InfoHub Logo

2017 – 2018 وقۋ جىلىنىڭ 18 قىركۇيەك – 22 قىركۇيەك ارالىعىندا جوسپارلانعان
«وزگە ءتىلدىڭ ءبارىن ءبىل،
ءوز ءتىلىڭدى قۇرمەتتە» قازاق ءتىلى مەن ادەبيەتى پاندەرى اپتالىعىنىڭ اشىلۋ سالتاناتى

ماقساتى: وقۋشىلارعا قازاق ءتىلى تۋرالى مالىمەت بەرۋ، شاكىرتتەردىڭ شىعارماشىلىق قابىلەتتەرىن ارتتىرۋ، بالالاردى انا ءتىلىن ءسۇيىپ، قۇرمەتتەۋگە باۋلۋ.

ءى. العى ءسوز. قايىرلى كۇن، قىمباتتى وقۋشىلار، قۇرمەتتى ۇستازدار!
«وزگە ءتىلدىڭ ءبارىن ءبىل، ءوز ءتىلىڭدى قۇرمەتتە» تاقىرىبىنداعى قازاق ءتىلى مەن ادەبيەتى پاندەرى اپتالىعىنىڭ اشىلۋ سالتاناتىنا قوش كەلدىڭىزدەر! ءتىل - حالىقپەن بىرگە ءومىر ءسۇرىپ داميدى. سەبەبى، ءار ۇلتتىڭ ءتىلى - ونىڭ باقىتى، تىرەگى. بارشاڭىز دا بىلەسىزدەر 1989 جىلى «رەسپۋبليكاداعى قازاق ءتىلىنىڭ جايى» تۋرالى قاۋلى قابىلداندى. 1989 جىلى قىركۇيەكتىڭ 22 - ءى كۇنى «قازاقستان رەسپۋبليكاسىنداعى تىلدەر» زاڭ قابىلدانىپ، قازاق ءتىلى قازاقستان رەسپۋبليكاسىنىڭ مەملەكەتتىك ءتىل مارتەبەسىنە يە بولدى. كەيىن 1993 جىلى قاڭتاردىڭ 28 - ءى كۇنى بۇل ستاتۋس قازاقستان رەسپۋبليكاسىنىڭ جاڭا كونستيتۋسياسىندا تۇراقتالىپ، ءتىل تۋرالى زاڭى 1997 جىلى شىلدەنىڭ 11 - ءى كۇنى جاڭا «قازاقستان رەسپۋبليكاسىنداعى تىلدەر تۋرالى» زاڭى قابىلداندى. بۇل زاڭنىڭ 4 - بابىندا قازاق ءتىلى قازاقستان رەسپۋبليكاسىنىڭ مەملەكەتتىك ءتىلى ەكەندىگى جازىلعان. وسىعان بايلانىستى 22 قىركۇيەك تىلدەر كۇنىنە وراي
مەكتەبىمىزدە «وزگە ءتىلدىڭ ءبارىن ءبىل، ءوز ءتىلىڭدى قۇرمەتتە» تاقىرىبىنداعى تىلدەر اپتالىعى وتكىزىلمەكشى.

ءىى. ادەبي مونتاج
1. نارشا قاشاعان ۇلى «انا ءتىلى». 8 - سىنىپ وقۋشىسى تولەگەنوۆا ايمەكەن
اتا - بابا اماناتى ءتىل دەگەن،
ناعىز نادان ءدال وسىنى بىلمەگەن.
تۇكىرگەندى سۋىن ىشكەن قۇدىققا،
تۇسىنبەيمىن، تۇسىنبەيمىن مۇلدە مەن!
ءوز ءتىلىڭدى سىيلاساڭ - ول ءمىنىڭ بە؟
وزگە تىلدە سويلەۋ الدە ءبىلىم بە؟
قورىنباي - اق، قورىقپاي - اق، قازاعىم،
امانداسىپ جۇرسەڭشى انا تىلىڭدە.
انا ءتىلىڭ – باس بايلىعىڭ، ىرىسىڭ،
ءتىلىڭ ءتىرى بولسا عانا ءتىرىسىڭ.
اتا - بابا اماناتىن ۇمىتىپ،
اتقا ءمىنىپ، شەن العانىڭ قۇرىسىن.

2. «انا ءتىلىم» نەسىپبەك ايت ۇلى. 7 - سىنىپ وقۋشىسى مۋحامبەتكالييەۆا ارۋجان
انا ءتىلىم، جۇرەگىسىڭ انامنىڭ.
جۇرەك - انا، مەن وزىڭنەن جارالدىم.
ساعات سايىن ساۋلىعىڭدى تىلەيمىن،
سەنسىز مىناۋ كەرەگى نە عالامنىڭ!
سەنىڭ ءاربىر تىنىسىڭمەن كۇن كەشەم،
سەن ارقىلى تىرشىلىكپەن تىلدەسەم.
ەل بەتىنە قالاي ءتۇزۋ قارايمىن،
انا ءتىلىم، ەگەر سەنى بىلمەسەم.
سەنىڭ ارقاڭ دۇنيەدەن سىر ۇقسام،
سەنىڭ ارقاڭ ءجۇزىپ ىشسەم تۇنىقتان.
اناشىمدى ۇمىتقانىم ەمەس پە،
تۋعان ءتىلىم، ەگەر سەنى ۇمىتسام.
انا ءتىلىم، دانا ءتىلىم، ب ا ق ءتىلىم،
سەنسىز باقىت دۇنيەدەن تاپتى كىم؟
سەنسىڭ مەنىڭ قۋانىشىم، شاتتىعىم،
سەنسىڭ مەنىڭ تازالىعىم، پاكتىگىم.
انا ءتىلىم، التىن ۇيام، قۇنداعىم،
اق بەسىكتە ءالديىڭدى تىڭدادىم.
سەنىڭ جىرىڭ، سەنىڭ ءانىڭ ايتارىم،
سانام ءسونىپ، بايلانعانشا ءتىل - جاعىم!

3. انا ءتىلى ىسقاق اكىم. 7 - سىنىپ وقۋشىسى ساتىموۆا سانجار
قىمبات ماعان انا ءتىلىم، بال ءتىلىم،
قىمبات ماعان دانا ءتىلىم، ار ءتىلىم.
اق سۇتىمەن بىرگە سىڭگەن بويىما،
انا ءتىلىم ارداق تۇتار التىنىم.
انا ءتىلىن جىرلاپ وتكەن تالايلار،
جىرلاپ وتكەن ىبىراي مەن ابايلار.
قاسيەتتى مەنىڭ انا تىلىمدە،
وشپەس ماڭگى الاۋلاعان اراي بار.
ولەڭ - جىرمەن ارايلانسا، تاۋ كۇلىپ،
ارداقتىمدى جىرلاپ وتەم ءان قىلىپ.
ماعجان، قاسىم، مۇقاعالي جىرلارىن،
جالعاستىرىپ جازا بەرەم ماڭگىلىك.

4. ۇيرەن انا ءتىلىڭدى ورازاقىن اسقار. 9 - سىنىپ وقۋشىسى يمانگالييەۆا سامال
ءوز ءتىلىڭسىز كورسەڭ دە ءوز كۇنىڭدى،
ءوز ءتىلىڭسىز بولساڭ دا اسقان ءبىلىمدى.
ءوز حالقىڭا بولا المايسىڭ ازامات،
بىلمەي تۇرىپ تۋعان انا ءتىلىڭدى.
سەندە ايىپ جوق، ءتىلىڭ دە ەمەس كىنالى،
ەشكىمنىڭ جوق بولسا دا وعان كۇمانى.
ۇيرەنبەسەڭ، ءوز ءتىلىڭدى بىلمەسەڭ.
جازىقسىز - اق جازعىرىپ ەل تۇرادى.
قانىڭ جانىڭ، قازاقى ۇلتتىق ءتۇرىڭ بار،
سەنەن ۇلگى الار قىزىڭ مەنەن ۇلىڭ بار.
پەرزەنتىسىڭ ەركىن، ازات حالىقتىڭ،
تاۋەلسىز ەل، مارتەبەلى ءتىلىڭ بار.

5. انا تىلىنە تاعزىم مۇزافار الىمبايەۆ. 6 - سىنىپ وقۋشىسى تۋلەۋشيەۆا اينامكوز
انا ءتىلى – ءبىزدىڭ تۋعان انامىز!
انامىزداي سىيلاپ، باعىپ - قاعامىز.
انا ءتىلىن باعالاساق، قالاي ءبىز
ءوزىمىزدىڭ سونداي بولماق باعامىز.
انا ءتىلىن كىم ايالاي بىلمەسە،
“اناسىنان بەزگەن ۇل!” – دەپ قاراڭىز.
قۋان، دالام! 9 - سىنىپ وقۋشىسى حۋساينوۆا جۇلدىز
قۋاناتىن كۇن بۇگىن.
سەرپىپ تاستا
مۇڭدى جۇرەك تۇندىگىن.
ءتىل تۋرالى
زاڭىم ەندى كۇشىنە
پاش ەتكەندەي
كەسكەن جاڭا كىندىگىن.
قۋان، انام!
ۇزاعىنان ءسۇيسىنىپ.
ءساتىڭ دە كوپ
كەيدە كەتكەن ءتۇڭىلىپ.
اق سۇتىڭمەن
بويعا بىتكەن ءتىلىمدى
ءپىر تۇتامىن
مەن الدىڭدا باس ءيىپ.

جاۋاپتى قازاق ءتىلى مەن ادەبيەتى
ءپانىنىڭ مۇعالىمدەرى
گ. ج. ساگاتوۆا
ك. س. قوشقاربايەۆا

وزگە ءتىلدىڭ ءبارىن ءبىل، ءوز ءتىلىڭدى قۇرمەتتە قازاق ءتىلى مەن ادەبيەتى پاندەرى اپتالىعىنىڭ اشىلۋ سالتاناتى. جۇكتەۋ