بولدى، انتاليا، يزمير، كاپادوكيا، ستامبۋل قالالارىن ارالاپ، تۇرىك مادەنيەتىمەن تانىستىم.
«BILIM-ORKENIETI» ۇلتتىق عىلىمي-زەرتتەۋ ورتالىعى ۇيعارىمى بويىنشا «قازاقستاننىڭ ۇزدىك ستۋدەنتى-2020» توسبەلگىسىنىڭ يەگەرى اتاندىم.
ستۋدەنتتىك ءتورت جىلىم تەككە وتپەدى دەپ سانايمىن. ەرەكشە ەستەلىكتەر مەن مول مۇمكىندىكتەر سىيلاعان ەۋرازيا ۇلتتىق ۋنيۆەرسيتەتى – سۇيىكتى ءبىلىم وردام رەتىندە جۇرەك تورىنەن ورىن الارى ءسوزسىز! راقمەت ساعان ەۇۋ! مەن سەنىمەن ماقتانامىن. سەن دە مەنىمەن ماقتاناتىن بولاسىڭ!!!
قالىبەك قۇلشار
You Might Also Like
-
ون بەس جاسىندا جيرەنشە ناعاشىسىن ىزدەپ بارا جاتىپ، ءبىر تۇيە باققان ادامعا جولىعىپ، بۇنى سۇراپ تۇرعان جەرى جاڭادا عانا كوشكەن اۋىلدىڭ جۇرتى بولادى. جيرەنشە جۇرتقا قاراپ تۇرىپ:
-
ادام بالاسىنىڭ ءبىلىم الۋ ساتىسىندا ەكى جاۋاپتى كەزەڭ بار. ارينە ولار مەكتەپ جانە ۋنيۆەرسيتەت. بالالىق شاعىڭ، نەگىزگى ءبىلىمىڭ مەكتەپتە وتسە، ونىڭ دامۋى ەكىنشى كەزەڭدە جالعاسپاق. بۇل سەنىڭ جاڭا...
