وڭتۇستىك كورەيادان اكتريسا مەن رەجيسسەر ۇرلاتىپ العان كيم چەن ير

ۇرلانعان كينوجۇلدىزدار

كيم چەن ير كينونى ۇگىت-ناسيحاتتىڭ ەڭ قاۋقارلى قۇرالى ءارى ونەردىڭ ەڭ ۇزدىگى دەپ ءبىلدى. ول شارتاراپتان اكەلىپ، جەكە ءوزى ءۇشىن انا تىلىنە اۋدارىلعان فيلمدەردىڭ قيساپسىز مول كوللەكسياسىن جينادى. 1966 جىلى كحدر پاتشاسى كيم ير سەن ءوزىنىڭ 25 جاسار بالاسى كيم چەن ءيردى كينو جانە ونەر بولىمشەسىنىڭ باسشىسى ەتىپ تاعايىندادى. وسىلايشا جاس كينومان قاسيەتتى دە قاستەرلى سالاعا باس سۇقتى.

^{كيم چەن ير}

ول سولتۇستىككورەيالىق اسكەري جانە ساياسي قايراتكەرلەر، سول زامانعى كحدر-عى جۇرتتىڭ باقىتتى ءومىرى مەن ولاردىڭ جاۋلارىنىڭ جان اشىرلىق جاعدايى باياندالاتىن ۇگىت-ناسيحات كينولاردى تۇسىرۋگە كىرىستى.

الايدا، بەلگىلى ءبىر ۇلگى بويىنشا جانە ءبارى بىركەلكى سومدالعان كەيىپكەرلەردەن تەز ارادا-اق جالىعىپ كەتكەن كيم چەن ير گولليۆۋددىق تۋىندىلارمەن سالىستىرۋعا تاتىرلىق ناعىز كينو تۇسىرگىسى كەلدى. بۇلاي ىستەۋ ءۇشىن وعان ونداي كينونى قالاي ءتۇسىرۋدى بىلەتىن ادامداردى قاراماعىنا الۋ كەرەك بولدى. ونەر قايراتكەرلەرىن شاقىرۋ كحدر ادەتىندە جوق بولاتىن، سوندىقتان ولاردى جاي عانا ۇرلاپ اكەتە سالۋدى ۇيعاردى.

1978 جىلى وڭتۇستىككورەيالىق اكتريسا چحۆە ىن حي اياق استى عايىپ بولدى — كورگەندەردىڭ ايتۋىنشا ونى كولىككە سالىپ الىپ كەتكەن. التى ايدان سوڭ ول اكتريسانىڭ بۇرىنعى كۇيەۋى — ايگىلى رەجيسسەر شين سان وك تا قولعا ءتۇستى، ول بۇرىنعى جۇبايىن ىزدەۋگە شىققان ەدى.

ۇگىت-ناسيحات جانە «گودزيللانىڭ» كوممۋنيستىك نۇسقاسى

بۇرىنعى ەرلى-زايىپتىلاردى كحدر-عا الىپ كەلدى. باس كەزىندە ولار ءبىر بىرىنەن بولەك تۇردى. رەجيسسەر تۇتقىننان قاشىپ كەتۋگە تالپىنىپ كوردى، ءبىراق كينومان كيم چەن يردەن كەتىپ قالۋ وڭاي شارۋا ەمەس ەدى. اكتريسا بولسا، ءوزىن اقىلدىراق ۇستادى — وزبىر ليدەرمەن كينو جايىندا اڭگىمەلەسىپ، مەيرامحانالاردا تاماقتانىپ ءجۇردى. ول مىلتىق اتۋدى جانە قورقىنىشتى فيلمدەردى جاقسى كورەتىن بولىپ شىقتى. اكتريسالاردىڭ ىشىنەن وعان باسقالاردان كوبىرەك ۇنايتىنى ەليزابەت تەيلور بولدى، ال ەرلەر ىشىندە — شون كوننەري سومداعان دجەيمس بوند ۇنادى.

مەن ودان ازداپ قورقاتىنمىن، الايدا، ول سەزگىشتەۋ كىسى ەكەن. ودان سەسكەنەتىنىمدى بايقاعاندا «چحە جولداس، نەگە ءدىر-دىر ەتىپ تۇرسىز؟ شىنىمەن-اق قورتىقتان قورقاسىز با؟» دەپ سۇراپ كوڭىلىمدى ورنىنا ءتۇسىردى. وسىدان سوڭ كۇلىپ جىبەردى، ونىڭ كۇلكىسى اسەرلى بولدى، وزىنە دەگەن يرونياسى مىقتى بولاتىن. — چحۆە ىن حي

بىرنەشە جىلدان سوڭ ەرلى-زايىپتىلارعا كەزدەسۋگە مۇمكىندىك بەرىلدى. كوپ وتپەي ولار ۇيلەندى. سوسىن سولتۇستىك كورەيا ءۇشىن كينو تۇسىرە باستادى — الداعى ءۇش جىل ىشىندە بۇل جۇپ جەتى فيلم شىعاردى، ولاردىڭ ىشىندە «پۋلساگاري» دەگەن اتاۋمەن جاپوندىق «گودزيللانىڭ» كارىستىك انالوگى دا بار.

التىن توردان قاشىپ شىعۋ

كحدر-دا شين مەن چحۆە تەز ارادا تانىمال جۇلدىزدارعا اينالىپ شىعا كەلدى. ولارعا ارناپ ۇلكەن ءۇي سالىپ بەردى، اس-اۋقاتتان كەندە قىلمادى، قىمبات سىيلىقتار: كوسمەتيكا، اۆتوكولىكتەر، ساعاتتار اكەپ بەرىپ وتىردى. اكتريسا ءوز وتانى مەن كوز جازىپ قالعان جورا-جولداستارىن ساعىنىپ ءجۇردى، ءشيننىڭ كوڭىلى توق ەدى — كەيىنگى جىلدارى ونىڭ ءوز وتانىنداعى قىزمەت-مانسابى ونشا جاقسى ەمەس ەدى، ال مىنا جەردە ول كۋمير بولدى.

^{شين سان وك، كيم چەن ير جانە چحۆە ىن حي.}

كوپ كەشىكپەي جۇبايلارعا شەتەلگە ساياحاتتاپ شىعۋعا رۇقسات ەتىلدى. الايدا، كحدر بيلىگى ساقتانۋدى ءجون كوردى — ەرلى-زايىپتىلارمەن، قاشان بولسىن، وققاعارلار بىرگە ءجۇردى، ولاردىڭ ءتولقۇجاتتارىن قولدارىنا ۇستاتپادى. ءبىر كۇنى ولار ۆەناعا جول تارتتى جانە سول جەردە قاشىپ كەتۋگە بەل بۋدى. ولار قىراعى قاراۋىلداردان ايلاسىن اسىرىپ، امەريكا ەلشىلىگىنە جەتىپ تىعىلدى.

ولار اقش-قا بارىپ، كحدر جايىندا بار بىلگەندەرىن جايىپ سالدى. وسى ءۇشىن ولاردى قورعاۋ باعدارلاماسىنا ەنگىزىپ، ويدان شىعارىلعان اتپەن Disney ستۋدياسىنا جۇمىسقا تۇرعىزدى. نامىسى تاپتالعان كيم چەن ير ولاردى ەلىنىڭ جادىنان ءوشىرۋدى ۇيعارىپ، ولاردىڭ ەسىمدەرىن بارلىق سولتۇستىككورەيالىق فيلمدەردەن الىپ تاستاۋدى بۇيىردى.