InfoHub Logo

پرەزيدەنت قاسىم-جومارت توقايەۆ الماتىداعى «باعاناشىل» بالالار ءۇيىنىڭ تاربيەلەنۋشىلەرىن قونايەۆ قالاسىنا كوشىرۋ پروسەسىن دەرەۋ توقتاتۋدى تاپسىردى. بۇل تۋرالى اقوردا رەسمي حابارلادى.

مەملەكەت باسشىسى الماتى قالاسىنىڭ اكىمى دارحان ساتىبالدىعا بالالاردىڭ وڭتۇستىك استانادا ءبىلىمىن جالعاستىرۋىنا جاعداي جاساۋ ءۇشىن بالالار ۇيىنە جوندەۋ جۇرگىزىپ، ونى قالالىق مەنشىككە قابىلداۋدى جۇكتەدى.

«مەملەكەت باسشىسىنىڭ تاپسىرماسىنا سايكەس، بالالار ءۇيى كوشىرىلمەيدى. اتالعان جاعدايعا بايلانىستى پرەزيدەنت اكىمشىلىگى قىزمەتتىك تەكسەرىس جۇرگىزەدى. اتا-اناسىنىڭ قامقورلىعىنسىز قالعان بالالاردىڭ زاڭ شەڭبەرىندەگى بارلىق قۇقىعى تولىق ساقتالادى»، — دەلىنگەن پرەزيدەنت باسپا ءسوز قىزمەتىنىڭ مالىمدەمەسىندە.

ەسكە سالساق، بۇعان دەيىن 21 شىلدەدە الماتىداعى №1 بالالار ءۇيىنىڭ تاربيەلەنۋشىلەرىن قونايەۆ قالاسىنا كوشىرۋ باستالعان ەدى. ءبىراق جەتىم بالالار بۇعان دەيىن بىرنەشە رەت كوشۋگە ۇزىلدى-كەسىلدى قارسى ەكەنىن ايتقان.

قوعامدا رەزونانس تۋدىرعان بۇل شەشىمگە بۇرىنعى بالالار ومبۋدسمەنى، قۇقىق قورعاۋشى ارۋجان ساين دا پىكىر ءبىلدىرىپ، بالالاردىڭ پىكىرىنسىز جاسالعان كوشىرۋدىڭ بۇۇ بالا قۇقىقتارى تۋرالى كونۆەنسياسى مەن ۇلتتىق زاڭناما تالاپتارىن بۇزاتىنىن ايتقان بولاتىن. ونىڭ ايتۋىنشا، قونايەۆتاعى مەكەمەدە قاجەتتى ينفراقۇرىلىم مەن وقۋ جاعدايى جاسالماعان.

بۇل جاعداي قوعامنىڭ بەلسەندى قارسىلىعىن تۋدىرىپ، مەملەكەتتىك دەڭگەيدە جەدەل شەشىم قابىلداۋعا سەبەپ بولدى.