InfoHub Logo

ءمۇعالىم: ارمىسىزدار قۇرمەتتى قوناقتار! قۇرمەتتى اتا - انالار، ۇستازدار مەن بالالار!
مالدار تولدەپ قوي قوزداپ،
سۇتتەن بۇلاق اعىزعان.
جاڭا جىلدىڭ سيپاتى،
مولشىلىققا اڭىز بوپ.
باستالىپتى ناۋرىزدان، -
دەمەكشى قازاق حالقى جاڭا جىلدى ناۋرىزدان باستاعان. ۇلىس كۇندەرىڭىز - جاڭا جىل قۇتتى بولسىن!
بۇگىنگى ناۋرىز مەيرامىنا ارنالعان «ءاز - ناۋرىز!» اتتى ەرتەڭگىلىگىمىزدى باستاۋعا رۇقسات ەتىڭىزدەر!
اجەمىزدى ورتاعا شاقىرايىق (اليشەردىڭ اجەسى - گۇلسىم اجە ورتاعا كەلەدى) اجە شاشۋ تۋرالى ءسوزىن ايتادى: ناۋرىز كەلسە، قۇت كەلگەنى حالايىق
شاشۋ شاشىپ، ەل بوپ قارسى الايىق!
اق ساندىقتى اشايىق.
بۇل مەرەكە بۇل تويدىڭ
شاشۋلارىن شاشايىق!
ۇلىس وڭ بولسىن! اق مول بولسىن!(اجەسى شاشۋ شاشادى.)
ءمۇعالىم:— بالالار، مىنە ناۋرىز دا كەلىپ جەتتى. 22 ناۋرىز جىل باسى. ناۋرىز ۇلكەن مەيرام.
كوپتەن كۇتكەن ناۋرىز تويى ارايلى،
نۇرعا بولەپ مىنە جاتىر ماڭايدى!
مال بىتكەننىڭ بال تاتىعان ۋىزى،
قۋات بولىپ قانىمىزعا تارايدى.
ءتورت تۇلىك مال حالقىمىزدىڭ سۇيەرى،
كوڭىلىمنىڭ كۇمبىرلەگەن كۇيى ەدى.
«امان با» دەپ مال جانىڭ؟
ءبىرىن - ءبىرى قۇشاقتاسىپ سۇيەدى - دەگەندەي، ءبارىمىز تۇرىپ ءبىر - ءبىرىمىزدى قۇشاقتاپ، ءبىر - بىرىمىزگە جاقسى تىلەكتەر ايتىپ، ناۋرىز مەيرامىمەن قۇتتىقتايىق! (ناۋرىز – ۇلىستىڭ ۇلى كۇنى قۇتتى بولسىن! ۇلىس وڭ بولسىن! اق مول بولسىن! جاڭا جىل ب ا ق، بەرەكە، مولشىلىق اكەلسىن!)
ءىى. اڭگىمەلەۋ
ءمۇعالىم: ناۋرىز شىعىس كۇنتىزبەسىندە جاڭا جىل باسى دەپ سانالادى. 21 - 22 ناۋرىزدا كۇن مەن ءتۇن تەڭەلەدى. ناۋرىز دەگەن ءسوزدىڭ ءوزى «ناۋ» - جاڭا، «رۋز»- كۇن دەگەن سوزدەردەن الىنىپ، جاڭا جىل دەگەن ۇعىمدى بىلدىرەدى. ادامدار ناۋرىزعا دايىندالادى. ولار ءۇي، ارىق، اۋلا، كوشەنى تازالايدى.
اعاش، گۇل ەگەدى. ادامدار ۇيلەرىندە داستارحان جايادى. ءان شىرقاپ، بي بيلەپ، ويىن ۇيىمداستىرادى.
— ناۋرىز — باقىتتىڭ باستاماسى، ۇلىلىقتىڭ ۇيىتقىسى، جاقسىنىڭ جارشىسى، ىنتىماقتىڭ بەلگى - ءسى، ومىرگە نۇر سىيلاعان، سەزىمگە گۇل سىيلاعان حالىق قاستەرلەيتىن كۇن. ەندەشە
- كەلە جاتىر جىلىمىز،
مەيرامدايمىز مۇنى ءبىز.
حالقى سۇيگەن مەيرامدى
قارسى الايىق ناۋرىزدى! – دەپ ۇلىستىڭ ۇلى - كۇنى، جانا جىل - ناۋرىزدى قارسى الايىق! - ناۋرىز قىز (ايانا): سالەم، اتا - انالار!
اينالايىن، بالالار!
ۋاقىت ۇدەپ كەلدىم مەن،
باقىت تىلەپ ادامعا.
سايراتامىن بۇلبۇلدى،
جايناتامىن گۇل - گۇلدى
جىلعادان سۋ اعىزىپ،
گۇلدەندىرەم الەمدى.
(ناۋرىز قىز ارنايى وزىنە تاعايىندالعان ورنىنا وتىرىپ، تويدى تاماشالايدى).
ءمۇعالىم: قىدىر اتا تىلەرگە جاقسىلىعىن،
جاس ۇرپاققا جەتكىزەر جاقسى ءۇنىن.
ۇلىستىڭ ۇلى كۇنى قۇتتى بولىپ،
جاراتقانىم ايىرماسىن جاقسى كۇنىن.
- قۇرمەتتى حالايىق، قىدىر اتامىز ءوزىنىڭ بارلىق ىرىس، نەسىبەسىن سىيلاۋعا كەلە جاتىر قارسى الايىق! (زالعا قىدىر اتا كىرەدى. قىدىر اتا (اليشەردىڭ اتاسى - عازيز اتا):
- ۋا حالقىم! ناۋرىز مەيرامدارىڭىز قۇتتى بولسىن!
ەلىمىز امان، جۇرتىمىز تىنىش بولسىن!
ءتورت تۇلىگىڭ تۇگەل بولىپ، باستارىڭا ب ا ق، بەرەكە قونسىن!
ءىىى. تاقپاقتار
ەندى ءبىزدىڭ كىشكەنتاي بۇلدىرشىندەرىمىز ناۋرىز مەيرامىنا دايىنداعان تاقپاقتارىن ۇسىنادى.
ارۋجان: قوش كەلىپسىڭ ناۋرىز!
ارمان تويى حالىقتىڭ.
قۋانىشى بارشانىڭ،
قۇتتى بولسىن قادامىڭ!
نۇراسىل: ناۋرىز تويى - بەرەكە،
ناۋرىز تويى - جىر اڭىز.
قىزىپ دۋلى مەرەكە
قىزىق دۋمان قۇرامىز.
اقەركە: بي بيلەدىك ءبارىمىز!
ەگىن ءوڭىن تولقىتقان،
ەلدىڭ كوڭىلىن شالقىتقان.
باس يەمىز - ناۋرىزعا!
اليشەر: سەنى تويلاپ قارسى الىپ،
بار الەمگە جار سالىپ،
سالەم بەردىك، ءبىز سىزگە!
مادينا: باتا بەرىپ اتامىز،
باتا بەرىپ اپامىز،
ءتاتتى بولىپ جاسالعان،
ناۋرىز ءدامىن تاتامىز.
ءادىلجان: كوكتەم كەلدى بۇگىن،
كۇنىم توكتى نۇرىن
سايراپ بارلىق قۇستار،
ءان سالۋعا قۇشتار.
ءمۇعالىم: كوكتەمنىڭ العاشقى كۇندەرىنەن باستاپ جەر بەتىنە قىلتيىپ، بوي كوتەرىپ گۇلدەر وسەدى. بۇلار كوكتەمنىڭ العاشقى گۇلدەرى دەپ اتالادى. بۇل بايشەشەك، جاۋقازىن، قىزعالداق. (ينتەراكتيۆتى تاقتامەن جۇمىس)
قۇرالاي: ءتۇرلى - ءتۇستى ءايبات،
گۇلدەر شىقتى جايناپ.
قىزىعىپ ىلعي بارامىن،
قىرعا شىقتى ويناپ.
نۇرقوجا: ءساندى كوكتەم نۇرىمەن،
ناۋرىز تويى جىرىمەن،
كوڭىل گۇلدەي جايناسىن.
الي: كىرگىزىپ كوركىن دالانىڭ،
بايشەشەك قىردا قاپتادى.
قىزىعىپ ىلعي بارامىن،
ۇزۋگە ءبىراق باتپادىم.
ەلدانا: كۇن مەن ءتۇن تەڭەلەدى،
جەر شۋاققا بولەنەدى،
سونى تويلار ەل ەندى.
ەراسىل: ناۋرىز تويى — سالتىمىز،
«كوگەرسىن» — دەپ حالقىمىز،
كوشەگە تال ەگەمىز.
ءمۇعالىم: كوكتەم — جىل مەزگىلىنىڭ ادەمى ءبىر كەزەڭى. ناۋرىز ايىندا كۇن ۇزارىپ، ءتۇن قىسقارادى. كۇن كوزىنىڭ شۋاعى مولايادى. قار ەرىپ، جىلعالاردان سۋ اعا باستايدى. كوكتەم – وتە كوڭىلدى مەزگىل. (ينتەراكتيۆتى تاقتاداعى سۋرەتتەردى كورسەتۋ)
اقنيەت: سانسىز كوكەك سۇڭقىلداپ،
كوكتەم كەلدى ەركەلەپ.
دياس: نازىك ۇنمەن سىڭقىلداپ،
بۇيرا بۇلاق ەركەلەپ،
كوكتە بۇلتتار كۇركىرەپ،
جەرگە توكتى ورمەگىن.
بالاۋسا: قار سۋ بولىپ جونەلدى،
قالدى دالا جالاڭاش،
كۇن نۇرىنا كەڭەلدى.
تولەگەن: كەلىپ كوكتەم قۇستارى،
باۋ - باقشادا ءان سالدى.
ولاردى جاس دوستارى،
ۇيا جاساپ قارسى الدى.
ءمۇعالىم: كوكتەمدە تابيعات ءسانىن كەلتىرىپ كوپتەن كۇتكەن قۇستارىمىز دا تۋعان جەرىنە ورالادى.(ينتەراكتيۆتى تاقتادان سلايدتار كورسەتىلەدى)
ايدانا: كوككە بوياپ ءوڭىردى،
كوكتەم كەلدى كوڭىلدى.
باۋ - باقشادا، ورماندا،
قۇستار ءانى توگىلدى.
انۋار: داستارحاندا ءدانىمىز،
جايدارىمىز ءبارىمىز.
جاراسۋ بار، جاۋلىق جوق،
قانداي جاقسى ناۋرىز!
ەركەجان: جىلۋى كوپ تە، سۋىعى از،
گ ۇلى كوپ تە، قارى از،
ءسۇتى كوپ تە، كومىرى از،
بولادى بۇل ناۋرىز.
شىڭعىس: قاردى ەرىتىپ جىلعاسى،
ناۋرىز كەلدى – جىل باسى.
شۋاق توكتى جارىق كۇنى،
مەيرامىندا حالىقتىڭ.
ايىم: بالالار - اۋ، بالالار!
شاقىرادى دالالار.
كوكتەم كەلدى گۇل الىپ،
قۇستار كەلدى جىر الىپ.
بەكزات: قىس ءوتىپ، قار كەتىپ،
شىرايلى كۇن جەتىپ،
شارۋانىڭ كەنەلگەن
مەيرامى ەجەلدەن
قۇتتى بولسىن، بۇل ناۋرىز!
ايسانا: باۋىرلاسقا ءتانتىمىز،
بۇزىلماعان سالتىمىز.
كەڭ دالامنىڭ ەجەلگى،
قازاق دەگەن حالقىمىز.
وزگە ۇلتتاي ءبىزدىڭ دە
بار ءداستۇر مەن سالتىمىز.
نۇرقوجا: جىل باسى - ناۋرىز، مەرەكە!
اق نۇرعا الەم بوياندى
ناۋرىز تويى بەرەكە
تىرشىلىك جاڭا وياندى.
ەلدانا: تاۋەلسىز بيىك حالقىمنىڭ جەلبىرەپ تۋى شالقىسىن،
ءاز ناۋرىز كەلىپ ەلىمە، جەر – انا بويى بالقىسىن.
جاڭعىرار ءداستۇر - سالتىمنىڭ، كوسىلسىن بۇلاق جالعاسىپ،
قاستەرلى مەنىڭ حالقىمنىڭ، مەرەكەسى - ناۋرىز، ول - جىل باسى!
ءىV. جۇمباق — ال ەندى بالالار، جۇمباقتار جاسىرايىن. جۇمباقتاردىڭ شەشۋىن تابىڭدار:
ءدامدى - ءدامدى تاعامداردى جينايدى،
قوناقتاردى كوڭىلدەنە سىيلايدى. (داستارحان)
- بۇل نە؟ دۇرىس ايتاسىڭدار، بالالار! بۇل داستارحان.— داستارحان باسىندا ادامدار قالاي وتىرۋى كەرەك، اسقا قاتىستى تىيىمدار مەن ىرىمدار جايىندا ءبىزدىڭ جازيرا اپايىمىز تانىستىرىپ وتەدى.
(قازاق حالقىنىڭ تاربيە قۇرالدارىنىڭ ءبىرى - تىيىم سوزدەر. بۇل سوزدەر ەسى كىرگەن بالالاردى جامان ادەت، جات پيعىل، ورىنسىز قىلىق، تەرىس مىنەزدەردەن ساقتاندىرىپ وتىرعان. ۇلكەننىڭ جولىن كەسۋ - ادەپسىزدىكتىڭ، استى توگۋ - ىسىراپتىڭ بەلگىسى دەپ تانىلعان جانە ونداي ەرسى ىستەرگە قاتاڭ تىيىم سالىنعان. مۇنداي تىيىم سوزدەر ەل ىشىندە وتە كوپ. ونىڭ ءبارىن ەمەس كەيبىرىن ايتىپ بەرەيىن)
داستارحاندى، تاماقتى باسپا.
مالدى، ىدىستى، تاماقتى تەپپە.
سۋدى ساپىرما،
قۇراندى، تاماقتى باسپا.
تۇزدى، كۇلدى باسپا.
ناندى جەرگە تاستاما، ۇستىنە باسقا زاتتى قويما.
اقتى توكپە.
پىشاقتىڭ ءجۇزىن جالاما.
پىشاقتى شالقاسىنان قويما.
ناندى ءبىر قولىڭمەن ۇزبە.
استى ۇرلەمە، استى جامانداما.
تاماقتى سوراپتاپ ىشپە.
تۇرەگەپ تۇرىپ تاماق ىشپە.
ۇلكەننەن بۇرىن تاماق جەمە.
ۇلكەننەن بۇرىن داستارحانعا وتىرما.
استى قورلاما.
داستارحاندى، ىدىستى، تاماقتى اتتاما.
تاڭەرتەڭگى استى تاستاما.
ورىندىقتا اياعىڭدى ايقاستىرىپ وتىرما.
تاماقتى جاتىپ ىشۋگە بولمايدى. دەنى ساۋ ادام دۇرىس وتىرىپ تاماقتانادى. ال وتىرا المايتىن ادام جاتىپ ىشەدى. سوندىقتان مۇگەدەك ادامنىڭ قىلىعىن جاساما.
اس ۇستىنەن اتتاما
استان ۇلكەن ەمەسسىڭ
اكەسى وتىرعاندا بالاسىنا باس تارتىلمايدى.
داستارحانعا ءبىرىنشى ناندى اكەلىپ قويادى
اس ىشكەن ىدىستى توڭكەرىپ قويۋعا بولمايدى
اس ءىشىپ بولعان سوڭ «تويدىم» دەۋگە بولمايدى، «قاناعات» دەۋ كەرەك.
ناندى توڭكەرىپ قويۋعا بولمايدى.
قوناققا سىنىق ىدىسپەن اس بەرۋگە بولمايدى.
اس ءىشۋ كەزىندە ىزەت، سىيلاسىم، يناباتتىلىق راسىمدەرى ساقتالۋ كەرەك.
V. ۇلتتىق تاعام تۇرلەرى: ال داستارحانعا قانداي قازاقتىڭ ۇلتتىق تاعامدارى قويىلادى؟
قازاقتىڭ ۇلتتىق تاعامدارى،
جاسىمنان جاقىن ماعان ءبارى.
تەڭەرمەس ەم ولارعا مەن،
ەشبىر استى عالامداعى.
ناۋرىز مولشىلىق پەن بەرەكە ايى، اپالارىمىزدىڭ دايىنداعان ۇلتتىق تاعام تۇرلەرىن تانىستىرۋعا باقىت (بەكزاتتىڭ اپاسى) اپامىزعا كەزەك بەرەيىك.
Vءى. ناۋرىز كوجە. ءمۇعالىم: - ۋا جاراندار، جاراندار!
ءبارىڭ بەرى قاراڭدار،
سەندەر ءۇشىن جاسالعان.
توقسان ءتۇرلى تاعام بار!
قىمىز بەنەن شۇبات بار،
شۇباتتا ءدارى، قۋات بار،
ىركىت پەنەن ايران بار،
ايراندى ءىش تە، قايران قال.
ىرىمشىك پەن قۇرت تا بار،
ونى ازسىنساڭ سىقپانى ال.
جەتى ءتۇرلى ءدام سالعان،
كوجەدەن ءدام تاتىڭدار! ناۋرىز كوجە تۋرالى گۋلنار اپامىز (مادينانىڭ اپاسى) ايتىپ كەتەدى. ناۋرىز كوجە تاراتىلىپ، ءدام تاتىلادى.
Vءىى. باتا - تىلەك ءبىلدىرۋ. ءمۇعالىم: قازاق حالقىنىڭ ەجەلگى سالت - ءداستۇرىنىڭ ءبىرى – باتا - تىلەك ءبىلدىرۋ. «ءسوز ارقىلى جاراتۋشىعا جالىنىپ، جالبارىنىپ ىقپال ەتۋگە بولادى دەپ تۇسىنگەن اتا - بابالارىمىز. «جاڭبىرمەنەن جەر كوگەرەدى، باتامەن ەر كوگەرەدى»، «باتالى قۇل ارىماس» — دەگەن وي - پىكىردى ۋاعىزداپ، كەيىنگى ۇرپاعىنا ىقىلاس ءبىلدىرىپ، اق نيەتپەن باتا بەرىپ، تىلەك تىلەۋدى داستۇرگە اينالدىرعان. باتا تۋرالى باتيما اپانىڭ اڭگىمەسىن تىڭدايىق.
- راحمەت!
ءمۇعالىم: بالالار بۇگىنگى مەيرامدا ارنايى قىدىر اتامىزدىڭ باتاسىن الايىق. ىزگى نيەت، «اق باتا» بەرۋ ءۇشىن ءسوز كەزەگى قىدىر اتاعا (اليشەردىڭ عازيز اتاسىنا) بەرىلەدى.
ارمىسىڭدار، جاماعات!
ۇلىس وڭ بولسىن،
اق مول بولسىن.
قايدا بارساق جول بولسىن!
ۇلىس باقتى بولسىن،
ءتورت – تۇلىك اقتى بولسىن!
ۇلىس بەرەكە بەرسىن،
بالە – جالا جەرگە ەنسىن»
ۇلى حالقىم توق بولسىن»
كويلەكتەرىڭ كوك بولسىن!
قايعى – ۋايىم جوق بولسىن!
قۋانىشتارىڭ كوپ بولسىن! (ءاۋمين) قىدىر اتا باتاسىن بەرەدى.
Vءىى. ۇلتتىق سالت - داستۇرلەرىمەن تانىستىرۋ ءمۇعالىم: قازاعىمنىڭ سالت – ءداستۇرى جاڭعىرعان،
ءتالىمدى وي سىناعى، تاربيە كوزى قالدىرعان.
سالت – ءداستۇردى ارداقتايىق، اعايىن،
قازاق اتتى ۇلكەن، كىشى بالدىرعان.
جينالىپپىز ءساتتى كۇنى ءبارىمىز،
ۇلكەن، كىشى، جاسىمىز دا، كارىمىز.
– دەپ ەندىگى كەزەكتى ناۋرىزداعى سالت – داستۇرلەرگە بەرسەك.
قازاق حالقى قوناق كۇتۋدى دە، قوناق بولىپ قىدىرۋدى دا قىزىق كورگەن. سوندىقتان قازاق حالقىنىڭ تويلارى دا كوپ بولعان. سونىڭ بىرەۋى بەسىككە سالۋ. بەسىككە سالۋ تويىنا جينالعاندار ولەڭ ايتىپ، ءازىل – قالجىڭ، ۇلتتىق ويىندارىن ويناپ كوڭىل كوتەرگەن. بالا ون ەكى اي شاماسىندا قاز تۇرىپ، ءبىر - ەكى اتتاپ ۇستەل جاعالاپ جۇرەدى. وسى كەزدە بالاعا ارنالعان قازاق حالقىندا «تۇساۋ كەسەر» تويى وتكىزىلەدى. بەسىككە سالۋ ىرىمىن كورسەتىپ، ءتۇسىندىرىپ بەرەتىن عاليا اپامىزعا (شىڭعىستىڭ اپاسى) ءسوز بەرەمىز.
VIءىى. ۇلتتىق ويىن. ءمۇعالىم: ناۋرىز مەيرامىندا حالىق قۋانىپ ۇلتتىق ويىن تۇرلەرىن ويناپ كوڭىل كوتەرگەن. سونىڭ ىشىندە «كوكپار»، «قىز قۋۋ»، «ارقان تارتۋ»، «قىز بەن جىگىت ايتىسى» ت. ب ويىندار. (ينتەراكتيۆتى تاقتادان كورسەتىلىپ، تۇسىندىرىلەدى). ەندى «قىز بەن جىگىت ايتىسىنا» كەزەك بەرەيىك. بەكزات پەن ەلدانا ورتاعا شىعىپ قىز بەن جىگىت ايتىسىن كورسەتەدى.
ح. جاڭا جىلدى قارسى الۋ. ءمۇعالىم: جاز كەلەر، قىستىگۇنى قىسىم كەتىپ،
قار، سۋىق، اياز، بوران — ءبارى كەتىپ.
جاڭا جىل كەلدى، كوكتەم كەلدى اعايىن!
جادىرايدى، جاڭعىرادى ماڭدايىم.
قاسىقتاي قار، توبىقتاي توڭ قالمايدى،
تابيعات بارشا جانعا راحىم ەتىپ.
جەتپەككە ۇلكەندىككە جاس بالالار،
جۇگىرەر قىردان ويعا دۇبىرلەسىپ.
شال - كەمپىر كۇن شۋاقتاپ، كوڭىلى جاي،
وتكەن كۇن، ءومىرىن ايتىپ كۇبىرلەسىپ.
بوتا، قۇلىن، بۇزاۋ، لاق، قوزى تۋىپ،
قۋانىپ ويناقتايدى ولار دا ءوسىپ.
— بالالار! سەندەر بىلەسىڭدەر مە؟ ناۋرىز مەيرامى – جىل باسى، ياعني جاڭا جىل. ال جاڭا جىلدىڭ يەسى كىم ەكەنىڭ بىلەسىڭدەر مە؟ دۇرىس قوي! ەندەشە، جاڭا جىلدىڭ يەسى قويدى قارسى الايىق!
(قوي بولىپ كيىنىپ مادينانىڭ ماماسى اينۇر كەلەدى):
- ءما - ءما - ءما، ءما - ءما - ءما! جاڭا جىل كەلدىم،
قالىڭ قاردى ءجىپسىتىپ، اينالانى جايناتىپ...
ويان ءبارىڭ! ويان ءبارىڭ! ورىندالسىن كوكسەگەن وي - ارمانىڭ!
قوي دەگەن موماقانمىن، ەسكەر، حالقىم «قوي جىلى – مولشىلىق پەن بەرەكە» بارىن!
(قويدى، ياعني جاڭا جىلدى قۇرمەتتەپ قارسى الىپ، جوعارى تورگە شىعارامىز)
ءمۇعالىم: — قۇرمەتتى اتا - انالار، مۇعالىمدەر، قوناقتار! بۇگىنگى ناۋرىز مەيرامىنا ارنالعان كىشىگىرىم كونسەرتىمىزدى تاماشالاڭىزدار!
ءحى. ءان، بي، ولەڭ. ءمۇعالىم: اۋ، حالايىق، تۇرمايىق،
اندەتەيىك، جىرلايىق.
ورتامىزدى اشايىق،
دۋمانداتىپ بي بيلەپ.
ءىنجۋ مارجان شاشايىق.
بۇرىنعى باستاۋىش سىنىپتا مەننەن وقىپ، ءبىلىم العان شاكىرتتەرىمنىڭ بۇگىنگى مەرەكەگە ارناپ اكەلگەن ونەرلەرىن كورىپ، تاماشالانىزدار.
1) 11 «ب» قىزدارىنىڭ ورىنداۋىندا -«شاشۋ» ءبيى
2) 7 «ب» ۇلدارى مەن قىزدارىنىڭ ورىنداۋىندا -«ورىس حالىق»ءبيى
3) 5 «ا» ۇلدارى مەن قىزدارىنىڭ ورىنداۋىندا «جورعا» ءبيىن قابىل الىڭىزدار.
4) 1 «ا» قىزدارى ايانا، ايدانا، اقنيەتتىڭ ورىنداۋىندا ەرتەگىلەر ءانى
5) 1 «ا» ۇلدارىنىڭ ورىنداۋىندا «جۇمىر قىلىش» ءبيىن تاماشالاڭىزدار.
ءحىى. قورىتىندى. ءمۇعالىم: ناۋرىز قۇتتى بولسىن!
دەندەرىمىز ساۋ، مىقتى بولسىن!
ناۋرىز تويى كەلە بەرسىن!
بارلىق حالىق باقىتتى بولسىن،
قوش، ساۋ بولىڭىزدار، حالايىق!
كورىسكەنشى كۇن جاقسى بولسىن!
وسىمەن، قۇرمەتتى قوناقتار! بۇگىنگى ناۋرىز مەيرامىنا ارنالعان ەرتەنگىلىگىمىز اياقتالدى. نازارلارىڭىزعا كوپ راحمەت! ساۋ بولىنىزدار!

شىعىس قازاقستان وبلىسى، اياگوز قالاسى،
«گورنىي جالپى ءبىلىم بەرەتىن ورتا مەكتەپ» كمم