InfoHub Logo

شەكتىنىڭ باتىس جاق بايۇلىمەن شەكاراسىندا شاڭدىقۇل-تامدىقۇل دەگەن ءبىر ورىندا ەل جايلايتىن ەكى سۋات كولى بولادى. ءبىر جىلى ەكى كولدىڭ وڭتۇستىك بەتى، ءبىر بيىكتەۋ ورىنعا ءبىر بۋاز ايداھار ءتۇسىپ جاتىپ الادى. سۋاتقا كەلگەن مال مەن ادامعا ايبات شەگىپ، جامان داۋىسپەن ىسقىرعان سوڭ، ۇركىپ ماڭىنان كوشەدى. جاز ايىندا سۋاتتان قىسىلعان حالىق قوس اتپەن ارجاقتاعى ناۋشا باتىردى شاقىرادى. ناۋشا كەلەدى. ەل ادامدارىن جيناپ جاتقان جەرىن كورمەك بولىپ، كوپ ادام ايداھاردىڭ ۇستىنە بارىپ قالعاندا، ايداھار باسىن كوتەرىپ ىسقىرىپ عايبات شەككەندە، اتتارى داۋىسىنان قورقىپ، سىلەيىپ-سىلەيىپ جاتا قالادى. ادامدار كەيىن قاشىپ شىعىپ الىستان بارىپ توقتاعان سوڭ، ناۋشا قولىنا قىلىش الىپ، ايداھارعا جاياۋ كەتەدى. قالعان كوپشىلىك تىلەك تىلەپ، بيىكتەۋدەن قاراپ تۇرىسادى. ناۋشا باردى-اۋ دەگەنشە، ناۋشانىڭ ايداھارعا قاراي دەدەڭدەپ جۇگىرگەنىن، ناۋشانىڭ قىلىشىن سەرمەگەنىن، سول مەزەتتە ايداھاردىڭ قۇيرىق سەرمەگەنىن كورىپ تۇرىسادى. «اپىر-اي، تارتىپ جۇتتى- اۋ!» — دەسىپ ءبىر قاتارى شۋلاپ، جىلاسادى. ءبىرتالاي ۋاقىت ناۋشا دا، ايداھار دا كورىنبەي قالادى. ءبىرازدان كەيىن ناۋشانىڭ ايداھار جانىنان تۇرىپ، جۇگىرىپ كەلە جاتقانىن كورەدى. ەل شۋلاپ، قۋانىسادى. ناۋشانىڭ ءتۇسى-وڭى قاشىپ كەلەدى. كوپشىلىك باتىردان شۋلاي سۇراسادى. ناۋشا: «دۇشپاننىڭ باسىن قاقتىم، ءبىراق قاققانىم قۇرسىن، قۇيرىقپەن ۇرىپ تالدىرىپ تاستادى، ەسىمدى جيىپ، كوزىمدى اشسام، ايداھاردىڭ قۇيرىعى ۇستىمدە جاتىر ەكەن. سونان جيرەنىپ تۇرا قاشتىم، بارۋدا قورىقپاي بارىپ ەدىم، جاقىنداعان سوڭ وزىنە دەدەڭدەتىپ تارتتى، اۋزىنا تۇسپەس بۇرىن باسىن قاعىپ ۇلگەردىم، ءبىراق تا قۇيرىعىمەن ۇرىپ جىقتى»، — دەيدى.

ناۋشا كوپشىلىكتى ەرتىپ اپارىپ كورسەتكەن. باسى اناداي جەردە جاتىر، ءبىراق كەۋدەسى، قۇيرىعى ءتىرى، باسى ساپ-سارى التىنداي، باۋىرىندا بىرنەشە اياعى بار دەسەدى.

وقۋعا كەڭەس بەرەمىز:

ناۋشا باتىر تۋرالى

سىرىمنىڭ نۇرالى حاندى شابۋى (ءىى نۇسقا)

بايماعامبەت سۇلتان مەن سىرىم باتىر

---