وربۇلاق شايقاسى
XVII عاسىردا قازاقستان جەرىنە كۇش-قۋاتى مول جوڭعار حاندىعى ءجيى-جيى شابۋىل جاساپ تۇردى. قازاقتار ءوز جەرىن تاڭعاجايىپ تاباندىلىقپەن، ەرلىكپەن كورعادى. اسكەري تاريحتا وسىنداي ۇرىستاردىڭ ءبىرى — وربۇلاق شايقاسى ەرەكشە ورىنعا يە بولدى.
1643 جىلى جوڭعار بيلەۋشىسى باتىر قونتايشى ىلە-تالاس القابىنا 50 مىڭدىك اسكەر جىبەرەدى. وسى كەزدە شامامان 10 مىڭ قىرعىز باتىردىڭ ۇستەمدىگىن مويىنداعان ەدى. مۇنى ەستىگەن قازاق سۇلتانى جاڭگىر جوڭعارلارعا سوققى بەرۋگە اسىعادى. قىسقا ۋاقىت ىشىندە ونىڭ تۋىنىڭ استىنا 600 ادام جينالادى. وسى ۇرىستا توپ باستاعان ارعىن اعىنتاي، الشىن جيەنبەت، قاڭلى ساربۇقا، نايمان كوكسەرەك، دۋلات جاقسىعۇل، شاپىراشتى قاراساي، سۋان ەلتىندى ەسىمدى باتىرلار حالىق جادىندا ماڭگىلىك ساقتالىپ قالدى.
بار-جوعى 600 جاۋىنگەرمەن 50 مىڭدىق اسكەرگە تويتارىس بەرۋ وتە قيىن. سوندىقتان جاڭگىر كومەك سۇراپ، سامارقاند بيلەۋشىسى كىشى جۇزدەن شىققان جالاڭتوسكە شابارمان جىبەرەدى. ءوزى جوڭعارلاردىڭ الدىن الۋ ءۇشىن جەتىسۋعا اتتانادى. وربۇلاق جەرىندە تورۋىل قۇرىپ جاتقان جاڭگىر جەر جاعدايىن ەسكەرىپ، تاۋ شاتقالىنا ءوز باتىرلارىن وڭتايلى ورنالاستىرىپ جاسىرىپ قويادى. قايمىقپاي ىشكەرىلەي ەنگەن جوڭعارلارعا جاڭگىر سۇلتان تۋ سىرتىنان لاپ قويادى. ساداق پەن بىلتەلى مىلتىقتارىنان وق جاۋدىرىپ، بىرنەشە مىڭ جاۋىنگەردىڭ كوزىن جويادى. وسى ساتتە ءجالاڭتوس باتىردىڭ 20 مىڭدىق اسكەرى دەر كەزىندە جەتىپ ۇلگەرەدى. ولار بىرىگىپ، جاۋدى تالقاندايدى. ءسويتىپ، جوڭعارلار قازاق جەرىنەن كەتۋگە ءماجبۇر بولادى.
You Might Also Like
-
بۋمىن (كىتاي جازبالارىندا تۋ-مىن كاحان) (ت.ج.ب. — 553 ج.) — تۇرىك قاعاندىعىنىڭ نەگىزىن قالاۋشى قاعان (542 - 553 جج. بيلىك ەتكەن)، اشينا تايپاسىنان شىققان. اشينا تايپاسى VI عاسىردىڭ ور...
-
قازاق حالقىنىڭ، اسىرەسە، قارت ادامداردىڭ ءسۇيسىنىپ جەيتىن تاعامدارىنىڭ ءبىرى — تارىنىڭ تالقانى. تالقان قۋىرىپ اقتاعان تارىنىڭ سوگىنەن نەمەسە ونىڭ ايىرىپ العان جارماعىنان ديىرمەنگە تارتىپ جاسالا...
