InfoHub Logo

نيۋ-يورك، بۇۇ — پالەستينا-يزرايل قاقتىعىسىنا قاتىستى جاڭا كەزەڭنىڭ شىمىلدىعى ءتۇرىلدى. نيۋ-يوركتە وتكەن حالىقارالىق كونفەرەنسيادا باتىستىڭ 15 ەلى پالەستينا مەملەكەتىن رەسمي تۇردە مويىنداۋعا دايىن ەكەنىن مالىمدەدى. بۇل – سوڭعى ونجىلدىقتارداعى ەڭ سالماقتى ديپلوماتيالىق قادامداردىڭ ءبىرى.

فرانسيانىڭ سىرتقى ىستەر ءمينيسترى جان-نوەل باررونىڭ سوزىنشە، قۇجاتقا قول قويعان مەملەكەتتەر قاتارىندا: فينليانديا، يسپانيا، يرلانديا، سلوۆەنيا، پورتۋگاليا، ليۋكسەمبۋرگ، يسلانديا، نورۆەگيا، اۋستراليا جانە كانادا بار. ولار يزرايل مەن پالەستينا اراسىنداعى ۇزاققا سوزىلعان داعدارىستى تەك اسكەري ەمەس، ساياسي جولمەن شەشۋگە شاقىرىپ وتىر.

مالىمدەمەدە 2023 جىلدىڭ 7 قازانىندا ورىن العان حاماس شابۋىلى قاتاڭ ايىپتالدى. قول قويعان ەلدەر بەيبىت تۇرعىنداردىڭ كەپىلگە الىنۋىن – ادام قۇقىقتارىن ورەسكەل بۇزۋ دەپ تانىپ، ولاردىڭ تەز ارادا بوساتىلۋىن تالاپ ەتتى. سونداي-اق، گازا سەكتورىنداعى گۋمانيتارلىق اپاتتىڭ ۋشىعىپ بارا جاتقانىنا نازار اۋدارىلىپ، اسكەري ارەكەتتەردى توقتاتۋعا ۇندەدى.

باتىس ەلدەرىنىڭ بۇل باستاماسى جاي عانا ساياسي مالىمدەمە ەمەس – ولار ناقتى تالاپتار قويىپ وتىر. اتاپ ايتقاندا:
– گازا سەكتورىن قارۋسىزداندىرۋ،
– حاماس-تى باسقارۋدان شەتتەتۋ،
– پالەستينا اكىمشىلىگىنە ەركىن سايلاۋ وتكىزۋ مەن بولاشاق مەملەكەتتىڭ بەيبىت دامۋ جولىنا كوشۋ تۋرالى جاۋاپكەرشىلىك جۇكتەۋ.

بۇل مالىمدەمە حالىقارالىق قاۋىمداستىقتىڭ پالەستينا ماسەلەسىنە قاتىستى كوزقاراسى وزگەرىپ كەلە جاتقانىن اڭعارتادى. الايدا بۇل قادام يزرايلمەن قارىم-قاتىناسقا قالاي اسەر ەتەتىنى ازىرگە بەلگىسىز.