InfoHub Logo

قازاقستاندىق عالىمدار وتقا ءتوزىمدى، جانبايتىن، بالقىمايتىن جانە رادياسيانى وتكىزبەيتىن ەرەكشە كابەل ءتۇرىن ويلاپ تاپتى. بۇل جاڭالىق عيماراتتارداعى ءورت قاۋىپسىزدىگىن ارتتىرۋعا ىقپال ەتەدى. عىلىم جانە جوعارى ءبىلىم ءمينيسترى ساياسات نۇربەكتىڭ ايتۋىنشا، ورتتەردىڭ باسىم بولىگى كابەلدەردىڭ اقاۋلارىنان تۋىندايدى، ال جاڭا ءونىم بۇل ماسەلەنى شەشۋگە كومەكتەسەدى.

ساياسات نۇربەك جاڭاشىلدىقتىڭ تيىمدىلىگىن دالەلدەۋ ءۇشىن ۇكىمەت باسشىسى و. بەكتەنوۆتىڭ كابينەتىندە ەكسپەريمەنت جاساعانىن ايتتى.

"پرەمەر-مينيستر سەنىڭكىرەمەدى. سول كەزدە ول ماعان «زاجيگالكاڭدى اكەل» دەدى. مەن كابەلدى جارتى ساعات بويى جاعىپ تۇردىم. ءبىراق ول جانبادى. بۇل كابەلدىڭ ساپاسى وتە جوعارى. بىلتىر ونىڭ العاشقى ۇلكەن پارتياسى ەكسپورتقا شىقتى. ءقازىر «وزبەكستان تەمىر جولدارى» ۇلتتىق كومپانياسى وسى كابەلدەردى قولدانۋدا"، – دەدى مينيستر.

بۇل يننوۆاسيالىق كابەلدەر تەك قازاقستاندا عانا ەمەس، شەتەلدىك نارىقتا دا سۇرانىسقا يە بولۋدا. الداعى ۋاقىتتا ولاردى قۇرىلىس جانە ونەركاسىپ سالاسىندا كەڭىنەن پايدالانۋ جوسپارلانىپ وتىر. جەرگىلىكتى عالىمداردىڭ بۇل جەتىستىگى ەلدىڭ عىلىمي الەۋەتىن كورسەتىپ قانا قويماي، ەكسپورتتىق مۇمكىندىكتەرىن دە كەڭەيتۋگە جول اشپاق.