InfoHub Logo

 ق ر ءبىلىم جانە عىلىم ءمينيسترى اسحات ايماعامبەتوۆ مەكتەپ بىتىرۋشىلەردى ۇلتتىق ءبىرىڭعاي تەستىلەۋدەن قورىقپاۋعا شاقىردى.

«جاقىندا باسىم كوپشىلىگىڭىز ۇبت تاپسىراسىزدار. ودان قورقۋدىڭ ەشقانداي قاجەتى جوق دەپ سىزدەرگە ايتقىم كەلەدى. بۇل — تەك قانا جاي سىناق. ونىڭ ۇستىنە بۇل ومىرلەرىڭىزدەگى ەڭ جەڭىل ەمتيحاننىڭ ءبىرى بولادى»، — دەدى اسحات ايماعامبەتوۆ Facebook پاراقشاسىندا جاريالانعان قۇتتىقتاۋىندا.

مينيستر «اينالاداعى ادامدار قولىڭنان ەشتەڭە كەلمەيدى» دەسە دە تاباندىلىق پەن سابىرلىق، كۇندەلىكتى قاجىرلى ەڭبەك پەن العا قويعان ماقساتتارىڭىز بەلگىلى ءبىر ناتيجە اكەلەتىندىگىن ەستەن شىعارماۋ كەرەكتىگىن اتاپ ءوتتى.

«ناتيجە ارينە، ءوز بەتىمەن كەلمەيدى. ول قاتەلىكپەن قاتار جۇرەدى. كىشكەنتاي كەزىمىزدەن ءبىزدى «قاتەلىك جاساۋ دۇرىس ەمەس، كەشىرىمسىز» دەپ سەندىرگەن. مەكتەپ قابىرعاسىنان باستاپ قاتەلىك جاساماۋ ءبىزدىڭ سانامىزعا قۇيىپ كەلدى. تابىستى ادام ەشقاشان قاتەلەسپەيدى دەگەن قاتە ۇعىم ەكەنىن ايتقىم كەلەدى. الايدا، ءبارى قاتەلىك جاسايدى. باستىسى — ودان ساباق الىپ، تاجىريبە جيناقتاۋ. قاتەلىك جاساپ، ءبارىن قايتا باستاۋدان قورىقپاۋ قاجەت»، — دەدى مينيستر.

وسى رەتتە ول بيىلعى جاس تۇلەكتەر قازاقستاننىڭ عانا ەمەس الەم تاريحىنداعى ەرەكشە تۇلەكتەر ەكەندىگىن باسا ايتتى.

«سىزدەر جاقسى تاجىريبە جيناقتاپ، وي ءتۇيىپ، الەمدى جاقسارتۋعا ۇلەس قوساسىزدار دەپ سەنەمىن. ەلگە پايداسى تيەتىن جاڭالىق اشىپ، تولاعاي تابىسقا جەتەتسىزدەر دەپ ۇمىتتەنەمىن. سىزدەر تاماشا كەزەڭدە ءومىر ءسۇرىپ جاتىرسىزدار. قازىرگى كەزەڭ ارماندايتىن، باتىل شەشىمدەر قابىلدايتىن ۋاقىت. بەلگىسىزدىكتەر مەن وزگەرىستەردىڭ ۋاقىتىندا سىزدەردىڭ باستى قۇندىلىقتارىڭىز ادالدىق، ادىلدىك، ماحاببات، قاراپايىمدىلىق پەن باتىلدىق بولۋى كەرەك. ساتتىلىك سەرىك بولسىن! ارماندارىڭىزعا قول جەتكىزىپ، ءومىر قۇندىلىقتارىن ەستەن شىعارماڭىزدار!»، — دەدى اسحات ايماعامبەتوۆ.

---