InfoHub Logo

اقش پرەزيدەنتى دونالد ترامپ ءبىلىم مينيسترلىگىن جابۋ تۋرالى جارلىققا قول قويۋعا دايىندالۋدا. بۇل تۋرالى Infohub.kz The Wall Street Journal-عا سىلتەپ حابارلايدى.

ترامپتىڭ پىكىرىنشە، فەدەرالدىق ءبىلىم بەرۋ باسقارماسى ارتىق بيۋروكراتيا تۋدىرىپ، بيۋدجەت قاراجاتىن ءتيىمسىز جۇمسايدى. سوندىقتان ول مينيسترلىكتى تاراتىپ، ءبىلىم بەرۋ سالاسىنداعى وكىلەتتىكتەردى شتاتتارعا بەرۋدى ۇسىندى.

بۇل باستاما ترامپتىڭ 2024 جىلعى سايلاۋالدى باعدارلاماسىنىڭ نەگىزگى تارماقتارىنىڭ ءبىرى بولدى. ول ءبىلىم مينيسترلىگىنىڭ جۇمىسىن شتاتتار دەڭگەيىندەگى دەپارتامەنتتەر دە اتقارا الادى دەپ سانايدى.

"ءار شتات ءوز ءبىلىم جۇيەسىن ءوز بەتىنشە رەتتەي الۋى كەرەك. فەدەرالدى بيلىك بۇل پروسەسكە ارالاسپاۋى ءتيىس"، – دەگەن ەدى ترامپ ناۋقان كەزىندە.

الايدا مينيسترلىكتى تاراتۋ ءۇشىن كونگرەستىڭ ماقۇلداۋى قاجەت، بۇل وڭاي شارۋا ەمەس. دەموكراتتار مەن ءبىرقاتار ساراپشىلار بۇل شەشىمگە قارسى شىعىپ، ءبىلىم ساپاسىنىڭ تومەندەۋ ءقاۋپى بارىن ايتۋدا.

پرەزيدەنتتى قولداۋشىلار بۇل باستامانى شتاتتاردىڭ ءبىلىم بەرۋ سالاسىنداعى دەربەستىگىن ارتتىرۋ مۇمكىندىگى رەتىندە قاراستىرادى.ال قارسى تاراپ ءبىلىم بەرۋ جۇيەسىندەگى ستاندارتتاردىڭ اركەلكى بولاتىنىن، بۇل ەلدەگى ءبىلىم ساپاسىنا كەرى اسەر ەتۋى مۇمكىن ەكەنىن العا تارتادى.

مۇعالىمدەر وداقتارى مەن قۇقىق قورعاۋ ۇيىمدارى ءبىلىم مينيسترلىگىن جابۋ كونستيتۋسياعا قايشى دەپ ساناپ، سوتقا شاعىم ءتۇسىردى.

ەگەر كونگرەسس بۇل ۇسىنىستى قولداسا، اقش-تاعى ءبىلىم بەرۋ جۇيەسى تۇبەگەيلى وزگەرىسكە ۇشىرايدى. ءبىراق بۇل وزگەرىستەر وقۋشىلار مەن مۇعالىمدەر ءۇشىن قانشالىقتى ءتيىمدى بولاتىنى ءالى بەلگىسىز.