نەمكوۆتىڭ جاۋىزدىعى
زابوي ءىشى تۇنىپ تۇرعان قويۋ شاڭ بولاتىن. دەم الۋدىڭ ءوزى قيىن. 12-14 ساعاتقا سوزىلعان جۇمىس ۇستىندە تىرەۋسىز زابويدىڭ توبەسىنە شىتىناپ /جارىلا ءتونىپ/ تۇرعان كومىر پورودوسىنىڭ استىندا قالىپ قويار ما ەكەمىز دەپ ۇنەمى قاۋىپتەنىپ جۇرەسىڭ. ونىڭ ۇستىنە سوڭىمىزدان جۇرگەن باقىلاۋشىلاردىڭ بىزگە اقىرعان داۋىسى دا اۋانى جاڭعىرىقتىرادى. ولار جانە شىن بولسىن، وتىرىك بولسىن «از كىنالى بولدىڭ» دەپ ەسەپتەسە-اق، شالاجانسار بولعانىنشا سابايدى. نيكولاي نەمكوۆ دەگەن باقىلاۋشى بولدى. ونىڭ قولىندا ۇنەمى قورعاسىننان وزەك سالىپ وگىزدىڭ جون تەرىسىنەن ورگىزگەن بىلەۋىت قامشىسى بولادى. زابويعا ءتۇستى-اق سول «قۇرالىن» قولدانادى.
ءبىر كۇنى جۇمىس اياقتالعان كەز ەدى. ءون بويىمىزدان تەر قۇيىلىپ، شارشاعان بىزدەر ازداپ وتىرىپ دەم الدىق. ءبىر ۋاقىتتا كوكتەن تۇسكەندەي نەمكوۆ شىعا كەلسىن. ول:
— نەمەنە ءبىتىرىپ تاستاپ وتىرسىڭدار ما؟ ءبارىڭدى قۋايىن با وسى جۇمىستان؟ — دەپ ارعى-بەرگىمىزدەن سىپىرا بوقتاي كەلدى.
— باقىلاۋشى مىرزا! — دەدى سول جەردە شاناشى مۇستافين دەيتىن جولداسىمىز جاسقانا سويلەپ. — قايدان ءبىز جالقاۋ بولامىز؟ ۇنەمى الاقانىمىز ۇلدىرەگەنشە جۇمىس ىستەيمىز. ساۋ جەر بولمايدى.
سول-اق ەكەن، نەگە ەكەنى بەلگىسىز، نەمكوۆ بۇرىنعىدان بەتەر قاھارلانا ءتۇستى. بار كۇشىمەن الگى جۇمىسشىنى قولىنداعى دويىرىمەن ساباي باستادى. سابالاۋ قولىنداعى بۇزاۋ ءتىس دويىر قامشىنىڭ سابى سىنعاندا عانا اياقتالدى. سوققىعا جىعىلعان ادام ءوزىنىڭ كوڭىلسىز لاشىعىندا ايدان ارتىق جاتتى، سودان سوڭ عانا جۇمىسقا شىعۋعا شاماسى كەلدى. امالى قانشا سورلىنىڭ، تاعى دا ونى اشتىق ايداپ زابويعا ءتۇسىردى...
بارلىق جۇمىسشىلاردىڭ سوڭىنان ۇزدىكسىز باقىلاۋ جۇرگىزىلەتىن. باس ەسەپشى زاپيەۆال دەگەن ەسەپشىلىكپەن قوسا، تىڭشىلىق جۇمىستى دا جۇرگىزەدى. ول كىمنىڭ نە ىستەپ جاتقانىن باقىلاپ، نە ايتىپ جاتقانىن تىڭداپ تىنىم تاپپاي جۇگىرەتىن دە جۇرەتىن، ەگەردە بىرەۋ-مىرەۋدىڭ باستىقتارعا قارسى ۇنامسىز سوزدەر ايتىپ جاتقانى قۇلاعىنا شالىنسا-اق، قوجايىندارعا جەتكىزەدى... ول ادامعا جازالاۋشى كۇتتىرمەي-اق جەتىپ كەلەتىن.
نەمكوۆ «كوڭىلىن كوتەرۋدەن دە» قاشپايتىن. كەيدە ول لاۆكاعا بارادى، ونىڭ قورقاۋلىعىن بىلە قويماعان جۇمىسقا جاڭا تۇسكەندەر كوزىنە تۇسە قالسا-اق، ول ولاردى لاۆكاعا شاقىرادى. ونىڭ امىرىمەن شاقىرىلعان جاس جۇمىسشىلارعا كويلەك، پالتولار كورسەتىلەدى. «كوڭىلىنە نە ۇناسا، سونى الۋىنا بولادى» دەپ ءوزى تۇرىپ ۇيالماي تاڭداپ الۋعا ۇگىتتەيدى.
ول باقىتسىزدار قۋانادى، بار تاۋىرىنەن تاڭداپ الىپ كيىنەدى دە شەكسىز العىسىن ايتىپ، كەتۋگە ىڭعايلانادى. نەمكوۆ وڭەشى جىرتىلعانشا قارقىلداپ كۇلىپ، الگى «يگىلىك كورسەتىپ، جاقسىلىق جاساعان» ادامىن قامشىنىڭ استىنا الادى.
You Might Also Like
-
1914 جىل ەدى. اعىلشىن كاپيتاليستەرىنىڭ قولشوقپارى پودريادششيك شەرنياز دەگەن بايدىڭ ءبىر اۋرۋ بۇزاۋى احمەت دەگەن جۇمىسشىنىڭ ءۇيىنىڭ الدىنا كەلىپ ءولىپ قالدى. شەرنياز باي اعىلشىنعا بارىپ:
-
ول كەزدە مەن بۋىنىم بەكىپ، بۇعانام قاتپاعان جاس ەدىم. تار زامان مەنى دە مەيىرىمسىز ۋلى تىرناعىنا ءىلدى. جاس تا بولسام ءبىر ءتىلىم نان ءۇشىن جۇمىس ىستەۋگە ءماجبۇر بولدىم. «انا ءسۇتى اۋىزىڭنان كەتپەگ...
