InfoHub Logo

ورالدا جىلۋ جۇيەسى جاڭعىرتىلادى: ۇكىمەت 2،5 ملرد تەڭگە ءبولدى،-دەپ حابارلايدى ينفوحاب.كز.

ورال قالاسىنىڭ №2 جىلۋ ماگيسترالىن قايتا جاڭعىرتۋ جوباسىنا ۇكىمەت 2،5 ملرد تەڭگە قارجى ءبولدى. قۇرىلىس-مونتاجداۋ جۇمىستارى 2024 جىلى باستالىپ، جىلۋ ەلەكتر ورتالىعىنان (جەو) باستاپ، «سيتي سەنتر» ساۋدا ءۇيى ماڭايىنا دەيىنگى ۋچاسكەنى قامتيدى.

بۇل جىلۋ ماگيسترالى 1987 جىلدان بەرى پايدالانىلىپ كەلەدى. وسى ارالىقتا تەمىربەتون كونسترۋكسيالارى مەن ارماتۋرالارى ەسكىرىپ، ءقازىر ەلەۋلى توزۋعا ۇشىراعان.

وبلىس اكىمدىگىنىڭ حابارلاۋىنشا، رەكونسترۋكسيالاۋ جۇمىستارى 2025-2026 جىلدارداعى جىلىتۋ ماۋسىمى باستالعانعا دەيىن تولىق اياقتالادى دەپ جوسپارلانۋدا. جوبانىڭ باستى ماقساتى – جىلۋ جەلىلەرىنىڭ توزۋىن ازايتۋ، ىستىق سۋدىڭ وتكىزۋ قابىلەتىن ارتتىرۋ جانە قىزمەت كورسەتۋ شىعىندارىن قىسقارتۋ.

قازىرگى تاڭدا ورال قالاسىنداعى ماگيسترالدى جىلۋ جەلىلەرىنىڭ جالپى ۇزىندىعى 249 شاقىرىمدى قۇرايدى. بۇل ينفراقۇرىلىمنىڭ باسىم بولىگى وتكەن عاسىردىڭ 70-80 جىلدارى سالىنعان جانە بۇگىندە ولاردىڭ توزۋ دەڭگەيى 50%-دان اسىپ وتىر.

بيلىك جىلۋ جۇيەسىن جاڭعىرتۋعا ەرەكشە كوڭىل ءبولىپ، بىرنەشە باعىت بويىنشا جۇيەلى جوندەۋ جۇمىستارىن جۇرگىزۋدە. بۇل – قالا تۇرعىندارىن سەنىمدى ءارى ساپالى جىلۋمەن قامتاماسىز ەتۋ جولىنداعى ماڭىزدى قادام.