مۇعالىمدەر تۇلەكتەردى ۇبت پۋنكتتەرىنە جەتكىزۋگە مىندەتتى مە
ءماجىلىس دەپۋتاتى يرينا سميرنوۆا ۇبت مەن ءمۇعالىم مارتەبەسىنە قاتىستى ۇكىمەت باسشىسىنىڭ اتىنا دەپۋتاتتىق ساۋال جولدادى.
«ءمۇعالىم مارتەبەسى وسىعان دەيىن قوعامدا كوپ رەت تالقىلانعانى بەلگىلى. الايدا ءبىلىم جانە عىلىم مينيسترلىگىنىڭ، اكىمدىكتەردىڭ مۇعالىمگە دەگەن قولايلى جۇمىس كۇشى مەن كوپشىلىك شارالارعا جۇمىلدىرۋ سەكىلدى قارىم-قاتىناسى مەكتەپتىڭ ونەگەلى قۇندىلىقتارىن بۇرمالاۋعا الىپ كەلەدى»، - دەدى ول ءماجىلىستىڭ جالپى وتىرىسىندا.
سونىمەن قاتار ول 2017 جىلدان باستاپ تۇلەكتەردىڭ قورىتىندى اتتەستاسياسىن، مەكتەپ ەمتيحاندارىن جۇرگىزۋدىڭ جاڭا فورماتى ەنگىزىلگەنىن ەسكە سالىپ ءوتتى. مەكتەپتى ءتامامداۋعا ارنالعان شارا اتتەستاتتاردى تاپسىرۋمەن اياقتالادى. وسى ورايدا وقۋشى مەن مەكتەپتىڭ رەسمي تۇردەگى ءوزارا قارىم-قاتىناسى اياقتالادى.
«ءبىراق تا بۇرىنعى تۇلەكتەرگە قاتىستى قىزمەتتىك قۇقىقتارى مەن مىندەتتەرى بولماسا دا، مەكتەپ اكىمشىلىگى مەن مۇعالىمدەر تالاپكەرلەردى ۇبت پۋنكتەرىنە جەتكىزۋگە جاۋاپتى ەتىپ تاعايىندالادى. وسى ماسەلە بويىنشا ءبىز 2017 جىلى دەپۋتاتتىق ساۋالعا باستاماشىلىق ەتكەن بولاتىنبىز. بۇل رەتتە بەرىلگەن جاۋاپتا ءبىلىم جانە عىلىم مينيسترلىگى مەن جەرگىلىكتى اتقارۋشى ورگاندار 2018 جىلى ۇبت-نى وتكىزۋدى ۇيىمداستىرۋ پروسەسىندە مۇعالىمدەردى قاتىستىرماۋ ماسەلەسىن پىسىقتاپ جاتقانى ايتىلعان. الايدا بۇل مالىمدەمە تەك ءسوز جۇزىندە قالىپ وتىر. پروسەسس قايتالانىپ جاتىر»، - دەدى يرينا سميرنوۆا.
دەپۋتات مەكتەپكە، مۇعالىمدەرگە دەگەن وسىنداي قاتىناس تۇتىنۋشىلىق ماقساتتا جاسالىپ جاتقانىن ءارى زاڭسىز ەكەنىن اتاپ ءوتتى. بۇل ءوز كەزەگىندە پەداگوگتىڭ مارتەبەسىن تومەندەتەدى.
«ءبىلىم جانە عىلىم مينيسترلىگى مەن اكىمدىكتەر ۇبت-نى تاپسىرۋ، وعان قاتىسۋ، تەستىلەۋ ناتيجەلەرى ءاربىر تالاپكەردىڭ جەكە ءىسى ەكەنىن ءتۇسىنۋى ءتيىس. وسىعان بايلانىستى مەكتەپ مۇعالىمدەرىن ۇبت-نى ۇيىمداستىرۋ مىندەتىنەن بوساتۋ قاجەت دەپ سانايمىز. مۇعالىمدەر ەڭبەگىن وزدەرىنە ءتان ەمەس قىزمەت تۇرلەرىنە پايدالانعان قيسىنسىز»، - دەدى ول.
ءوز كەزەگىندە ءماجىلىس ءتوراعاسى نۇرلان نىعماتۋلين ارىپتەسىنىڭ ايتقانىن قولداي كەلە، ماسەلەنىڭ وزەكتى ءارى ۋاقىتىلى كوتەرىلىپ وتىرعانىن اتاپ ءوتتى.
بۇدان بۇرىن حابارلانعانداي، بيىلدان باستاپ ق ر ءبىلىم جانە عىلىم مينيسترلىگى ۇلتتىق ءبىرىڭعاي تەستىلەۋ ناتيجەسى بويىنشا مەكتەپتەردىڭ اراسىندا رەيتينگ جۇرگىزبەيدى.
قازاقپارات
You Might Also Like
-
قاي ەلدىڭ بولماسىن دامۋىندا ۇلتتىق مادەنيەتتى وركەندەتۋدىڭ ماڭىزى وراسان زور. قازاق ەلى دە وسى جولمەن ءجۇرىپ كەلەدى. مادەنيەتى دامىماعان حالىقتىڭ كەلەشەگى دە جوق. تەك ۇلتتىق مادەنيەتىن وركەندەتكەندە...
-
9 جانە 10-ماۋسىمدا الماتى قالاسىنداعى ورتالىق دەمالىس جانە مادەنيەت ساياباعىندا حالىقارالىق دوستىق كۇنىنە وراي VI Unity Fest وتباسىلىق فەستيۆالى ءوتتى.
