InfoHub Logo

ەرتەرەكتە نۇرپەيىس دەگەن قارت بولىپتى. ءوزى اۋقاتتى تۇرىپتى. جاسى توقساننان اسىپ، قارتايىپ، جاسى كەلگەن شاعىندا ءسوز رەتى كەلگەندە بالالارى مەن جاقىن تۋىستارىنا، اۋىلداستارىنا:

— ولسەم، جانازاما التى بولىس ەل شاقىرىڭدار، — دەپ وتىرادى ەكەن. ونىڭ بۇل حابارى كورشى اۋىلدىڭ قارتتارىنىڭ قۇلاعىنا ءتيىپتى. ولار اۋىل ادەتىنشە قارتتان «سىباعا» كۇتىپ ءجۇرىپتى.

وسىنى بىلەتىن ءبىر قۋ جىگىت قاڭتاردىڭ سۋىق كۇنىندە كورشى اۋىلدىڭ ۇستىنەن ءوتىپ بارا جاتىپ، ءبىر شالعا:

— نۇرپەيىس قايتىس بولدى. ەرتەڭ جانازاسى، — دەپتى. الگى شال استىنداعى اتىن بوربايلاتا شاۋىپ، اۋلىنا جەتىپتى. «نۇرپەيىس ولسە، جانازاسىنا بىرگە بارامىز» دەپ جۇرگەن ەكى-ۇش كورشىسىنە ايتىپتى. ءبارى باس قوسىپ، «تاعى كىمگە حابارلايمىز» دەپ اقىلداسىپتى.

— ويباي-اۋ، ادامدى كوبەيتە بەرىپ نەڭ بار، كوپتەن نە تيەدى، ءوزىمىز-اق بارامىز، — دەپتى بىرەۋى.

بۇلار ءبىر ۇيىقتاپ تۇرىپ، ءتۇن ورتاسىندا جولعا شىعىپتى. جول بويى نۇرپەيىستىڭ كيىمىن ءبولىسىپتى.

— نۇرپەكەڭنىڭ قارا بارقىتپەن تىستالعان ءبىر قاسقىر ىشىگى بار دەۋشى ەدى. جۋعىسىنا ءتۇسىپ، سونى مەن الايىن، — دەپتى ءبىرى.

— مەنىڭ شاپانىم ءبۇتىن، ءبىراق كەبىس، ءماسىم جىرتىلىپ ءجۇر ەدى، اياق كيىمىن مەن-اق الايىن، — دەپتى ەكىنشىسى.

وسىنداي دامە ەتىپ، بولىسۋمەن ءتۇنى بويى ءجۇرىپ، ولار كۇن شىعا نۇرپەيىس اۋىلىنا جاقىنداپتى. ساقال-مۇرتىن قىراۋ باسىپ كەلە جاتقان بۇلارعا ءبىر اتتى جولىعىپتى.

— جول بولسىن، — دەپتى اتتى.

— الەي بولسىن. نۇرپەيىستىڭ جانازاسىنا كەلەمىز.

اتتى اڭىراپ تۇرىپ قالىپتى دا، سالدەن سوڭ:

— نۇرپەكەڭ جاڭا عانا اتىنا ءمىنىپ، بازارعا كەتتى عوي، — دەپتى.

الگىلەردىڭ باسىنان تاس تۇسكەندەي بولىپتى. اقىرى قول-اياق، قۇلاقتارىن ءۇسىتىپ، اراعا ءبىر قونىپ، ولار ۇيلەرىنە زورعا جەتىپتى.

---