InfoHub Logo

ول كەزدە مەن بۋىنىم بەكىپ، بۇعانام قاتپاعان جاس ەدىم. تار زامان مەنى دە مەيىرىمسىز ۋلى تىرناعىنا ءىلدى. جاس تا بولسام ءبىر ءتىلىم نان ءۇشىن جۇمىس ىستەۋگە ءماجبۇر بولدىم. «انا ءسۇتى اۋىزىڭنان كەتپەگەن جاسسىڭ عوي، جۇمىس ىستەۋگە ءالى ەرتە» دەگەن اعىلشىن جوق. مەنىڭ سپاسس زاۆودىنداعى قارا پەشتىڭ شلاگىن تاسيتىن تاشكەشى ەتىپ جۇمىسقا قويدى. بۇل جۇمىس مەن سياقتى بالا ەمەس، تەپسە تەمىر ۇزەتىن الۋەتتى جىگىتتەرگە دە قيىن ەدى.

كۇنىنە 12 ساعات بويى تاشكە تارتام. شلاكتى اپارىپ توگەتىن جەر قارا پەشتەن 30 مەتردەي. جۇمىستان دىڭكەڭ قۇرىپ شىعىپ، ۇيگە ارەڭ جەتەتىن ەدىم. ول كەزدە ءۇي دەيتىن ءۇي بار ما، جەردەن قازىلعان ۇيشىك بولاتىن.

اعىلشىندار جۇمىسشىلاردىڭ ەڭبەگىن سۇلىكتەي سوردى. 12 ساعات تيتىقتاپ ەڭبەك ەتكەندە ىشسەك اسقا، كيسەك كيىمگە جارىمايتىن ەدىك. اعىلشىن زاۆودىندا بىرنەشە جىل ىستەگەندە ۇشى-قيىرى جوق بەرەسىدەن ايىرىلعانىم جوق.

ءالى ەسىمدە. اقىرعان اقپان ايىنىڭ ءىشى ەدى. ءبىر كۇنى جۇمىستا جۇرگەنىمدە الاي-تالاي بوران سوقتى دا كەتتى. بوراننىڭ قاتتىلىعى سونداي — ءتىپتى اياق استىن ءجوندى كورە المايسىڭ. دۇلەي تابيعاتقا نە شارا؟ تاشكە تارتۋعا بولمايدى، قارا پەشتەن دامىلسىز شىققان شلاك ءۇيىلىپ قالدى.

تاپ وسى كەزدە زاۆود قوجاسى اعىلشىن وراۆسون دەگەننىڭ ساپ ەتە تۇسكەنى بار ەمەس پە. قورىققانىمنان شلاك تولى تاشكەنىڭ تۇتقاسىن ۇستاپ، كوتەرە بەردىم. جۋان جۇدىرىق وڭ جاق شەكەم نەن سارت ەتە ءتۇستى. قۇلاپ قالىپپىن. ەسىمدى جيىپ، كوزىمدى اشسام، جۇمىسشىلار مەنى قورشاپ تۇر ەكەن. ولاردىڭ مەنى اياعان، اعىلشىنعا قاھار توككەن داۋىستارى ەستىلەدى.

جۇمىسشىلاردىڭ اراسىندا اشتىق پەن قايىرشىلىق شىڭىنا جەتىپ، ولگەندەردىڭ سانى ءتىپتى كوپ بولدى. تالاي جۇمىسشىلار اشتىق ازابىن كورىپ ءولدى. جۇمىسشىلاردىڭ اراسىنداعى نارازالىق پەن ىزالى اشۋ كۇشەيە باستادى. اعىلشىندار كىنانى وزدەرىنە جۋىتپاۋ ءۇشىن ولگەن جۇمىسشىلاردى اشتىق پەن اۋىر ەڭبەك جاعدايىنان ەمەس، قايداعى ءبىر قاتەرلى اۋرۋدان ءولدى دەپ جار سالدى. ولار وزدەرىنىڭ بۇل سايقالدىعىمەن جۇرتتى يلاندىرۋ ءۇشىن ولگەن ءبىر كەنشىنىڭ سۇيەگىن كوپشىلىك الدىندا وتقا ورتەمەكشى بولدى. مۇنى كورگەن پوسەلكا حالقى قاتتى ىزالاندى. توپتالعان ادامدار رۋدنيك قوجايىندارىنىڭ تۇرعان جەرىنە قاراي بەتتەدى. مۇندا ولارعا پريستاۆ سوكولوۆ قارسى شىقتى. ول قىلىشىن جالاڭداتىپ، جينالعان حالىقتى قۋا باستادى. اقىرىندا بۇل ءىس مىنامەن تىندى: اعىلشىن مانسفەلدىڭ بۇيرىعى بويىنشا پريستاۆ بەكوۆا تاكىجان دەگەن قازاق ايەلىنىڭ قولىن قىلىشپەن شاۋىپ تاستادى. سونان كەيىن بۇل ايەلدى «بۇلىك شىعاردى» دەگەن سىلتاۋمەن اقمولا تۇرمەسىنە ايداپ جىبەردى.

مۇنداي شەكتەن شىققان زۇلىمدىققا جۇمىسشىلار توزە المادى. ولار ءۇش كۇندەي جۇمىسقا شىقپاي، مىس قورىتاتىن پەشتى توقتاتىپ تاستادى. پارفەنوۆ، قوزىبايەۆ سياقتى جۇمىسشىلار ەرەۋىل باستاپ، اعىلشىندارعا قاتتى نارازالاق ءبىلدىردى. اشىنعان حالىقتىڭ ۇيىمداسقان ەرەۋىلىنەن قورىققان اعىلشىندار بەكوۆا تاكىجاندى تۇتقىننان بوساتىپ، اقمولادان سپاسس زاۆودىنا جەتكىزىپ سالدى. ارسىز اعىلشىندار وسىنداي نەشە ءتۇرلى ايۋاندىق ىستەر ىستەدى....

---