ءمۇعالىم
كۇن ارقان بويى كوتەرىلگەن تۇستا ۇشەۋى قول ۇستاسقان كۇيى ۇلكەن شاتىرلى، ەڭسەلى ءۇي الدىنداعى الاڭعا جينالدى. كۇندەگى ادەتتەرى وسى. بەينە ءبىر ۋادەلەسىپ قويعان دەرسىڭ. سودان سوڭ تۇس-تۇستان وزدەرى شامالاس وزگە قۇربىلارى كەلىپ قوسىلادى. ەش نارسەدەن الاڭسىز. كوپ ۇزاماي وزدەرىنىڭ سۇيىكتى ويىندارىن باستاي جونەلەدى.
— كانە، بالالار، تىنىش وتىرىڭىزدار !— قاز-قاتار وتىرا قالعان بالالار جاڭا عانا وزدەرىمەن ءبىر جۇرگەن ءساليمانىڭ اپ-ساتتە ءمۇعالىم بولىپ الدارىندا تۇرعانىنا تاڭدانبايدى. ايتتى ما، ءبىتتى. ورىندايدى. كۇنى بويى شۋلاپ وتىرعان بالالار ساپ تىيىلادى.
— بۇگىن كىم جوق ساباقتا؟ — قولىنداعى وقۋلىعى دا، جۋرنالى دا — سىرتقى مۇقاباسى جىرتىلعان «الىپپەگە» ءۇڭىلدى.
— ءبارى دە تۇگەل. — بالالار تاعى دا شۋ ەتە قالدى.
— ءجا، شۋلاماڭدار، تۇگە. نەمەنە سونشالىقتى. بىرەۋىڭ ايتساڭدار دا جەتەدى.— بۇل ءساليمانىڭ بىرىنشىدە وقيتىن اسقار اعاسى ايتىپ وتىراتىن ءباتيما اپايعا ەلىكتەپ، قاتال بولعانى. ول اپايىن كورگەن ەمەس، ءبىراق سونشالىقتى كورگىسى كەلەدى. قانشا رەت مەكتەپكە ەرتىپ بار دەپ وتىنسە دە، اسقار مۇنىڭ سوزىنە قۇلاق اسپادى. «ءالى كىشكەنتايسىڭ، ەرتەڭ-اق ءوزىڭ وقۋعا بارعاندا كورەسىڭ»،— دەيدى ارى-بەرىدەن سوڭ.
— كانەكەي، كەشەگى وتكەن تاقپاعىمىزدى تاعى قايتالايىق.
وسىدان سوڭ ءبارى «ءارقاشان كۇن سونبەسىن» ءانىن ايتادى. ازىرگە بىلەتىندەرى دە وسى ءان عانا. ءتىپتى ساباق باستالعالى ايتىپ كەلەدى.
ءان بىتىسىمەن، ءارقايسىسى ورتاعا شىعىپ، بىلەتىن تاقپاقتارىن ايتادى. ناعىز قىزىق وسى جەردەن باستالدى. بۇرىنعىداي ەمەس، وقۋشىلار ۋلاپ-شۋلاپ، ءساليما مۇعاليمانىڭ ايتقانىنا كوڭىل دە بولمەيدى. ءوز وقۋشىلارىنىڭ ءتارتىپسىز قىلىعىنا رەنجىگەن سىڭايدا قاتال بولا قالادى دا:
— جارايدى، بۇگىنگە وسى وقىعانىمىز جەتەر. تارايمىز، — دەيدى. وسى ءسوزدى كۇتكەندەي ءبارى دە ورىندارىنان شۋ ەتىپ ورە تۇرەگەلەدى.
— ەرتەڭ ساباققا قالماي كەلىڭدەر.
ەڭ الدىدا بارا جاتقان ءساليما «ءمۇعالىمنىڭ» مىنا ءسوزىن ءبىرى ەستىسە، ءبىرى ەستىمەي دە قالادى. الايدا ەرتەڭىنە ولاردىڭ تۇگەلىمەن «ساباقتا» وتىرعانىن كورەسىڭ.
You Might Also Like
-
2020 جىلى ۇلى ويشىل، شىعىستىڭ اريستوتەلى اتانعان، اتاقتى جەرلەسىمىز ءابۋ ناسىر مۇحامەد يبن تارحان يبن ۋزلاگ ءال-فارابيدىڭ تۋعانىنا 1150 جىل تولادى.
-
— سوندا قالاي؟ ماعان ايتاتىن باسقا ءسوزىڭ جوق بولعانى ما؟ — دەپ ايجان جالىندى.
